ក្រុមជំនាញឯករាជ្យអង្គការសុខភាពពិភពលោកថា វិបត្តិកូវីដគួរតែអាចបញ្ចៀសបាន
ជំងឺរាតត្បាតកូវីដ១៩ បានសម្លាប់ជីវិតមនុស្សអស់ជាង៣លាន៣សែននាក់ និងចម្លងលើមនុស្សជាង១៦០លាននាក់ ព្រមទាំងបានធ្វើឱ្យសេដ្ឋកិច្ចពិភពលោកក្រាបស្ទើរដល់ដី ប៉ុន្តែវិបត្តិនេះគួរតែអាចបញ្ចៀសបាន។ នេះបើតាមរបាយការណ៍របស់ក្រុមអ្នកជំនាញឯករាជ្យ អង្គការសុខភាពពិភពលោកចេញផ្សាយនៅថ្ងៃពុធទី ១២ឧសភា២០២១ ដោយអំពាវនាវឱ្យពិភពលោកធ្វើកំណែទម្រង់ប្រព័ន្ធសុខាភិបាលអន្តរជាតិ។ ក្រុមអ្នកជំនាញបានព្រមាន ប្រសិនបើយើងមិនធ្វើអីសោះនៅពេលនេះ យើងមិនអាចការពារខ្លួនពីជំងឺរាតត្បាតសកលក្រោយៗទៀតបានឡើយ។
ចុះផ្សាយនៅថ្ងៃ៖
ស្តាប់ - ០២:១៦
ធ្វើសេចក្តីសម្រេចមិនត្រឹមត្រូវ ខ្វះឆន្ទៈ និងគ្មានប្រព័ន្ធសម្របសម្រួលការងាររវាងប្រទេសមួយទៅប្រទេសមួយ គឺជាធាតុផ្សំនៃបរាជ័យនាំកើតមានវិបត្តិរាតត្បាតសកល និងមហន្តរាយមនុស្សជាតិនាពេលនេះ និងជាមូលហេតុរារាំងមិនឱ្យពិភពលោកអាចប្រយុទ្ធប្រឆាំងប្រកបដោយប្រសិទ្ធភាពទល់នឹងជំងឺកូវីដ១៩បាន។ នេះបើតាមរបាយការណ៍របស់ក្រុមអ្នកការងារឯករាជ្យដែលបង្កើតឡើងដោយអង្គការសុខភាពពិភពលោក ដើម្បីរៀបចំនិងផ្តល់ចម្លើយតបទៅនឹងជំងឺរាតត្បាត។
មានសមាជិក១៣រូបជាឥស្សរជននិងអ្នកជំនាញ ក្រុមអ្នកការងារឯករាជ្យដែលបានចំណាយពេលសិក្សាអស់៨ខែ វិភាគឃើញថា ស្ថានភាពបច្ចុប្បន្ននេះ គួរតែអាចបញ្ចៀសបាន ប៉ុន្តែមិនមែនជាកំហុសរបស់បុគ្គលណាតែម្នាក់ឬប្រទេសជាតិណាមួយតែមួយទេ។ គ្រប់ភាគីសុទ្ធតែមានចំណែកខុស ៖ ចិនដែលជាប់ចោទថាចង់លាក់ ក្រជូនដំណឹង ឯរដ្ឋាភិបាលប្រទេសផ្សេងៗទៀតក្របញ្ចេញសកម្មភាព។ សហប្រធានក្រុមអ្នកជំនាញ លោកស្រី Helen Clark អតីតនាយករដ្ឋមន្ត្រីប្រទេសនូវែលហ្សេឡង់ ក៏សោកស្តាយចំពោះជម្រើសរបស់អង្គការសុខភាពពិភពលោកដែរ ដែលក្រប្រកាសអាសន្នមានជំងឺរាតត្បាតសកល និងមិនផ្តល់អនុសាសន៍ច្បាស់លាស់ និងដាច់ខាត ទាក់ទងនឹងការធ្វើដំណើរ ឬការពាក់ម៉ាស។ បើតាមសេចក្តីសន្និដ្ឋានក្នុងរបាយការណ៍ ភាពយឺតយ៉ាវ ស្ទាក់ស្ទើរ និងការធ្វើមិនដឹង បានទុកពេល១ខែឱ្យជំងឺបានឱកាសសាយភាយរាតត្បាត។
ដូច្នេះរដ្ឋាភិបាលនិងសហគមន៍អន្តរជាតិត្រូវតែធ្វើកំណែទម្រង់ ស៊ីជម្រៅ ប្រព័ន្ធសុខភាពពិភពលោក ឱ្យមានលក្ខណៈត្រៀមជាស្រេចនឹងប្រកាសអាសន្ន ហើយអាចបញ្ចេញសកម្មភាពតបទៅនឹងជំងឺរាតត្បាតភ្លាម បើមិនចង់ជួបវិបត្តិដូចយ៉ាងកូវីដ១៩ទៀត។ ក្រុមអ្នកជំនាញបានផ្តល់តម្រុយអនុសាសន៍ជាច្រើន ដូចជាអំពាវនាវឱ្យប្រទេសអ្នកមាន និងមន្ទីរពិសោធន៍ឱសថ ព្រមផ្តល់ការអនុញ្ញាត ឱ្យប្រទេសផ្សេងៗជួយផលិតវ៉ាក់សាំង និងស្នើឱ្យអង្គការសុខភាពពិភពលោក បង្កើតក្រុមអធិការកិច្ចអង្គការសុខភាពពិភពលោក ដែលអាចចុះ ជាស្វ័យប្រវត្តិ ទៅកន្លែងកើតហេតុ និងបង្កើតក្រុមប្រឹក្សាពិភពលោកប្រយុទ្ធប្រឆាំងនឹងរោគរាតត្បាតដូចមាននៅក្រុមប្រឹក្សាសន្តិសុខអង្គការសហប្រជាជាតិ មានសមត្ថភាពអាចផ្តល់ព័ត៌មានភ្លាមដោយមិនរង់ចាំការយល់ព្រមពីប្រទេសជាសមាជិក និងមានតម្លាភាព និងគ្មានពណ៌សម្បុរនយោបាយ។ កំណែទម្រង់ដែលទំនងជានឹងត្រូវលើកមកនិយាយច្រើនក្នុងមហាសន្និបាតរបស់អង្គការសុខភាពពិភពលោក នៅចុងខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ