ក្រោយពីតានតឹងនឹងគ្នាជាច្រើនខែ ប្រធានាធិបតីបារាំងនិងតួកគីជួបគ្នាមួយទល់មួយ
នៅថ្ងៃចន្ទទី ១៤មិថុនា២០២១ ក្នុងឱកាសនៃជំនួបកំពូលអូតង់ ប្រធានាធិបតីបារាំង លោក អេម៉ានុយអែល ម៉ាក្រុង និងសមភាគីតួកគី លោក អ៊ែរដូហ្កាន បានឆ្លៀតជួបពិភាក្សាគ្នា ដើម្បីបំភ្លឺជំហររៀងខ្លួនៗ ជុំវិញប្រធានបទមួយចំនួនធំដែលតួកគីនិងបារាំងតានតឹងដាក់គ្នាអស់ជាច្រើនខែកន្លងមកនេះ។ ក្នុងជំនួបមួយទល់មួយ នៅទីក្រុងព្រុចសែល ប្រទេសប៊ែលហ្សិក ប្រមុខដឹកនាំទាំងពីរបានបង្ហាញឆន្ទៈដោះស្រាយ សំណុំរឿងស៊ីរី និងលីប៊ី រួមគ្នា។ នេះបើតាមប្រភពវិមានប្រធានាធិបតីបារាំង។
ចុះផ្សាយនៅថ្ងៃ៖
ស្តាប់ - ០២:២៨
ជំនួបទល់មុខគ្នា មួយទល់នឹងមួយ ប្រព្រឹត្តទៅអស់រយៈពេល៤៥នាទី ពោលគឺយូរជាងការគ្រោងទុកទៅទៀត ដើម្បីអាចជជែកគ្នាដោយត្រង់ៗលើគ្រប់ប្រធានបទដែល បារាំងនិងតួកគីខ្វែងគំនិតគ្នា ឬជាប្រភពនាំឱ្យប្រទេសទាំងពីរខឹងគ្នា។ តាំងពីពីរឆ្នាំមកនេះ បារាំងនិងតួកគីមានទំនាក់ទំនងរអាក់រអួលនឹងគ្នាខ្លាំង និងមើលមុខគ្នាស្ទើរមិនចំ កាន់តែខ្លាំងឡើងៗ ដោយមូលហេតុច្រើនយ៉ាងរាប់តាំងពីសំណុំរឿងសាសនា បែបទ្វេភាគី ដល់សំណុំរឿងអន្តរជាតិ នៅសមុទ្ទមេឌីទែរ៉ាណេ លីប៊ី ឬ ស៊ីរី ។ល។ និង។ល។
ជាសមាជិកអូតង់ដូចគ្នា តែបារាំងបានគាំទ្រក្រិក ប្រឆាំងនឹងមហិច្ឆតារុករកប្រេង-ឧស្ម័នធម្មជាតិក្រោមសមុទ្ទមេឌីទែរ៉ាណេរបស់តួកគី ដល់ថ្នាក់មានឧប្បត្តិហេតុប៉ះទង្គិចគ្នារវាងនាវាយោធាបារាំងនិងយោធាតួកគីផង កាលពីខែមិថុនា២០២០។ បន្ទាប់មកវិបត្តិនៅស៊ីរី លីប៊ី ព្រមទាំងជម្លោះរវាងអាស៊ែបៃហ្សង់ និងអាមេនី បានមករុញច្រានទំនាក់ទំនងបារាំងនិងតួកគីឱ្យធ្លាក់ដុនដាបមួយកំរិតទៀត។ នៅខែតុលា២០២០ ប្រធានាធិបតីតួកគី លោក អ៊ែរដូហ្កានបានចោទប្រកាន់ប្រធានាធិបតីបារាំងថាមានវិបត្តិខួរក្បាល ដោយដឹកនាំធ្វើយុទ្ធនាការបែបស្អប់ខ្ពើមអ៊ីស្លាមនៅក្នុងប្រទេសបារាំង ក្រោយពីលោកម៉ាក្រុងបានថ្លែងការពារសេរីភាពនៃការបញ្ចេញមតិ គូរគំនូរថ្លុករូបព្រះមហាម៉េដនៃសាសនាអ៊ីស្លាម។
ប៉ុន្តែ នៅក្នុងជំនួបដ៏សំខាន់និងប្រកបដោយអត្ថប្រយោជន៍ នាថ្ងៃចន្ទទី ១៤មិថុនានេះ ប្រធានាធិបតីទាំងពីរបានព្រមព្រៀងគ្នា ដោះស្រាយវិបត្តិស៊ីរីនិងលីប៊ី ជាមួយគ្នា និងជាពិសេសគឺបារាំងបានបំភ្លឺអំពីជំហររបស់ខ្លួន ចំពោះសាសនាអ៊ីស្លាម។ លោកម៉ាក្រុង បានរំលឹកសមភាគីជាសម្ព័ន្ធមិត្តយុទ្ធសាស្ត្រ អំពីតម្លៃ អំពីគោលការណ៍ នៃរបបសាធារណរដ្ឋ និងអំពីច្បាប់ ក្នុងរង្វង់ចលនាអូតង់។ បារាំងគោរពអ៊ីស្លាម និងអ្នកកាន់សាសនាអ៊ីស្លាម ដូច្នេះគ្រប់គ្នាត្រូវគោរពតម្លៃនៃរបបសាធារណរដ្ឋវិញ និងមិនត្រូវយកសាធារណរដ្ឋមកធ្វើជាឧបករណ៍ទេ។ ប្រធានាធិបតីបារាំងបានថែមទាំងបរិហារសំដីរបស់ប្រធានាធិបតីតួកគី កាលពីខែតុលាថាមិនអាចទទួលយកបានឡើយ។
កាន់តែឯកាលើឆាកអន្តរជាតិ នៅថ្ងៃបើកជំនួបកំពូលអូតង់នេះ លោកអ៊ែរដូហ្កាន បានបង្កើនជំនួបជាមួយប្រមុខរដ្ឋ-រដ្ឋាភិបាលនៃប្រទេសជាសមាជិកអង្គការអូតង់ជាច្រើនផ្សេងទៀត។ ក្រៅពីជាមួយប្រធានាធិបតីបារាំង ជំនួបដែលស្មុគស្មាញខ្លាំងជាងគេទំនងជាជំនួបជាមួយប្រធានាធិបតីអាមេរិក ចូបៃដិន។ លោក ចូបៃដិន បានប្រកាសជំហរតឹងតែងខ្លាំងដាក់តួកគី ដោយធ្លាប់បានចាត់ទុកលោក អ៊ែរដូហ្កានជាមេដឹកនាំអត្តាធិបតេយ្យ (ផ្តាច់ការ)ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ