កិច្ចប្រជុំពីរបាយការណ៍អាកាសធាតុរបស់អ.ស.ប ចាប់បើកខណៈគ្រោះធម្មជាតិកើតឡើងជាបន្តបន្ទាប់
ប្រទេសសមាជិកអ.ស.ប. ចំនួនជិត ២០០ នៅថ្ងៃចន្ទ ២៦ កក្កដានេះ បើកកិច្ចប្រជុំអនឡាញ ដើម្បីអនុម័តរបាយការណ៍អាកាសធាតុមួយរបស់ក្រុមអ្នកវិទ្យាសាស្រ្ត។ ជាការគួរឲ្យកត់សម្គាល់ កិច្ចពិភាក្សានេះចាប់បើកនៅក្នុងអំឡុងពេលដែលពិភពលោកប្រឈមកាន់តែខ្លាំងទៅនឹងគ្រោះធម្មជាតិដែលកើតឡើងកាន់តែច្រើននិងសាហាវជាងមុន។
ចុះផ្សាយនៅថ្ងៃ៖
ស្តាប់ - ០២:២៤
អាកាសធាតុឡើងក្តៅខ្លាំង ទឹកជំនន់ និងគ្រោះរាំងស្ងួតដែលកើតឡើងនៅក្នុងទ្វីបចំនួន៣ រួមមានអាមេរិកខាងជើង អឺរ៉ុប និងអាស៊ីក្នុងរយៈពេលប៉ុន្មានសប្តាហ៍ថ្មីៗនេះ ស្តែងឲ្យឃើញកាន់តែច្បាស់ពីផលប៉ះពាល់បង្កដោយការកើនឡើងនៃកម្តៅផែនដី។ ហេតុផលនេះធ្វើឲ្យប្រទេសសមាជិកអ.ស.ប.ដែលជាក្រុមអន្តររដ្ឋាភិបាលធ្វើការផ្តោតលើបញ្ហាប្រែប្រួលអាកាសធាតុ (IPCC) ត្រូវវាយតម្លៃនិងអនុម័តលើរបាយការណ៍អាកាសធាតុរបស់ក្រុមអ្នកវិទ្យាសាស្ត្រឲ្យបានលឿនទាន់ពេលវេលា។
ស្ថាបនិកនិងសហការីជាន់ខ្ពស់នៃអង្គភាពថាមពលនិងអាកាសធាតុដែលមានមូលដ្ឋាននៅទីក្រុងឡុងដ៍លោក Richard Black បានមានប្រសាសនស៍ថា គ្រោះធម្មជាតិគឺជាការដាស់ស្មារតីពិភពលោកឲ្យភ្ញាក់រឭកនិងយល់កាន់តែច្បាស់ពីបញ្ហាប្រឈមដ៏ធំនេះ។
លោកបានកត់សម្គាល់ថារបាយការណ៍របស់ក្រុមអ្នកវិទ្យាសាស្ត្រខាងលើចេញតែប៉ុន្មានសប្តាហ៍ប៉ុណ្ណោះ មុនមហាសន្និបាតមួយរបស់អង្គការសហប្រជាជាតិ កិច្ចប្រជុំកំពូល G-២០ និងកិច្ចប្រជុំអាកាសធាតុ COP២៦ នៅស្កុតឡែនដ៍។
ជាការពិត ពិភពលោកកំពុងប្រឈមកាន់តែខ្លាំងនៅនឹងគ្រោះធម្មជាតិរួមមាន សីតុណ្ហភាពឡើងក្តៅខ្លាំង ទឹកជំនន់ គ្រោះរាំងស្ងួត ភ្លើងឆេះព្រៃ និងព្យុះសង្ឃរា ដែលបានកើតឡើងកាន់តែញឹកញាប់ និងកាចសាហាវខ្លាំងជាងមុន។
សេចក្តីព្រាងមួយនៃរបាយការណ៍ដែលលេចធ្លាយនិងដែលទទួលបានដោយទីភ្នាក់ងារសារព័ត៌មាន AFP បានព្រមានថា ការប្រែប្រួលអាកាសធាតុនឹងផ្លាស់ប្តូរមូលដ្ឋានគ្រឹះនៃជីវិតនៅលើផែនដីក្នុងទសវត្សរ៍ខាងមុខ បើទោះបីជាគេអាចគ្រប់គ្រងការបំពុលដោយឧស្ម័នកាបូនិកបានក៏ដោយ។ ហើយបើគ្មានការផ្លាស់ប្តូរផ្លាស់ប្តូរអ្វីជាដុំកំភួនទេនោះ មនុស្សជំនាន់ក្រោយនឹងប្រឈមនឹងបញ្ហាកាន់តែធ្ងន់ធ្ងរ។
គួរបញ្ជាក់ថាដើម្បីកម្រិតការឡើងកម្តៅនៃភពផែនដីត្រឹម ១,៥អង្សារបាន ក្រុមអ្នកវិទ្យាសាស្ត្រ បានកំណត់ថា គេចាំបាច់ត្រូវកាត់បន្ថយការបំភាយឧស្ម័នផ្ទះកញ្ចក់ឲ្យបាន ៥០% នៅត្រឹមឆ្នាំ ២០៣០ ហើយត្រូវកាត់បន្ថយការបំភាយឧស្ម័នផ្ទះកញ្ចក់ឲ្យដល់កម្រិត ០ នៅត្រឹមឆ្នាំ២០៥០។ ក៏ប៉ុន្តែ កំដៅផែនដីបច្ចុប្បន្នបានឡើងលើស ១អង្សាររួចបាត់ទៅហើយលើសសម័យបុរេឧស្សាហកម្ម។ នេះបើតាមក្រុមអ្នកជំនាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ