មន្ត្រីទីភ្នាក់ងារឱសថអឺរ៉ុបថា Astra Zeneca មានពាក់ព័ន្ធនឹងការកកឈាមក្នុងសរសៃឈាម
មន្ទិលសង្ស័យជុំវិញ ផលវិបាកនៃថ្នាំវ៉ាក់សាំងប្រឆាំងកូវី១៩ របស់ក្រុមហ៊ុនAstraZeneca នៅតែបន្តផុសផុលដដែល។ មន្ត្រីម្នាក់របស់ទីភ្នាក់ងារឱសថអឺរ៉ុប បានបញ្ជាក់អះអាងនៅថ្ងៃអង្គារទី ៦មេសាម្សិលមិញ ថាថ្នាំបង្ការAstraZeneca ពិតជាមានទាក់ទង នឹងជំងឺកំណកឈាម ត្រុមបូស្ស នៅក្នុងសរសៃឈាមខួរក្បាល តែជាករណីដ៏កម្របំផុត។ មូលហេតុដែលនាំឱ្យមានដុំកំណកឈាមនោះមិនអាចបំភ្លឺបានទេ។ ប៉ុន្តែទីភ្នាក់ងារឱសថអឺរ៉ុប ថាមិនទាន់អាចផ្តល់សេចក្តីសន្និដ្ឋាន បានទេ។
ចុះផ្សាយនៅថ្ងៃ៖
ស្តាប់ - ០២:១៣
ទីភ្នាក់ងារឱសថអឺរ៉ុប ត្រូវផ្តល់សេចក្តីសន្និដ្ឋានស្តីអំពីហានិភ័យនៃថ្នាំបង្ការប្រឆាំងកូវីដ១៩របស់ក្រុមហ៊ុនAstraZeneca នៅប៉ុន្មានថ្ងៃទៀតខាងមុខ។ គណៈកម្មការគ្រប់គ្រងសុវត្ថិភាពឱសថអឺរ៉ុប ដែលមានទីស្នាក់ការនៅទីក្រុងអាំស្ទែដាំប្រទេសហូឡង់ ទំនងជាត្រូវផ្តល់សេចក្តីសម្រេចនៅរវាងថ្ងៃព្រហស្បតិ៍ឬសុក្រ។
ប៉ុន្តែមន្ត្រីរបស់ទីភ្នាក់ងារម្នាក់បានព្រលយឱ្យដឹង តាំងពីថ្ងៃអង្គារទី ៦មេសាម្សិលមិញ ថា ថ្នាំវ៉ាក់សាំងAstraZeneca ពិតជាមានជាប់ទាក់ទងនឹងជំងឺកំណកឈាមក្នុងសរសៃវែនមែន គ្រាន់តែ គេនៅមិនទាន់ដឹងថាអ្វីទៅជាមូលហេតុនាំឱ្យមានប្រតិកម្មកកឈាមនោះឡើង។ ភ្នាក់ងារអឺរ៉ុបកំពុងបន្តសិក្សាដើម្បីបានយល់អំពីយន្តការនេះ។ នេះបើតាមការបញ្ជាក់បន្ថែមរបស់មន្ត្រីដដែល ដែលអះអាងទៀតថា នៅក្នុងចំណោមអ្នកទទួលបានវ៉ាក់សាំងរួចហើយ គេសង្កេតឃើញមានអ្នកចាក់ថ្នាំបង្ការវ័យកណ្តាលកើតជំងឺដុំកំណកឈាមក្នុងសរសៃឈាមខួរក្បាល ច្រើនជាងធម្មតា (ជាងអត្រាមនុស្សពេលវ័យតែនៅក្មេងមិនបានចាក់ថ្នាំបង្ការ) និងជាងអ្វីដែលគេបានគិត។
ផលរំខាននាំឱ្យកើតមានដុំកំណកឈាមដែលអាចនាំឱ្យស្លាប់បាត់បង់ជីវិតផងនោះ ជាករណីកម្រទេ។ គិតរហូតមកទល់ថ្ងៃទី ២៤មីនា គេសង្កេតឃើញមាន៣០ករណី ក្នុងនោះ៧ករណីបានស្លាប់នៅក្នុងប្រទេសអង់គ្លេស ដែលមានការចាក់ថ្នាំបង្ការAstraZeneca ដល់ទៅ១៨,១លានដូស និង១២ករណីក្នុងស្លាប់បួនករណីនៅប្រទេសបារាំងដែលបានចាក់អស់២,៥លានដូស។
ក្នុងពេលរង់ចាំផ្តល់សេចក្តីសន្និដ្ឋានចុងក្រោយ ទីភ្នាក់ងារឱសថអឺរ៉ុប បានបង្ហាញការជឿជាក់ថា ប្រសិនបើថ្នាំបង្ការរបស់AstraZeneca អាចមានពាក់ព័ន្ធនឹងជំងឺកំណកឈាមមែនក៏ដោយ ក៏គុណប្រយោជន៍នៃថ្នាំបង្ការនៅមានខ្ពស់ជាងផលវិបាកឆ្ងាយណាស់។
ចំណែកខាងក្រុមហ៊ុនAstraZenecaវិញ បានអះអាងកាលពីខែមីនាថាគ្មានភស្តុតាងបង្ហាញពីផលរំខានធ្ងន់ធ្ងររបស់ថ្នាំបង្ការទេ។ ប៉ុន្តែនៅថ្ងៃអង្គារនេះ សកលវិទ្យាល័យOxford បានប្រកាសផ្អាកការធ្វើតេស្តសាកល្បងការចាក់ថ្នាំបង្ការAstraZeneca លើកូនក្មេងសិន ដើម្បីទុកពេលឱ្យទីភ្នាក់ងារឱសថអង់គ្លេសសម្រេចចិត្តនិងផ្តល់ព័ត៌មានបន្ថែមស្តីអំពីហានិភ័យនៃថ្នាំបង្ការនិងការកើតមានដុំកំណាកឈាមក្នុងសរសៃឈាម ដ៏កម្រលើមនុស្សធំវ័យក្មេងសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ