WHO៖កូវីដ១៩ បានសម្លាប់មនុស្សជាង ៤លាននាក់ ខណៈដែលមេរោគបំប្លែងខ្លួន "ដែលតា" កំពុងស្ទុះឡើង
អង្គការសុខភាពពិភពលោកបានប្រកាសក្នុងថ្ងៃពុធ ទី៧ កក្កដាថា កូវីដ១៩ បានសម្លាប់មនុស្សជាង ៤លាននាក់ហើយនៅទូទាំងពិភពលោក។ តាម WHO ផ្លូវឆ្ពោះទៅបិទបញ្ចប់វិបត្តិកូវីដ១៩ នៅឆ្ងាយដោយ WHO បានលើកឡើងពីសន្ទុះកំណើនករណីឆ្លងដោយមេរោគបំប្លែងខ្លួន « ដែលតា » នៅក្នុងប្រទេសជាច្រើន។ នៅក្នុងន័យនេះ WHO បានព្រមានពីការបើកប្រទេសលឿនពេកនៅក្នុងប្រទេសមួយចំនួន រួមទាំងប្រទេសដែលចាក់វ៉ាក់សាំងបានច្រើនផង។ នៅក្នុងប្រទេសបារាំង រដ្ឋាភិបាលកំពុងបារម្ភពីរលកឆ្លងលើកទី៤ និងកំពុងរិះរកវិធីសាស្រ្តដើម្បីជំរុញឲ្យពលរដ្ឋទៅចាក់វ៉ាក់សាំង។
ចុះផ្សាយនៅថ្ងៃ៖
ស្តាប់ - ០២:២១
បន្ទាប់ពីបានលើកវិធានការបិទខ្ទប់ចុងក្រោយបានជាង ២សប្តាហ៍មក បារាំងកំពុងប្រឈមនឹងសន្ទុះកំណើនឆ្លងថ្មីរហូតបង្កឲ្យមានក្តីបារម្ភពីរលកឆ្លងលើកទី៤ នៅពេលចូលបវេសនកាលនាពេលខាងមុខ ឬអាចនៅមុននេះ។ ចំនួនករណីឆ្លងថ្មីបានបន្តកើនឡើងខ្លាំងក្នុងរយៈពេល ១០ថ្ងៃចុងក្រោយនេះ។ ជាក់ស្តែងក្នុងថ្ងៃពុធ ទី៧ កក្កដា បារាំងមានករណីឆ្លងថ្មីចំនួន ៤០៨១ករណី។ បារាំងក៏ដូចជាប្រទេសមួយចំនួន មេរោគបំប្លែងខ្លួន « ដែលតា » កំពុងនាំមុខ និងគ្របដណ្តប់លើមេរោគបំប្លែងខ្លួនផ្សេងទៀត ពិសេសមេរោគបំប្លែងខ្លួន « អាល់ហ្វា »។
តាមរដ្ឋអំណាចសុខាភិបាល ប៉ារីសបានក្លាយជាទីក្រុងដែលកំពុងមានកម្រិតឆ្លងអាសន្នដោយមេរោគបំប្លែងខ្លួន « ដែលតា »។ កំណើនឆ្លងខ្ពស់នេះបានកើតមានច្រើនលើក្មេងទើបពេញវ័យ។ គ្រាន់តែក្នុងមួយសប្តាហ៍ ករណីឆ្លងថ្មីបានកើនទ្វេដងលើក្មេងទើបពេញវ័យមានអាយុចន្លោះ ២០ឆ្នាំ និង ២៩ឆ្នាំ។ ដើម្បីប្រឈមនឹងសន្ទុះកំណើនករណីឆ្លងដោយ « ដែលតា » ពេលនេះ រដ្ឋាភិបាលកំពុងបង្កើនការអំពាវនាវឲ្យមានការចាក់វ៉ាក់សាំង។ បន្ទាប់ពីមានការធ្លាក់ចុះចំនួនពីរសប្តាហ៍មក ចំនួននៃការណាត់ជួបចាក់វ៉ាក់សាំងបានចាប់ផ្តើមកើនឡើងវិញ។
តែក្នុងពេលជាមួយគ្នា រដ្ឋាភិបាលកំពុងរិះរកវិធីសាស្រ្តដើម្បីជំរុញអ្នកដែលនៅបន្តរារែក អល់អែកក្នុងការចាក់វ៉ាក់សាំង។ ទន្ទឹមនឹងចង់ឲ្យការចាក់វ៉ាក់សាំងជាកតាព្វកិច្ចសម្រាប់ក្រុមបុគ្គលិកពេទ្យ មានវិធីសាស្រ្តផ្សេងទៀតត្រូវបានរដ្ឋាភិបាលពិចារណាដើម្បីបង្ខំអ្នកដែលមិនចង់ចាក់វ៉ាក់សាំង។ វិធីសាស្រ្តទាំងនោះរួមមាន ត្រូវបង់លុយធ្វើតេស្តិ៍រកកូវីដដោយខ្លួនឯង ចូលភោជនីយដ្ឋាន ឬសារៈមន្ទីរត្រូវបង្ហាញលិខិតបញ្ជាក់ចាក់វ៉ាក់សាំង ឬមួយក៏ធ្វើដូចនៅអាមេរិកដោយរៀបចំឲ្យមានល្បែងឆ្នោតសម្រាប់អ្នកសុខចិត្តចាក់វ៉ាក់សាំងជាដើម។
យ៉ាងណាក៏ដោយ រដ្ឋាភិបាលចង់សម្រេចការងារទាំងនេះឲ្យបានលឿនដើម្បីបញ្ជៀសរលកឆ្លងទី៤ ដោយមេរោគបំប្លែងខ្លួន « ដែលតា »។ វិធានការថ្មីៗអាចនឹងអនុម័តនៅថ្ងៃអង្គារ ទី១៣ កក្កដាសប្តាហ៍ក្រោយនាកិច្ចប្រជុំគណៈរដ្ឋមន្រ្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ