សហភាពអឺរ៉ុប៖ប្រទេសសមាជិកនិយាយមិនចុះសម្រុងគ្នាជុំវិញទំនាក់ទំនងជាមួយរុស្ស៊ី និងរឿងរ៉ាវជាមួយហុងគ្រី
ថ្ងៃសុក្រ ទី២៥ មិថុនាជាថ្ងៃទី២ នៃជំនួបកំពូលសហភាពអឺរ៉ុបរៀបចំនៅក្នុងទីគ្រុងព្រុចសែល ប្រទេសបែលហ្ស៊ិក។ ជំនួបកំពូលថ្ងៃទី២ នេះផ្តោតសំខាន់លើប្រធានបទសេដ្ឋកិច្ច។ ចំណែកនៅក្នុងជំនួបកំពូលនាថ្ងៃព្រហស្បតិ៍ ទី២៤ មិថុនា សមាជិកទាំង ២៧ ប្រទេសបានជជែកគ្នាលើប្រធានបទអន្តោប្រវេសន៍ វិបត្តិជំងឺកូវី១៩ និងទំនាក់ទំនងអន្តរជាតិ។ តែមានប្រធានបទចំនួនពីរដែលមិនបានចែងនៅក្នុងរបៀបវារៈនៃជំនួបកំពូល និងដែលបានបង្កឲ្យមានការបែកបាក់ផ្ទៃក្នុងពេលនេះ។ ប្រធានបទទី១ទាក់ទងជាមួយប្រទេសរុស្ស៊ី និងប្រធានបទទី២ ទាក់ទងនឹងច្បាប់ស្តីពីផ្លូវភេទរបស់ប្រទេសហុងគ្រីដែលជាសមាជិកមួយរបស់សហភាពអឺរ៉ុប។
ចុះផ្សាយនៅថ្ងៃ៖
ស្តាប់
ប្រធានបទទាក់ទងជាមួយនឹងប្រទេសរុស្ស៊ីដែលគេចង់និយាយនេះ គឺការចង់ផ្តល់សន្ទុះឡើងវិញនូវទំនាក់ទំនងរវាងសហភាពអឺរ៉ុប និងប្រទេសរុស្ស៊ីតាមរយៈការបើកឲ្យមានកិច្ចសន្ទនាផ្ទាល់ជាមួយប្រធានាធិបតីរុស្ស៊ីលោកពូទីន។ គំនិតនេះមិនមែនជាគំនិតរួមរបស់ប្រទេសសមាជិកអឺរ៉ុបទេ តែជាគំនិតដែលបានស្នើឡើងរួមគ្នាដោយនាយករដ្ឋមន្រ្តីអាល្លឺម៉ង់លោកស្រីអង់ហ្កេឡា មែរកិល និងប្រធានាធិបតីបារាំងលោកអេម៉ានុយអែល ម៉ាក្រុង។ លោកស្រីមែរកិល និងលោកម៉ាក្រុងមិនបានបញ្ជាក់ពីរូបភាព និងទ្រង់ទ្រាយនៃកិច្ចសន្ទនារវាងសហភាពអឺរ៉ុប និងលោកពូទីនជាយថាហេតុទេ។ តែគេអាចនិយាយបានថា អាចជាជំនួបថ្នាក់ប្រមុខរដ្ឋច្រើននាក់ ឬជាជំនួបកំពូលដូចនៅមុនឆ្នាំ ២០១៤ ជាមួយថ្នាក់ដឹកនាំរបស់ស្ថាប័នអឺរ៉ុប។
សំណើរបស់លោកស្រីមែរកិល និងលោកម៉ាក្រុងត្រូវបានប្រទេសសមាជិកជជែកគ្នារហូតដល់យប់ជ្រៅក្នុងថ្ងៃព្រហស្បតិ៍ ទី២៤ មិថុនា និងទីបំផុតនិយាយមិនចុះសម្រុងគ្នា។ ប្រទេសសមាជិកជាច្រើនបានយល់ឃើញថា ការមានជំនួបណាមួយជាមួយប្រធានាធិបតីរុស្ស៊ីលោកពូទីនជារឿងឆាប់រហ័សពេក។ តែមានចំណុចមួយដែលប្រទេសសមាជិកសហភាពអឺរ៉ុបបានទទួលស្គាល់ និងយល់ឃើញដូចគ្នានោះគឺថា ទំនាក់ទនងរវាងសហភាពអឺរ៉ុប និងប្រទេសរុស្ស៊ីកំពុងមានកម្រិតទាបបំផុត។ ក្រៅពីនិយាយមិនចុះសម្រុងគ្នាលើប្រធានបទជាមួយប្រទេសរុស្ស៊ី សហភាពអឺរ៉ុបក៏កំពុងបន្តឈឺក្បាលនឹងហុងគ្រីដែលជាប្រទេសសមាជិកម្នាក់។
ឈឺក្បាលនឹងហុងគ្រីដែលទើបអនុម័តច្បាប់មួយដោយបានកំណត់ពីការហាមមិនឲ្យមនុស្សវ័យក្រោម១៨ឆ្នាំអាចមើលឃើញ ឬទទួលបាននូវការផ្សព្វផ្សាយរូបភាពគ្រប់ទំរង់ទាំងអស់ រាប់ទាំងរូបភាព និងវីដេអូអាសអាភាសដែលបង្ហាញពីមនុស្សស្រលាញ់ភេទដូចគ្នា ឬអ្នកកែភេទ។ ក្រៅពីប្រទេសប៉ូឡូញដែលបានគាំទ្រហុងគ្រី ប្រទេសសមាជិកផ្សេងទៀតបានបរិហារ និងថ្កោលទោសលើច្បាប់មួយនេះរបស់ហុងគ្រីដោយពួកគេចាត់ទុកជាច្បាប់ដែលផ្ទុយនឹងគុណតម្លៃរបស់សហភាពអឺរ៉ុប។ ប្រធានគណៈកម្មការអឺរ៉ុបបានចាត់ទុកច្បាប់ហុងគ្រីនេះជាច្បាប់គួរឲ្យខ្មាស់អៀន ហើយនាយករដ្ឋមន្រ្តីអាល្លឺម៉ង់ចាត់ទុកជាច្បាប់ដ៏អាក្រក់។
ចំណែកនាយករដ្ឋមន្រ្តីហូឡង់បានយល់ឃើញថាជាមួយនឹងច្បាប់នេះ ហុងគ្រីគ្មានកន្លែងនៅក្នុងសហភាពអឺរ៉ុបទេ។ តែនាយករដ្ឋមន្រ្តីហុងគ្រីលោកវ៉ិចទ័រ អកបានឆ្លើយបកវិញថា ច្បាប់របស់លោកមិនបានវាយប្រហារលើអ្នកស្រឡាញ់ភេទដូចគ្នា និងបានតាំងខ្លួនលោកជាអ្នកការពារសិទ្ធិរបស់អ្នកស្រឡាញ់ភេទដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ