សភាអឺរ៉ុបអនុម័តច្បាប់ថ្មីស្តីពីអាកាសធាតុដោយកាត់បន្ថយឧស្ម័នផ្ទះកញ្ចក់ឲ្យបានយ៉ាងតិច ៥៥% នៅឆ្នាំ ២០៣០
នៅក្នុងសម័យប្រជុំវិសាមញ្ញនាថ្ងៃព្រហស្បតិ៍ ទី២៤ មិថុនាក្នុងទីក្រុងព្រុចសែល ប្រទេសបែលហ្ស៊ិក សភាអឺរ៉ុបបានអនុម័តលើច្បាប់ថ្មីស្តីពីការកាត់បន្ថយឧស្ម័នផ្ទះកញ្ចក់។ ជាមួយនឹងច្បាប់ថ្មី អឺរ៉ុបបានប្តេជ្ញាកាត់បន្ថយឧស្ម័នផ្ទះកញ្ចក់ឲ្យបានយ៉ាងតិច ៥៥% ពីពេលនេះទៅដល់ឆ្នាំ ២០៣០។ គួររម្លឹកថានៅក្នុងច្បាប់ចាស់សព្វថ្ងៃ កម្មវត្ថុនៃការកាត់បន្ថយឧស្ម័នផ្ទះកញ្ចក់មានត្រឹម ៤០% ប៉ុណ្ណោះ។ ទោះជាយ៉ាងនេះក្តី សមាជិកសភាអឺរ៉ុបមកពីគណបក្សបរិស្ថានបារាំងលោកស្រីការ៉ូលីន រ៉ូសយល់ឃើញថា ច្បាប់ថ្មីនេះនៅមិនទាន់គ្រប់គ្រាន់នៅឡើយទេ។
ចុះផ្សាយនៅថ្ងៃ៖
ស្តាប់ - ០២:១៩
ច្បាប់ថ្មីស្តីពីអាកាសធាតុដែលសភាអឺរ៉ុបទើបអនុម័តទទួលបានការគាំទ្រចំនួន ៤៤២សំឡេង សំឡេងប្រឆាំងចំនួន ២០៣សំឡេង និងមាន ៥១អនុបវាទ។ សមាជិកសភាអឺរ៉ុបដែលបានគាំទ្រលើច្បាប់ថ្មីនេះមានក្រុមអ្នកស្តាំនិយម អ្នកសង្គមនិយមភាគច្រើន និងក្រុមមកពីគ្រុប Renew។ ចំណែកអ្នកប្រឆាំង គឺក្រុមឆ្វេងនិយមជ្រុល ស្តាំនិយមជ្រុល និងក្រុមអ្នកបរិស្ថាន។ ក្រុមអ្នកតំណាងរាស្រ្តអឺរ៉ុបបៃតងយល់ឃើញថា កម្មវត្ថុថ្មីដែលមានចែងនៅក្នុងច្បាប់ថ្មីស្តីពីអាកាសនឹងកម្រិតការឡើងកម្តៅនៅក្នុងបរិយាកាសពី ២ ទៅ ៣ អង្សារធៀបនឹងសម័យមុនឧស្សាហកម្ម។ សម្រាប់ពួកគេ ច្បាប់ថ្មីនេះនៅមិនទាន់គ្រប់គ្រាន់ទេ។
តាមក្រុមអ្នកតំណាងរាស្រ្តអឺរ៉ុបបៃតងដដែល នៅប៉ុន្មានឆ្នាំខាងមុខ មានមនុស្សចំនួន ៤២០លាននាក់នឹងប្រឈមនឹងរលកកម្តៅបណ្តាលឲ្យស្លាប់ដូចក្នុងឆ្នាំ ២០១៨។ លោកស្រីការ៉ូលីន រ៉ូស សមាជិកសភាអឺរ៉ុបមកពីគណបក្សបរិស្ថានបារាំងបានសម្តែងការសោកស្តាយថា កិច្ចខិតខំប្រឹងប្រែងពិតប្រាកដនៅមានកម្រិតទាបនៅឡើយ។ « ក្រុមអ្នកវិទ្យាសាស្រ្តនិយាយប្រាប់យើងថា គេត្រូវកាត់បន្ថយឧស្ម័នផ្ទះកញ្ចក់ឲ្យបានយ៉ាងតិច ៦៥% ពីពេលនេះទៅដល់ឆ្នាំ ២០៣០ ទើបគេអាចសម្រេចតាមកម្មវត្ថុរបស់កិច្ចព្រមព្រៀងក្រុងប៉ារីសស្តីពីអាកាសធាតុបាន » នេះជាការរម្លឹករបស់លោកស្រីការ៉ូលីន។
សមាជិកសភាអឺរ៉ុបមកពីគណបក្សបរិស្ថានបារាំងរូបនេះដដែលបានព្រមានថា បើគ្មានការប្រឹងប្រែងបន្ថែមដូចដែលកិច្ចព្រមព្រៀងក្រុងប៉ារីសស្តីពីអាកាសធាតុបានចែងទេ ពិភពលោកនឹងស្គាល់គ្រោះទឹកជំនន់កាន់តែច្រើន គ្រោះរាំងស្ងួត អសន្តិសុខស្បៀងអាហារ និងការបាត់បង់ជីវិតមនុស្ស។ តែឧត្តមស្នងការអឺរ៉ុបទទួលបន្ទុកសកម្មភាពអាកាសធាតុលោក Frans Timmermans បានព្យាយាមពន្យល់ថា ការប្រឹងប្រែងរបស់អឺរ៉ុបពេលនេះមិនមែនជាលើកចុងក្រោយទេ តែគ្រាន់ជាការចាប់ផ្តើមដំបូង។ យ៉ាងណាក៏ដោយ គណៈកម្មការអឺរ៉ុបនឹងប្រែក្លាយកម្មវត្ថុថ្មីដែលមានលក្ខណៈបង្ខិតបង្ខំទៅជាសំណើច្បាស់លាស់តាមរយៈកំណែទម្រង់មួយចំនួនដែលនឹងលាតត្រដាងនៅថ្ងៃទី១៤ កក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ