ក្រុមទាហានបារាំង ចេញលិខិតអនាមិកជាលើកទី២ ថាបារាំងកំពុងប្រឈមនឹង «សង្រ្គាមស៊ីវីល»
ថ្ងៃចន្ទទី១០ឧសភា សារព័ត៌មានបារាំងមួយ បានចុះផ្សាយលិខិតអនាមិកមួយច្បាប់ទៀត របស់នាយទាហានបារាំង។ ក្រុមទាហានបារាំងដែលសរសេរលិខិតនេះ បានលើកឡើងថា ប្រទេសបារាំងកំពុងតែប្រឈមនឹង « សង្គ្រាមស៊ីវីល » និងបានអំពាវនាវឲ្យគ្រប់គ្នាចូលរួម ដើម្បីសង្គ្រោះប្រទេសបារាំង។ គួរកត់សំគាល់ថា នេះគឺជាលើកទី២ហើយ ដែលមានលិខិតអនាមិករបៀបនេះ ធ្វើដោយតទាហានបារាំង។ រដ្ឋាភិបាលបារាំង និងអ្នកនយោបាយឆ្វេងនិយម បានបរិហារថាលិខិតនេះ គឺជាឧបករណ៍នយោបាយប្រជាភិថុត របស់គណបក្សស្តាំនិយមជ្រុល ហើយថានាយទាហានដែលសរសេរលិខិតនេះ បានធ្វើខុសនឹងបទវិន័យ នៃការប្រកាន់អាព្យាក្រិត្យភាព។
ចុះផ្សាយនៅថ្ងៃ៖
ស្តាប់ - ០២:៣៨
លិខិតអនាមិកមួយច្បាប់ សរសេរដោយជនមួយក្រុម អះអាងថាខ្លួនជានាយទាហាន ក្នុងជួរកងទ័ពបារាំង ត្រូវបានសារព័ត៌មានអភិរក្សនិយម Valeurs Actuelles ចុះផ្សាយនៅថ្ងៃចន្ទទី១០ឧសភា។ លិខិតនេះ មានសរសេរលើកឡើងជាអាទិ៍ថា « ប្រទេសបារាំងកំពុងតែប្រឈមនឹងសង្គ្រាមស៊ីវីល ដោយសារតែអំពើហិង្សា កំហឹងស្អប់ប្រទេសបារាំង ស្អប់វប្បធម៌ និងប្រវត្តិសាស្ត្របារាំង បានផុសផុលឡើងកាន់តែខ្លាំង។ បើសិនជាសង្រ្គាមស៊ីវីលផ្ទុះឡើងពិតមែន កងទ័ព និងចេញមុខប្រយុទ្ធដើម្បីសង្គ្រោះប្រទេសជាតិ »។
គួរកត់សំគាល់ថា នេះគឺជាលើកទី២ហើយ ដែលមានលិខិតអនាមិករបៀបនេះ ចេញផ្សាយដោយក្រុមនាយទាហានបារាំង។ លិខិតទីមួយ បានចេញផ្សាយនៅថ្ងៃទី២១មេសា ចុះហត្ថលេខាដោយ ឧត្តមសេនីយ៍បារាំងជាង២០នាក់ ភាគច្រើនចូលនិវត្តន៍ និងនាយទាហានស័ក្តិ៍ធំៗជាង១០០០នាក់ទៀត។ លិខិតទីមួយនេះ បានហៅឲ្យលោកម៉ាក្រុង ប្រធានាធិបតីបារាំង ត្រូវតែការពារ "ទ្រឹស្តីជាតិនិយម"។
គួរបញ្ជាក់ថា ទាំងលិខិតលើកទី១និងលើកទី២ គឺត្រូវបានលោកស្រី ម៉ារីន ឡឺពែន ប្រធានគណបក្សស្តាំនិយមជ្រុល ប្រកាសចូលរួមគាំទ្រ។ លោកស្រីបានលើកឡើងថា "ជាការពិតណាស់ គ្រោះថ្នាក់កើតមានសង្គ្រាមស៊ីវីល កំពុងតែសំងំពរពោះនៅលើទឹកដីបារាំង រងចាំតែថ្ងៃកើតតែប៉ុណ្ណោះ"។ ដូចគ្នាដែរ អ្នកនយោបាយបក្សស្តាំនិយមខ្លះទៀត ក៏ទទួលស្គាល់ដែរ ថាពិតជាមានអំពើហិង្សា អសន្តិសុខ អស្ថិរភាពសង្គម ខ្លាំងឡើងៗពិតមែន។
ដោយឡែក ក្រសួងការពារជាតិបារាំង បានច្រានចោលទាំងស្រុង នូវការធ្វើលិខិតអនាមិក របស់នាយទាហានបារាំងទាំង២លើកនេះ និងបានបញ្ជាក់ថា នឹងចាត់វិធានការពិន័យ។ ក្រសួងការពារជាតិបារាំង បអះអាងថា "កងទ័ពត្រូវតែគោរពអព្យាក្រិត្យភាព មិនត្រូវលូកលាន់ក្នុងកិច្ចការនយោបាយទេ។ វិន័យកងទ័ពមិនហាមឃាត់ ឲ្យនាយទាហានម្នាក់ៗ មានការយល់ឃើញរៀងៗខ្លួននោះទេ តែបើចង់បញ្ចេញមតិជាសាធារណៈបែបនេះ គឺត្រូវតែចាកចេញពីជួរកងទ័ព"។
លោក Jean Castex នាយករដ្ឋមន្ត្រីបារាំង បានលើកឡើងថា "ទង្វើបែបនេះ គឺជាការបំពាននឹងច្បាប់វិន័យ ដែលជាគោលការគ្រិះនៃរបបសាធារណៈរដ្ឋ។ លោកបានទំលាក់បន្ទុកផងដែរថា គណបក្សស្តាំនិយមជ្រុល ដែលជាបក្សប្រជាភិថុត ចូលចិត្តឃោសនាបំប៉ោង បំភ័យប្រជាជន កំពុងតែកេងចំណេញជាមួយនឹងលិខិតទាំងនេះ ខណៈដែលការបោះឆ្នោតតំបន់ និងការបោះឆ្នោតប្រធានាធិបតី កំពុងតែខិតជិតមកដល់"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ