ការសិក្សាបារាំង ៖ វ៉ាក់សាំងមានប្រសិទ្ធភាពការពារមិនឱ្យឈឺកូវីដធ្ងន់ ទោះឆ្លងដែលតា
វ៉ាក់សាំងប្រឆាំងនឹងកូវីដ១៩ មានប្រសិទ្ធភាពខ្ពស់ ដោយអាចកាត់បន្ថយជំងឺកូវីដទម្រង់ធ្ងន់ និងការស្លាប់ របស់អ្នកជំងឺអាយុចាប់ពី៥០ឆ្នាំទៅ បានដល់ ៩០%។ វ៉ាក់សាំងកូវីដបច្ចុប្បន្នក៏ទំនងជាមានសមត្ថភាពខ្លាំងក្នុងការទប់ទល់នឹងមេរោគកូវីដបំប្លែងដែលតាដែរ ប៉ុន្តែគេនៅពុំទាន់មានព័ត៌មានពេញលេញនៅឡើយ។ នេះបើតាមលទ្ធផលនៃការសិក្សាទ្រង់ទ្រាយធំ របស់បារាំងលើមនុស្សជាង២២លាននាក់ រស់នៅក្នុងប្រទេសខុសគ្នា អ៊ីស្រាអែល អង់គ្លេស ឬសហរដ្ឋអាមេរិក។
ចុះផ្សាយនៅថ្ងៃ៖
ជាការសិក្សាដ៏ធំជាងគេនៅលើពិភពលោក ដឹកនាំដោយអ្នកស្រាវជ្រាវបារាំង ក្នុងអំឡុងពេលពីថ្ងៃទី ២៧ធ្នូ២០២០ដល់ថ្ងៃទី ២០កក្កដា២០២១ លើមនុស្សចាប់ពីអាយុ៥០ឆ្នាំឡើងទៅ ចំនួន១១លាននាក់បានចាក់ថ្នាំបង្ការកូវីដ និង១១លាននាក់ផ្សេងមិនចាក់ថ្នាំបង្ការ។
“អ្នកបានចាក់វ៉ាក់សាំងហើយមានហានិភ័យធ្លាក់ខ្លួនឈឺធ្ងន់ចូលពេទ្យ និងស្លាប់ ទាបជាងអ្នកមិនបានចាក់វ៉ាក់សាំង ដល់ទៅ៩ដង”។ នេះបើតាមការពន្យល់របស់លោកសាស្ត្រាចារ្យវេជ្ជបណ្ឌិត Mohmoud Zureik នាយកស្ថាប័នEpi-Phare បារាំង ដោយលម្អិតថា ១៤ថ្ងៃក្រោយចាក់ម្ជុលទីពីររួច អ្នកស្រាវជ្រាវបានសង្កេតឃើញមានការកាត់បន្ថយទម្រង់ធ្ងន់នៃជំងឺកូវីដ១៩ បានលើសពី៩០%។
ការធ្លាក់ចុះនៃចំនួនអ្នកជំងឺចូលព្យាបាលនៅមន្ទីរពេទ្យ ចាប់ពីថ្ងៃទី ២០មិថុនា២០២១ ក្នុងខណៈដែលដែលតាកំពុងវាយលុកខ្លាំងដំបូង ជាសារបញ្ជាក់ថា ថ្នាំវ៉ាក់សាំងមានប្រសិទ្ធភាពខ្ពស់ទល់នឹងមេរោគកូវីដបំប្លែងដែលតាដែរ។ ក្នុងរយៈពេលតែ១ខែនេះ អ្នកស្រាវជ្រាវសង្កេតឃើញប្រសិទ្ធភាពថ្នាំបង្ការមានប្រហាក់ប្រហែលមុន គឺប្រសិទ្ធភាពដល់៨៤% សម្រាប់មនុស្សចាស់អាយុលើស៧៥ឆ្នាំ និងដល់៩២%ចំពោះមនុស្សអាយុពី៥០-៧៤ឆ្នាំ។ រយៈពេលមួយខែជាពេលវេលាខ្លីណាស់សម្រាប់វាយតម្លៃឥទ្ធិពលរបស់វ៉ាក់សាំងចំពោះដែលតា។ ដូច្នេះគេត្រូវការសិក្សាបន្ថែមបញ្ចូលទិន្នន័យខែសីហានិងកញ្ញាទៀតសិន។
មានការសិក្សាជាច្រើនលើកឡើងអំពីប្រសិទ្ធភាពធ្លាក់ចុះទៅតាមពេលវេលា ប៉ុន្តែ នៅក្នុងអំឡុងនៃ តាមដានសិក្សា រយៈពេល៥ខែ ថ្នាំហាក់ដូចជាមិនធ្លាក់ប្រសិទ្ធភាពទេ។ នេះបើតាមការបញ្ជាក់របស់អ្នកស្រាវជ្រាវបារាំង។
សូមបញ្ជាក់ថាការសិក្សាបារាំងនេះ ធ្វើឡើងចំពោះវ៉ាក់សាំងបីប្រភេទដែលកំពុងធ្វើចរាចរណ៍នៅអឺរ៉ុប គឺ Pfizer/BioNtech Moderna និង AstraZeneca ដោយពុំបានរាប់បញ្ចូលថ្នាំបង្ការរបស់ក្រុមហ៊ុនJohnson & Johnsonទេ ព្រោះវាទើបមកដល់ទីផ្សារក្រោយគេ។ ហើយការសិក្សានេះ ផ្តោតតែលើប្រសិទ្ធភាពថ្នាំក្នុងទប់ទល់មិនឱ្យធ្លាក់ខ្លួនឈឺធ្ងន់ឬស្លាប់ និងមិនបានគិតដល់សមត្ថភាពទប់ស្កាត់ការឆ្លងនិងការចម្លងរបស់មេរោគកូវីដទេ។ ប៉ុន្តែអ្វីដែលសំខាន់គឺ នៅពេលជំងឺរាតត្បាតលែងផ្តល់ទម្រង់ធ្ងន់ធ្ងរ នោះគេលែងហៅថាជំងឺរាតត្បាតទៀតហើយ ហើយនេះជាកម្មវត្ថុចម្បងសម្រាប់ការពារសុខភាពសាធារណៈ។ នេះបើតាមប្រសាសន៍របស់លោកសាស្ត្រាចារ្យ Zureikដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ