ប្រេសិតពិសេសទទួលបន្ទុកផ្នែកអាកាសធាតុរបស់អាមេរិកមកបំពេញទស្សនកិច្ចនៅអឺរ៉ុប
លោកប្រធានាធិបតីបារាំង អេម៉ាណុយអែល ម៉ាក្រុង ត្រូវទទួលជួបលោកចន ឃែរី ប្រេសិតពិសេសទទួលបន្ទុកផ្នែកអាកាសធាតុ នៅថ្ងៃពុធទី ១០មីនានេះ ដើម្បីពង្រឹងកិច្ចសហប្រតិបត្តិការប្រយុទ្ធប្រឆាំងនឹងការប្រែប្រួលអាកាសធាតុ។ មុនមកដល់ក្រុងប៉ារីស លោក ចន ឃែរី បានបំពេញទស្សនកិច្ចនៅទីក្រុងព្រុចសែល និងបានជួបពិភាក្សាមួយទល់នឹងមួយ ជាមួយលោកស្រី អួរស៊ូឡា វ៉ុនឌែរ ឡេយែន ប្រធានគណៈកម្មការអឺរ៉ុប ក្នុងកម្មវត្ថុតែមួយ គឺពង្រឹងកិច្ចសហប្រតិបត្តិការអាមេរិក-អឺរ៉ុប ដើម្បីអាកាសធាតុ។
ចុះផ្សាយនៅថ្ងៃ៖
ស្តាប់ - ០១:៥៦
អាមេរិករបស់លោកចូ បៃដិន ត្រូវធ្វើជាមគ្គុទេសក៏ដឹកនាំពិភពលោករកចម្លើយប្រឈមនឹងការប្រែប្រួលអាកាសធាតុ។ ជាសញ្ញានៃការប្តូរផ្លាស់ បេសិតពិសេសទទួលបន្ទុកផ្នែកអាកាសធាតុ លោក ចន ឃែរី បានអញ្ជើញមកបំពេញទស្សនកិច្ចនៅអឺរ៉ុប តាំងពីថ្ងៃអង្គារទី៩មីនាមក។
នៅក្នុងជំនួបជាមួយលោកស្រី ប្រធានគណៈកម្មការអឺរ៉ុប លោក ចន ឃែរី បានអះអាងថាលោកធ្វើដំណើរមករឹតចំណងកិច្ចសហប្រតិបត្តិការអឺរ៉ុប-អាមេរិកដើម្បីអាកាសធាតុ។ ជាកិច្ចសហប្រតិបត្តិការដ៏អស្ចារ្យក្នុងការសម្រេចកិច្ចព្រមព្រៀងក្រុងប៉ារីសកាលពីឆ្នាំ២០១៥ដែលត្រូវពង្រឹងបន្ថែម។ ដល់វេលាដែលអឺរ៉ុបនិងអាមេរិកកាន់ដៃគ្នា បញ្ចេញសកម្មភាពហើយ ! នេះបើតាមប្រសាសន៍របស់លោក ចន ឃែរី ដោយអះអាងទៀតថា សន្និសីទអាកាសធាតុអន្តរជាតិ ឬCOP26 ដែលនឹងប្រព្រឹត្តទៅនៅខែវិច្ឆិកា នៅប្រទេសអង់គ្លេស ជាឱកាសដ៏ថ្លៃថ្លាបំផុត សម្រាប់អឺរ៉ុបនិងអាមេរិក។
គឺជាចាំបាច់ណាស់ដែលប្រទេសបញ្ចេញឧស្ម័នពុលខ្លាំងជាងគេលំដាប់ទីពីរពិភពលោក (អាមេរិក) និងទីបី (អឺរ៉ុប) យល់ព្រមព្រៀងគ្នាកាត់បន្ថយឧស្ម័នផ្ទះកញ្ចក់នោះ។ អឺរ៉ុបបានកំណត់កម្មវត្ថុកាត់បន្ថយការបញ្ចេញឧស្ម័នផ្ទះកញ្ចក់ឱ្យ៥៥% បើប្រៀបទៅនឹងឆ្នាំ១៩៩០ នៅឆ្នាំ២០៣០។ ចំណែកសហរដ្ឋអាមេរិកក៏ត្រូវប្រកាសកម្មវត្ថុរបស់ខ្លួនដែរ នៅថ្ងៃទី ២២មេសា ក្នុងសន្និសីទអាកាសធាតុមួយដែលរៀបចំឡើងដោយអាមេរិក។ ប្រធានាធិបតីអាមេរិកធ្លាប់បានសន្យាធ្វើអព្យាក្រិត្យកាបោន ក្នុងវិស័យថាមពលនៅឆ្នាំ២០៣៥ និងនៅឆ្នាំ ២០៥០សម្រាប់គ្រប់វិស័យសេដ្ឋកិច្ចទាំងអស់។
នៅថ្ងៃពុធនេះ លោកឃែរី ត្រូវជួបជាមួយប្រធានាធិបតីបារាំង ដើម្បីជជែកអំពីដំណាក់កាលបន្ទាប់នៃកិច្ចសហប្រតិបត្តិការអន្តរជាតិដើម្បីអាកាសធាតុ។ បន្ទាប់ប៉ារីស លោកឃែរី នឹងបន្តដំណើរទៅអង់គ្លេស ដើម្បីជួបតំណាងរដ្ឋាភិបាលប្រទេសម្ចាស់ផ្ទះទទួលរៀបចំCOP២៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ