សហភាពអឺរ៉ុបបាននាំចេញវ៉ាក់សាំងកូវីដជាង១ពាន់លានដូស
ក្នុងអំឡុងពេល១០ខែ សហភាពអឺរ៉ុបបាននាំចេញវ៉ាក់សាំងកូវីដ ទៅកាន់យ៉ាងហោច១៥០ប្រទេស ពោលគឺស្មើនឹងពាក់កណ្តាលនៃបរិមាណវ៉ាក់សាំងផលិតនៅលើទឹកដីអឺរ៉ុបសរុប។ នេះបើតាមសេចក្តីប្រកាសរបស់លោកស្រីប្រធានគណៈកម្មការអឺរ៉ុប អួរស៊ូឡា វ៉នឌែរឡេយែន Ursula Von der Leyen តាមរយៈសារវីដេអូអនឡាញ ដោយគូសបញ្ជាក់យ៉ាងច្បាស់ថា អឺរ៉ុបជាអ្នកនាំចេញវ៉ាក់សាំងកូវីដលំដាប់ទីមួយពិភពលោក។
ចុះផ្សាយនៅថ្ងៃ៖
ស្តាប់ - ០២:០៩
គិតមកទល់នឹងថ្ងៃចន្ទទី ១៨តុលា២០២១នេះ អឺរ៉ុបបានប្រើវ៉ាក់សាំងអស់ជាង ៥៨០លានដូដោយចាក់ជូនប្រជាពលរដ្ឋបានដល់ជាង៧៥% នៃប្រជាជនសរុប។ ប៉ុន្តែអឺរ៉ុបក៏បានចែកចាយថ្នាំបង្ការកូវីដ ជាមួយបណ្តាប្រទេសផ្សេងទៀត នៅលើពិភពលោក ប្រកបដោយសមភាព និងចែកទៅឱ្យបណ្តាប្រទេសក្រីក្រនិងមានចំណូលមធ្យម តាមរយៈយន្តការCovax បានចំនួន៨៧លានដូស។
ហើយអឺរ៉ុបមិនឈប់ត្រឹមនេះទេ នៅប៉ុន្មានខែទៀតខាងមុខ សហភាពអឺរ៉ុបនឹងផ្តល់យ៉ាងហោចណាស់៥០០លានដូសបន្ថែមទៀត ទៅឱ្យប្រទេសទន់ខ្សោយក្រីក្រ។ តែសូមប្រទេសផ្សេងទៀតត្រូវប្រឹងប្រែងទ្វេឡើងដែរ។ នេះជាការបញ្ជាក់បន្ថែមរបស់លោកស្រី ប្រធានគណៈកម្មការអឺរ៉ុប អួរស៊ូឡា វ៉ុនឌែរឡេយែន។
ប៉ុន្តែអឺរ៉ុបនឹងបន្តយន្តការត្រួតពិនិត្យការនាំចេញវ៉ាក់សាំង ដែលផលិតនៅលើទឹកដីអឺរ៉ុប រហូតដល់ដំណាច់ឆ្នាំ ដើម្បីអាចធានាបានថាអឺរ៉ុបនឹងមានស្តុកវ៉ាក់សាំងប្រឆាំងកូវីដគ្រប់គ្រាន់សម្រាប់សមាជិកទាំង២៧ប្រទេស ដែលនៅព្រួយបារម្ភខ្លាំងនៅឡើយ នៅចំពោះមុខការលេចឡើងនៃមេរោគកូវីដបំប្លែងខ្លួន។
យន្តការត្រួតពិនិត្យការនាំចេញវ៉ាក់សាំងកូវីដរបស់អឺរ៉ុប បានចូលជាធរមានតាំងពីចុងខែមករា ដោយតម្រូវឱ្យក្រុមហ៊ុនផលិតឱសថទាំងអស់សុំការព្រមព្រៀងពីរដ្ឋជាសមាជិក និងគណៈកម្មការអឺរ៉ុបសិនមុននឹងអាចនាំចេញវ៉ាក់សាំងទៅប្រទេសផ្សេងក្រៅពីអឺរ៉ុប និងលើកលែងតែករណីថ្នាំវ៉ាក់សាំងនោះត្រូវបញ្ជូនទៅឱ្យប្រទេសក្រីក្រ។ ជាក់ស្តែងគឺការត្រួតពិនិត្យលើក្រុមហ៊ុនផលិតឱសថAstraZeneca ដែលជាប់ចោទមិនគោរពកិច្ចសន្យា យកវ៉ាក់សាំងផលិតសម្រាប់អឺរ៉ុបទៅលក់ប្រទេសផ្សេង។ តាំងពីខែមករាដល់ចុងខែកញ្ញា អឺរ៉ុបបានអនុម័តសំណើសុំនាំចេញវ៉ាក់សាំងចំនួន ២៦០០សំណើ ទៅកាន់ប្រទេសនិងដែនដីចំនួន៥៦ ក្នុងនោះមានសំណើតែមួយករណីគត់ដែលអឺរ៉ុបបដិសេធ គឺសំណើនាំចេញវ៉ាក់សាំងទៅអូស្ត្រាលី។
ប្រទេសមហាអំណាចជាច្រើន មានជាអាទិ៍ សហរដ្ឋអាមេរិក ឥណ្ឌា ឬអាហ្វ្រិកខាងត្បូង ... រួមទាំងអង្គការក្រៅរដ្ឋាភិបាលជាច្រើនបានទាមទារឱ្យមានការលើកអាជ្ញាបណ្ណផលិតវ៉ាក់សាំងជាបណ្តោះអាសន្ន ដើម្បីបង្កើនផលិតកម្ម ប៉ុន្តែអឺរ៉ុបបដិសេធ និងសុខចិត្តបង្កើនជំនួយតាមរយៈយន្តការCovax៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ