បារាំងផ្អាកការងារបុគ្គលិកសុខាភិបាល៣ពាន់នាក់ដែលមិនបានចាក់វ៉ាក់សាំងកូវីដ
នៅបារាំង បុគ្គលិកសុខាភិបាលប្រមាណ ៣ពាន់នាក់ត្រូវបានព្យួរពីការងារ ដោយមិនទទួលបានប្រាក់ខែឡើយ ក៏ព្រោះតែពួកគេខកខានមិនបានទៅចាក់វ៉ាក់សាំងបង្ការកូវីដឲ្យបានទាន់ពេលកំណត់នៅសប្តាហ៍នេះ។ ការមិនទៅទទួលការចាក់វ៉ាក់សាំង គឺជាអំពើបំពាននឹងច្បាប់ថ្មីដែលផ្តល់ធម្មនុញ្ញភាពដោយក្រុមប្រឹក្សាធម្មនុញ្ញបារាំងកាលពីដើមខែសីហាកន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:៣១
ច្បាប់ថ្មីរបស់បារាំងដែលតម្រូវឲ្យការចាក់វ៉ាក់សាំងជាកាតព្វកិច្ចសម្រាប់បុគ្គលិកពេទ្យនេះ បានចូលជាធរមាននៅថ្ងៃពុធ ទី១៥ ខែកញ្ញា ឆ្នាំ២០២១។ ដោយសារតែខកខានមិនបានទៅទទួលការចាក់ថ្នាំបង្ការជំងឺកូវីដឲ្យទាន់ពេលកំណត់ មានបុគ្គលិកសុខាភិបាលបារាំងជាច្រើនពាន់នាក់ត្រូវបានព្យួរពីការងារ។
កាលពីសប្តាហ៍មុន ទីភ្នាក់ងារសុខភាពសាធារណៈជាតិរបស់បារាំងបានប៉ាន់ស្មានថាមាន ១២ %នៃបុគ្គលិកមន្ទីរពេទ្យ និងមានវេជ្ជបណ្ឌិតធ្វើការឲ្យវិស័យឯកជនចំនួនប្រមាណ ៦%នៅមិនទាន់បានចាក់វ៉ាក់សាំងកូវីដនៅឡើយទេ។
រដ្ឋមន្ត្រីសុខាភិបាលបារាំងលោក Olivier Véran បាននិយាយនៅថ្ងៃព្រហស្បតិ៍ ទី១៦ កញ្ញាថា បុគ្គលិកចំនួនប្រមាណ ៣ពាន់ដែលមិនបានចាក់វ៉ាក់សាំងកូវីដ ត្រូវបានគេជូនដំណឹងពីការផ្អាកការងារកាលពីថ្ងៃពុធនៅតាមមណ្ឌលសុខភាពនិងគ្លីនិកនានា។ តែលោករដ្ឋមន្រ្តីសុខាភិបាលបារាំងបានបញ្ជាក់ថា ការព្យួរភាគច្រើនគឺគ្រាន់តែផ្អាកជាបណ្តោះអាសន្នតែប៉ុណ្ណោះ។
បើផ្អែកលើតួលេខដែលផ្តល់ដោយមន្ទីរពេទ្យនានានៅក្នុងប្រទេសបារាំង ចំនួនបុគ្គលិកដែលត្រូវបានព្យួរពីការងារអាចខ្ពស់ជាងនេះ។ ប្រព័ន្ធមន្ទីរពេទ្យក្រុងប៉ារីស បានឲ្យដឹងកាលពីថ្ងៃព្រហស្បតិ៍ម្សិលមិញថា មានបុគ្គលិកចំនួន ៣៤០ នាក់ត្រូវបានព្យួរការងារ។ ជាមួយគ្នានេះ បើយោងតាមរបាយការណ៍របស់ទីភ្នាក់ងារព័ត៌មាន AFP មានបុគ្គលិកពេទ្យ រហូតដល់ជិត ១ ៥០០ នាក់នៅឯមន្ទីរពេទ្យជាង ១២ ត្រូវបានផ្អាកពីការងារព្រហស្បតិ៍។ ក្រៅពីនេះ នៅមានបុគ្គលិករាប់សិបនាក់ផ្សេងទៀត នៅក្នុងប្រទេសបារាំង ត្រូវបានព្យួរពីការងារនៅថ្ងៃព្រហស្បតិ៍ដដែលនេះ។
គួរបញ្ជាក់ថា បុគ្គលិកថែទាំសុខភាពរបស់បារាំងមានចំនួនប្រមាណ ២ លាន ៧ សែននាក់។ ក្នុងចំណោមនោះ មានបុគ្គលិកជាច្រើន នៅតែមិនទៅទទួលការចាក់វ៉ាក់សាំងបង្ការកូវីដនោះទេ ដោយសារពួកគេបារម្ភអំពីសុវត្ថិភាព ឬប្រសិទ្ធភាពវ៉ាក់សាំង។
កាលពីខែថ្ងៃទី១២ កក្កដាកន្លងទៅ លោកប្រធានាធិបតីបារាំងម៉ាក្រុង បានប្រកាសកំណត់ឲ្យបុគ្គលិកពេទ្យ និងអ្នកធ្វើការជាមួយក្រុមមនុស្សងាយរងគ្រោះ ត្រូវតែមានកាតព្វកិច្ចចាក់វ៉ាក់សាំងយ៉ាងហោចឲ្យបានមួយដូសនៅមុនថ្ងៃទី១៥ កញ្ញា ឆ្នាំ២០២១នេះ។ បើមិនដូច្នោះទេ ពួកនឹងប្រឈមនឹងការផ្អាកពីការងារដោយមិនទទួលបានប្រាក់ខែឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ