អ៊ុយក្រែនប្តឹងរុស្ស៊ី ចំពោះមុខតុលាការសិទ្ធិមនុស្សអឺរ៉ុប រឿងសម្លាប់អ្នកនយោបាយប្រឆាំង
រដ្ឋាភិបាលប្រទេសអ៊ុយក្រែន បានដាក់ពាក្យប្តឹងរដ្ឋាភិបាលរុស្ស៊ី នៅចំពោះមុខតុលាការសិទ្ធិមនុស្សអឺរ៉ុប ដោយចោទថា រដ្ឋរុស្ស៊ី បានធ្វើសកម្មភាពសម្លាប់ និងប៉ុនប៉ងសម្លាប់ សកម្មជននយោបាយប្រឆាំងជាច្រើននាក់។ នេះគឺជាបណ្តឹងទី៩ហើយ ដែលអ៊ុយក្រែនប្តឹងរុស្ស៊ី នៅចំពោះតុលាការសិទ្ធិមនុស្សអឺរ៉ុប។
ចុះផ្សាយនៅថ្ងៃ៖
ស្តាប់ - ០២:២៨
យោងតាមការិយាល័យទំនាក់ទំនងអ្នកកាសែត របស់តុលាការសិទ្ធិមនុស្សអឺរ៉ុប គឺរដ្ឋាភិបាលអ៊ុយក្រែន បានដាក់ពាក្យបណ្តឹងមួយ ប្តឹងរដ្ឋអំណាចរុស្ស៊ី ថាបានធ្វើសកម្មភាព សម្លាប់ ឬប៉ុនប៉ងសម្លាប់ សកម្មជននយោបាយប្រឆាំង ជាច្រើននាក់។
ក្នុងចំណោមជនរងគ្រោះ គឺមានដូចជា ៖ លោក អាឡិចសី ណាវ៉ាល់នី (Alexeï Navalny) និង លោក Sergueï Skripal ដែលត្រូវគេដាក់ថ្នាំបំពុល ប៉ុនប៉ងសម្លាប់។ ក្រៅពីនេះ ជនរងគ្រោះខ្លះ ត្រូវបានគេសម្លាប់បាត់ទៅហើយ គឺមាន លោក Boris Nemtsov អតីតអ្នកនយោបាយរុស្ស៊ី ដែលត្រូវបានគេបាញ់សម្លាប់នៅកណ្តាលក្រុងម៉ូស្គូ កាលពីថ្ងៃទី២៧ ខែកុម្ភៈឆ្នាំ២០១៥ លោក Zelimkhan Khangochvili សកម្មជននយោបាយហ្សកហ្ស៊ី ដើមកំណើតឆេឆិននី ត្រូវគេសម្លាប់នៅក្រុងប៊ែរឡាំង ឆ្នាំ២០១៩ ព្រមទាំងលោកស្រី Anna Politkovskaïa អ្នកកាសែតជនជាតិរុស្ស៊ី ដែលគេធ្វើឃាតនៅឆ្នាំ២០០៦ ជាដើម។
លោក Ivan Lishchyna អនុរដ្ឋមន្ត្រីក្រសួងយុត្តិធម៌អ៊ុយក្រែន ដែលជាអ្នករៀបចំពាក្យបណ្តឹងនេះ បានលើកឡើងនៅលើទំព័រ Facebookថា ក្រុមការងារលោក បានពិនិត្យសំណុំរឿង យ៉ាងម៉ដ្ឋចត់មួយករណីម្តងៗ ដោយប្រមូលភស្តុតាងជាក់ច្បាស់ និងរឹងមាំ ដើម្បីដាក់បន្ទុកទៅលើរដ្ឋាភិបាលរុស្ស៊ី។
តុលាការសិទ្ធិមនុស្សអឺរ៉ុប បញ្ជាក់ថា ក្រៅពីចោទរដ្ឋរុស្ស៊ី ថាជាអ្នកនៅពីក្រោយសកម្មភាពសម្លាប់សកម្មជន ឬ អ្នកនយោបាយប្រឆាំង រដ្ឋាភិបាលអ៊ុយក្រែន ក៏បានចោទផងដែរ ថារដ្ឋាភិបាលរុស្ស៊ី មិនបានចេញវិធានការស៊ើបអង្កេតស្វែងរកយុត្តិធម៌ជូនជនរងគ្រោះ ហើយព្រមទាំងបានបើកយុទ្ធនាការរារាំង រំខាន បង្អាក់ការស៊ើបអង្កេតថែមទាំងផង។ ប្រភពដដែលបញ្ជាក់ថា រដ្ឋាភិបាលអ៊ុយក្រែន បានលើកឡើងថា រដ្ឋរុស្ស៊ីបានធ្វើបំពាននឹងសន្ធិសញ្ញាអឺរ៉ុប ស្តីពីសិទ្ធិរស់រានមានជីវិត។
គួរបញ្ជាក់ថា នេះគឺជាពាក្យបណ្តឹងអន្តររដ្ឋ ទី៩ហើយ ដែលអ៊ុយក្រែនប្តឹងរដ្ឋរុស្ស៊ី ដែលក្នុងចំណោមនេះ មាន៤ករណី កំពុងស្ថិតក្នុងដំណាក់កាលពិនិត្យ ដោយការិយាល័យយុត្តិធម៌ របស់ក្រុមប្រឹក្សានៃទ្វីបអឺរ៉ុប។ ក្រៅពីបណ្តឹងដែលពាក់ព័ន្ធ ជាមួយនឹងការធ្វើឃាតអ្នកនយោបាយប្រឆាំងនៅរុស្ស៊ី អ៊ុយក្រែនបានប្តឹងរុស្ស៊ី ពាក់ព័ន្ធនឹងអំពើឧក្រិដ្ឋមួយចំនួន ដែលកើតឡើង នៅតំបន់គ្រីម៉េ និងតំបន់ភាគខាងកើតអ៊ុយក្រែន ដោយរាប់ទាំង ករណីបាញ់ទំលាក់យន្តហោះ MH17 របស់ក្រុមហ៊ុនអាកាសចរណ៍ម៉ាឡេស៊ី ព្រមទាំងករណីចាប់នាវិក និងនាវាអ៊ុយក្រែន៣គ្រឿង នៅឆ្នាំ២០១៨ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ