បារាំង ៖ ប្រព័ន្ធអ៊ីនធ័រនែត ក្លាយជាសមរភូមិប្រយុទ្ធរបស់ក្រុមមហាអំណាច
នាយកទីភ្នាក់ងារសន្តិសុខប្រព័ន្ធព័ត៌មានបារាំង បានសម្តែងការព្រួយបារម្ភនៅថ្ងៃព្រហស្បតិ៍ទី ១៨ មីនា ២០២១នេះថា អ៊ីនធ័រនែតកំពុងក្លាយជាសមរភូមិប្រកួតប្រជែងដោយបិទទ្វាររវាងក្រុមប្រទេសមហាអំណាច។ បច្ចុប្បន្ននេះ មហាអំណាចកំពុងសង្កៀតធ្មេញដាក់គ្នាខ្លាំងណាស់។
ចុះផ្សាយនៅថ្ងៃ៖
ស្តាប់ - ០១:៥០
ម្នាក់ៗមានអារម្មណ៍ថាម្នាក់ទៀតកំពុងបំពានយ៉ាងធ្ងន់ធ្ងរ ប៉ុន្តែទន្ទឹមពេលជាមួយគ្នានេះ ក្រុមមហាអំណាចបដិសេធមិននិយាយអំពីការបង្កើតច្បាប់អន្តរជាតិទេ គឺប្រៀបដូចជាការវាយប្រហារអ៊ីនធ័រនែត ជាទង្វើស្របច្បាប់។ នេះបើតាមប្រសាសន៍របស់លោក Guillaume Poupard អគ្គនាយកទីភ្នាក់ងារសន្តិសុខប្រព័ន្ធអ៊ីនធ័រនែតបារាំង នៅក្នុងឱកាសលាតត្រដាងអំពីការបង្កើតជំរំអ៊ីនធ័រនែតដ៏ធំ មួយនៅ សង្កាត់La Défense ជាប់ទីក្រុងប៉ារីស។ ជំរំដែលចាប់ពីខែវិច្ឆិកា២០២១ទៅ នឹងក្លាយជាកន្លែងប្រមូលផ្តុំ ក្រុមហ៊ុននិងក្រុមអ្នកជំនាញព័ត៌មានវិទ្យាបារាំង ដើម្បី ចែកចាយ ផ្តោះប្តូរ និងបំពាក់បំប៉ន ព័ត៌មានស្តីអំពី សន្តិសុខអ៊ីនធ័រនែត។
ការលើកឡើងរបស់អ្នកទទួលខុសត្រូវបារាំង ធ្វើឡើងជួនចំពេលដែលតាំងពីប៉ុន្មានខែចុងមកនេះ មានការវាយប្រហារអ៊ីនធ័រនែតខ្លាំងជាពិសេស ចូលលុកដល់ក្នុងស្ថាប័ននិងក្រុមហ៊ុនធំៗ របស់អាមេរិក។ អាមេរិកមិនមែនជាជនរងគ្រោះម្នាក់ឯងទេ តែអាមេរិកជាទិសដៅវាយប្រហារចម្បងជាងគេ។ នៅក្នុងចំណោមនោះ មានការវាយប្រហារពីរដែលគួរឱ្យកត់សម្គាល់ខ្លាំង។
ភ្នាក់ងាររបស់សហព័ន្ធអាមេរិកជាច្រើន បានរងការវាយប្រហារអ៊ីនធ័រនែត ដោយប្រើកម្មវិធី របស់ SolarWinds ជាឈ្នាន់។ កម្មវិធីរបស់ SolarWinds អាមេរិក មានចម្លោះប្រហោងទើបពួកចោរអាចជ្រៀតចូលបានតាមរយៈគណនីរបស់អ្នកប្រើប្រាស់។ ភ្នាក់ងារចារកិច្ចអាមេរិកយល់ថាការវាយប្រហារនេះ ជាស្នាដៃរបស់គូប្រជែងដែលទំនងមានប្រភពមកពីរុស្ស៊ី។ ក្រុមហ៊ុន Microsoft ក៏បានទម្លាយឱ្យដឹងថាកម្មវិធីបណ្តាញសារអេឡិចត្រូនិកExchange ដែលក្រុមហ៊ុនសហគ្រាសនៅលើពិភពលោកប្រើគ្រប់គ្នា ក៏រងការវាយប្រហារពីសំណាក់ក្រុមចោរមកពីចិនដែរ កាលពីដើមខែមីនា។ រដ្ឋាភិបាលអាមេរិករបស់លោកចូបៃដិន បានប្រកាសកាលពីសប្តាហ៍មុនថានឹងសងសឹកវិញផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ