COP26 ៖ ប្រទេសជាង៣០ និងក្រុមហ៊ុនផលិតរថយន្ត សន្យាផលិតតែរថយន្តដែលមិនបញ្ចេញឧស្ម័នពុល ចាប់ពីឆ្នាំ២០៤០ទៅ
មានប្រទេសយ៉ាងហោច ជាង៣០ប្រទេស រួមជាមួយក្រុមហ៊ុនផលិតរថយន្តចំនួនជាង១០ បានរួមគ្នាសន្យាថា ចាប់ពីឆ្នាំ២០៤០ទៅ រថយន្តថ្មីទាំងអស់ដែលគេផលិត គឺនឹងត្រូវតែជារថយន្ត ដែលមិនបញ្ចេញឧស្ម័នពុល។ នេះយោង តាមលិខិតប្រកាស របស់ក្រុមការងារអង់គ្លេស ដែលចាត់ចែងរៀបចំសន្និសីតអន្តរជាតិស្តីពីអាកាសធាតុ COP26 នៅទីក្រុងហ្ក្លាសហ្កូវ កាលពីថ្ងៃទី១១វិច្ឆិកា។
ចុះផ្សាយនៅថ្ងៃ៖
ស្តាប់ - ០២:៤០
ចាប់ពីឆ្នាំ ២០៤០ទៅ រថយន្តថ្មីដែលគេផលិតបាន ទាំងរថយន្តធ្វើដំណើរជាលក្ខណៈគ្រួសារ និងរថយន្តដឹកជញ្ជូនធនតូច គឺត្រូវតែជារថយន្តដែលមិនបញ្ចេញឧស្ម័នពុល។ ហើយសម្រាប់ទីផ្សារធំដែលសំខាន់វិញ គឺការសន្យានេះនឹងចូលជាធរមាននៅឆ្នាំ២០៣៥។ តែយ៉ាងណា សេចក្តីប្រកាសរួមគ្នា គឺពុំមានលក្ខណៈចាប់បង្ខំទេ។ ពោលគឺវាគ្រាន់តែជាការសន្យា ប្រឹងប្រែងរវាង ក្រុមប្រទេសជាង៣០ និងក្រុមហ៊ុនផលិតរថយន្តមួយចំនួនតែប៉ុណ្ណោះ។
ក្នុងចំណោមប្រទេសដែលបានចុះហត្ថលេខា ក្នុងការសន្យានេះ គឺមានដូចជា អង់គ្លេស អៀរឡង់ ស៊ុយអែដ អ៊ីស្រាអែល ដែលប្រទេសទាំងនេះ សុទ្ធតែបានដាក់ចេញនូវកម្មវត្ថុ ឈប់លក់រថយន្តដែលប្រើម៉ាស៊ីនដើរដោយប្រេងឥន្ធនៈ នៅឆ្នាំ២០៣០។ ប្រទេសន័រវែសវិញ បានកំណត់ថានឹងឈប់លក់រថយន្តប្រើប្រេងឥន្ធនៈ ក្នុងទីផ្សារខ្លួន នៅឆ្នាំ២០២៥។ ដោយឡែក ប្រទេសមួយចំនួនទៀត ដែលជាប្រទេសផលិតរថយន្តធំជាងគេ មានដូចជា សហរដ្ឋអាមេរិក បារាំង ជប៉ុន និងអាល្លឺម៉ង់ ជាដើម មិនបានចុះហត្ថលេខាលើកការប្រកាសសន្យានេះទេ។
លោកស្រី Barbara Pompili រដ្ឋមន្ត្រីក្រសួងបរិស្ថានបារាំង បានលើកឡើងថា បារាំងយល់ព្រមថាចាប់ពីឆ្នាំ២០៣៥ នឹងឈប់លក់រថយន្តថ្មី ដែលមិនប្រើចរន្តអគ្គីសនី។ ក៏ប៉ុន្តែបញ្ហានេះ គេកំពុងតែពិភាក្សាគ្នា ក្នុងក្របខណ្ឌអឺរ៉ុប ថាតើគេរាប់បញ្ចូលរថយន្ត hybrides ចូលទៅក្នុងនេះដែរឬទេ។
ដោយឡែកសម្រាប់សហរដ្ឋអាមេរិក កម្មវត្ថុនៃការកាត់បន្ថយឲ្យបាន៥០% នៃរថយន្តដែលបញ្ចេញឧស្ម័នពុល នៅឆ្នាំ២០៣០ គឺគេរាប់បញ្ចូលទាំងរថយន្តអគ្គិសនី១០០% រថយន្តប្រើអ៊ីដ្រូសែន ព្រមទាំងរថយន្ត hybrides សាកបាន ដែលមានបំពាក់ម៉ាស៊ីនប្រើប្រេងឥន្ធនៈ។
ចំណែកក្នុងចំណោមក្រុមហ៊ុនផលិតរថយន្ត គេសង្កេតឃើញក្រុមហ៊ុនធំៗ មានដូចជា Toyota Volkswagen Hyundai និង Renault-Nissan-Mitsubishi មិនបានចុះហត្ថលេខាលើការប្រកាសសន្យានេះទេ។ មានតែក្រុមហ៊ុន Ford Mercedes-Benz General Motors និង Volvo ដែលមានកម្មវត្ថុ ឈប់ផលិតរថយន្តប្រើម៉ាស៊ីនធម្មតា ដែលបានចុះហត្ថលេខាលើការប្រកាសសន្យានេះ។
ដោយយោងលើហេតុផលនេះ អង្គការបរិស្ថាន មិនបានសម្តែងក្តីអបអរប៉ុន្មានទេ ជាមួយនឹងការប្រកាសនេះ។ លោក Martin Kaiser តំណាងអង្គការ Greenpeace អាល្លឺម៉ង់ បានលើកឡើងថា ដើម្បីចាកចេញឲ្យផុតពីការប្រើប្រាស់ប្រេងឥន្ធនៈ ដែលជាប្រភពនៃការបញ្ចេញឧស្ម័នកាបូនិក គឺយើងត្រូវតែឈប់ប្រើម៉ាស៊ីនរថយន្តដែលដើរដោយចំហេះប្រេង ហើយត្រូវតែពង្រីកសេវាដឹកជញ្ជូនសាធារណៈ ឲ្យបានទូលំទូលាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ