លោកស្រីប្រធានគណកម្មការអឺរ៉ុប ប្រកាសពីផែនការពង្រឹង « ការការពារខ្លួន » របស់សហភាពអឺរ៉ុប
នៅក្នុងសន្ទរកថា ចំពោះមុខអង្គសភាអឺរ៉ុប កាលពីថ្ងៃទី១៥កញ្ញា លោកស្រី Ursula von der Leyen ប្រធានគណកម្មការអឺរ៉ុប បានលើកឡើង អំពីផែនការយុទ្ធសាស្ត្រ ក្នុងការរៀបចំពង្រឹងការការពារខ្លួន ដោយខ្លួនឯង សម្រាប់សហភាពអឺរ៉ុប។ ជាការការពារសន្តិសុខ ដែលអឺរ៉ុបត្រូវតែប្រញ៉ាប់គិតគូរ មិនថាផ្នែកកម្លាំងកងទ័ព ឬផ្នែកសន្តិសុខព័ត៌មានវិទ្យា ដោយមិនអាចរំពឹងលើអ្នកផ្សេង បានតទៅទៀតទេ។
ចុះផ្សាយនៅថ្ងៃ៖
ស្តាប់ - ០២:៤៣
« ពេលវេលាមកដល់ហើយ ដែលអឺរ៉ុបត្រូវតែឈានបោះជំហានទៅមុខ ឲ្យបានលឿនបំផុត ដើម្បីរកវិធីការពារខ្លួន ទប់ទល់ទៅនឹងការវាយប្រហារតាមប្រព័ន្ធបច្ចេកវិទ្យាព័ត៌មានវិទ្យា និងការពារខ្លួន នៅពេលណាដែល អូតង់ ឬ អង្គការសហប្រជាជាតិ មិនអាចធ្វើប្រតិបត្តិការបាន »។ នេះគឺជាប្រសាសន៍សង្កត់ធ្ងន់ៗ របស់លោកស្រី Ursula von der Leyen ប្រធានាគណកម្មការអឺរ៉ុប នៅចំពោះមុខអង្គសភាអឺរ៉ុប ថ្ងៃទី ១៥កញ្ញា ២០២១។
លោកស្រីបានលើកឡើងថា « គឺបទពិសោធន៍ចលាចល បង្កឡើងដោយការដកទ័ពយ៉ាងតក់ក្រហល់របស់អាេមរិក ចេញពីអាហ្វហ្កានីស្ថាន ដែលបានដាស់ពញ្ញាក់ស្មារតីថ្នាក់ដឹកនាំអឺរ៉ុប ឲ្យគិតគូរអំពីការពង្រឹងសមត្ថភាពកងទ័ព ផ្ទាល់ខ្លួនសម្រាប់ប្រទេសទាំង២៧របស់អឺរ៉ុប។ យោងតាមប្រសាសន៍លោកស្រី វេទិកាកំពូលមួយ ស្តីពី « យុទ្ធសាស្ត្រការពារជាតិអឺរ៉ុប » នឹងត្រូវរៀបចំឡើងនៅរវាងឆមាសទី១ ឆ្នាំ២០២២ ដោយមានបារាំងជាអ្នកចាត់ចែង។
គួររំលឹកថា សហភាពអឺរ៉ុបមានគម្រោងបង្កើត កងកម្លាំងប្រតិបត្តិការរហ័សមួយ ដែលមានសមាសភាពទាហានចំនួន៥០០០នាក់ ដើម្បីអាចធ្វើអន្តរាគមន៍ ការពារខ្លួន ឬ ធ្វើប្រតិបត្តិការនៅក្រៅអឺរ៉ុប។ ក៏ប៉ុន្តែអស់រយៈពេលច្រើនខែមកហើយ ដែលការចរចានៅជាប់គាំង ដោយសារតែមានប្រទេសសមាជិកខ្លះ ជំទាស់។ ដោយរំលឹកអំពី កង្វះឆន្ទៈនយោបាយ ក្នុងចំណោមប្រទេសសមាជិកអឺរុប លោកស្រីប្រធានគណកម្មការអឺរ៉ុប បានឆ្លៀតនិយាយថា ទោះបីយើងមានកម្លាំងទ័ព ដែលមានសមត្ថភាពខ្ពស់បំផុតក៏ដោយ តែបើយើងមិនរៀបចំ ឲ្យកម្លាំងនោះ អាចចេញប្រតិបត្តិការនៅមូលដ្ឋានបាន នោះក៏វាមិនបានប្រយោជន៍អ្វីដែរ។
ក្រៅពីបញ្ហា ការពារខ្លួន លោកស្រីប្រធានគណកម្មការអឺរ៉ុប បានលើកឡើងផងដែរ អំពីផែនការ ពង្រឹងអធិបតេយ្យភាព ផ្នែកឧស្សាហកម្ម និងបច្ចេកវិទ្យាទំនើប របស់អឺរ៉ុប។ ដើម្បីប្រឈមនឹងការគំរាមកំហែង បង្កឡើងដោយការវាយប្រហារតាមអ៊ីនធ័រណិត លោកស្រីបញ្ជាក់ថា ប្រទេសសមាជិកត្រូវតែធ្វើការសហការគ្នា ចែករំលែកទិន្នន័យឲ្យគ្នាទៅវិញទៅមក។ ក្នុងន័យនេះ មជ្ឈមណ្ឌលអឺរ៉ុបទទួលបន្ទុកសហប្រតិបត្តិការទិន្នន័យ និងព័ត៌មានបច្ចេកវិទ្យា នឹងត្រូវបង្កើតឡើង ដើម្បីឲ្យប្រទេសសមាជិកធ្វើការរួមគ្នា។
ទាក់ទិននឹងការពង្រឹងអធិបតេយ្យភាពឧស្សាហកម្ម និងបច្ចេកវិទ្យាទំនើបនេះដែរ លោកស្រីបានលើកឡើងថា បច្ចុប្បន្ននេះ អឺរ៉ុបរំពឹងខ្លាំងណាស់ ចំពោះគ្រឿងផ្សំសំខាន់ ដូចជាឧបករណ៍ សឺមីកុងឌុចទឺរ ដែលនាំចូលពីអាស៊ី។ ដូច្នេះអឺរ៉ុប ត្រូវតែវិនិយោគ ស្រាវជ្រាវ ពង្រឹងសមត្ថភាពផលិតវាដោយខ្លួនឯង។ ពីនេះ ដល់ឆ្នាំ២០៣០ អឺរ៉ុបមានកម្មវត្ថុផលិត ឧបករណ៍ សឺមីកុងឌុចទឺរ ឲ្យបាន២០% សម្រាប់ទីផ្សារពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ