OCDE ព្យាករណ៍ពីសន្ទុះកំណើនសេដ្ឋកិច្ចសកលសម្រាប់ឆ្នាំ ២០២១ និង ២០២២ តែបារម្ភពីការដំាក្បាលចុះជាថ្មី
នៅថ្ងៃចន្ទ ទី៣១ ឧសភា អង្គការនៃកិច្ចសប្រតិបត្តិការ និងអភិវឌ្ឍន៍សេដ្ឋកិច្ចហៅកាត់ជាភាសាបារាំង OCDE បានចេញផ្សាយរបាយការណ៍មួយស្តីពីស្ថានភាពសេដ្ឋកិច្ចពិភពលោកសម្រាប់ឆ្នាំ ២០២១ និង ២០២២។ នៅក្នុងរបាយការណ៍ OCDE បានព្យាការណ៍ពីសន្ទុះកំណើនសេដ្ឋកិច្ចក្នុងឆ្នាំ ២០២១ ចំនួន ៥,៨% និងឆ្នាំ ២០២២ ខាងមុខចំនួន ៤,៤%។ តែក្នុងពេលជាមួយគ្នា OCDE ក៏បានព្រមានពីហានិភ័យនៃការធ្លាក់ចុះជាថ្មីដោយសារតែភាពយឺតយ៉ាវក្នុងការចាក់វ៉ាក៉សាំងបង្ការកូវីដ១៩ ពិសេសនៅក្នុងបណ្តាប្រទេសក្រីក្រ។
ចុះផ្សាយនៅថ្ងៃ៖
ស្តាប់ - ០២:៥២
បន្ទាប់ពីមានអត្រាអវិជ្ជមាន ៣,៥% ក្រោមសូន្យក្នុងឆ្នាំ ២០២០ កំណើនសេដ្ឋកិច្ចពិភពលោកក្នុងឆ្នាំ ២០២១ មានអត្រា ៥,៨% ដែលជាអត្រាមួយដ៏ខ្ពស់គិតតាំងពីឆ្នាំ ១៩៧៣ នេះជាការបញ្ជាក់របស់លោកស្រីឡូរ៉ង់ ប៊ូន ប្រធានសេដ្ឋវិទូនៃអង្គការ OCDE នៅក្នុងសន្និសីទកាសែតនាថ្ងៃចន្ទ ទី៣១ ឧសភា។ តែលោកស្រីមិនភ្លេចបញ្ជាក់ដោយធានាថា អត្រាកំណើនសេដ្ឋកិច្ចក្នុងឆ្នាំ ២០២១ អាចនឹងមានច្រើនជាងនេះ ប្រសិនបើមានការពន្លឿនយុទ្ធនាការចាក់វ៉ាក់សាំង និងប្រជាជនបានចាយលុយដែលពួកបានសន្សំទុកក្នុងពេលបិទខ្ទប់ប្រទេស។ កំណើនសេដ្ឋកិច្ចសម្រាប់ឆ្នាំ ២០២២ ខាងមុខត្រូវបានអង្គការ OCDE ព្យាករណ៍ថា មានអត្រា ៤,៤% ពោលលើសពីការព្យាករណ៍ក្នុងខែមីនាកន្លងទៅដែលមានត្រឹម ៤%។
ប្រធានសេដ្ឋវិទូនៃអង្គការ OCDE រូបនេះដដែលបានបន្ថែមថា គិតមកទល់បច្ចុប្បន្ន មានវ៉ាក់សាំងបង្ការកូវីដ១៩ ជិត ២ ០០០លានដូសត្រូវបានប្រើនៅទូទាំងពិភពលោក និងថា មិនធ្លាប់ឃើញមានទេនៅក្នុងវិបត្តិកន្លងមកដែលរដ្ឋាភិបាលបានចាត់វិធានការយ៉ាងលឿន និងប្រកបដោយប្រសិទ្ធិភាពសម្រាប់វិបត្តិកូវីដ១៩ ទោះក្នុងផ្នែកសុខភាព ការអភិវឌ្ឍន៍វ៉ាក់សាំង ផែនការរូបិយវត្ថុ ថវិកា ឬមួយក៏ផែនការហិរញ្ញវត្ថុ។ តាមការព្យាករណ៍របស់អង្គការ OCDE មានតែចិន និងអាមេរិកដែលបានរកឃើញឡើងវិញនូវអត្រាកំណើនសេដ្ឋកិច្ចដូចមុនផ្ទុះវិបត្តិកូវីដ១៩ សម្រាប់ឆ្នាំ ២០២១ គឺ ៨,៥% សម្រាប់ចិន និង ៦,៩% សម្រាប់អាមេរិក។
ដោយឡែក បារាំងអាចមានអត្រាកំណើនសេដ្ឋកិច្ចចំនួន ៥,៨% អាល្លឺម៉ង់មាន ៣,៣% ហើយជប៉ុនអាចមានត្រឹម ២,៦% ប៉ុណ្ណោះ។ គម្លាតខ្លាំងនៃការទទួលបានអត្រាកំណើនសេដ្ឋកិច្ចនេះត្រូវបានអគ្គនាយកអង្គការ OCDE លោក Angel Gurria យល់ឃើញថា ជាលទ្ធផលបានមកពីការមិនសូវមានកិច្ចសហប្រតិបត្តិជាលក្ខណៈអន្តរជាតិ។ យ៉ាងណាក៏ដោយ អង្គការ OCDE មិនភ្លេចព្រមានពីហានិភ័យនៃការធ្លាក់ចុះជាថ្មីដោយសារតែភាពយឺតយ៉ាវក្នុងការចាក់វ៉ាក៉សាំង ពិសេសនៅក្នុងបណ្តាប្រទេសក្រីក្រ។ លោកស្រីឡូរ៉ង់ ប៊ូនបានបញ្ជាក់ច្បាស់ៗថា ដរាបនៅមានប្រជាជនភាគច្រើនក្នុងលោកមិនទាន់បានចាក់វ៉ាក់សាំងទេ ដរាបនោះគេនឹងបន្តប្រឈមនឹងការលេចចេញនូវវីរុសកូវីដ១៩ បំប្លែងខ្លួនថ្មីៗជាបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ