ឆ្នាំ២០២០ ចិនវ៉ាដាច់អាមេរិក ក្លាយជាដៃគូពាណិជ្ជកម្មធំបំផុត ជាមួយសហភាពអឺរ៉ុប
នៅក្នុងឆ្នាំ២០២០ ទំនាក់ទំនងពាណិជ្ជកម្មនាំចេញចូល រវាងចិន និងប្រទេសសហភាពអឺរ៉ុប បានកើនឡើងខ្លាំងគួរឲ្យកត់សំគាល់។ យោងតាមតួលេខបូកសរុប របស់វិទ្យាស្ថានស្ថិតិអឺរ៉ុប នៅឆ្នាំ២០២០ ដៃគូពាណិជ្ជកម្មធំបំផុតរបស់អឺរ៉ុប គឺមិនមែនជាសហរដ្ឋអាមេរិកទៀតទេ គឺចិន! តែទន្ទឹមនឹងនេះ ក៏មានការព្រួយបារម្ភផងដែរ អំពីការដែលប្រទេសនៅអឺរ៉ុប ពឹងផ្អែកជ្រុល លើមុខទំនិញមួយចំនួនរបស់ចិន ជាក់ស្តែងដូចជាឧបករណ៍ និងគ្រឿងផ្សំអេឡិចត្រូនិកជាដើម។
ចុះផ្សាយនៅថ្ងៃ៖
ស្តាប់ - ០២:៣៤
វិទ្យាស្ថានស្ថិតិអឺរ៉ុប Eurostat ទើបបានចេញតួលេខបូកសរុប នៃការនាំចេញនាំចូល ក្នុងឆ្នាំ២០២០ ដែលបង្ហាញថា ការនាំចេញនិងនាំចូល រវាងអឺរ៉ុបជាមួយចិន គឺមានចំនួនសរុប ៥៨៦ពាន់លានអឺរ៉ូ។ ចំណែកការនាំចេញនាំចូលរវាងអឺរ៉ុបនិងសហរដ្ឋអាេមរិកវិញ គឺមានសរុប ចំនួន៥៥៥ពាន់លានអឺរ៉ូ។ នេះគឺជាលើកទីមួយហើយ ដែលចិន បានវ៉ាដាច់សហរដ្ឋអាមេរិក ក្នុងវិស័យពាណិជ្ជកម្មជាមួយសហភាពអឺរ៉ុប។
យោងតាមតួលេខនេះ ក្នុងឆ្នាំ២០២០ការនាំទំនិញពីចិន ចូលមកក្នុងទីផ្សារអឺរ៉ុប បានកើនឡើងចំនួន៥.៦% បើប្រៀបធៀបទៅឆ្នាំ២០១៩។ ចំណែកការនាំទំនិញចេញ ពីអឺរ៉ុប ចូលទៅចិនវិញ គឺបានកើនឡើង ២.២%។ ផ្ទុយទៅវិញ ការនាំចេញទំនិញអឺរ៉ុប ទៅសហរដ្ឋអាមេរិកវិញ បានចុះថយចំនួន៨.២% រីឯការនាំចូលពីអាមេរិក មកអឺរ៉ុប គឺថយចុះចំនួន១៣.២% ក្នុងឆ្នាំ២០២០។
បើតាមការពន្យល់ពីអ្នកជំនាញ ក្នុងឆ្នាំ២០២០ កន្លងទៅនេះ ចិនគឺជាប្រទេសតែមួយគត់ ដែលបានរលាស់ខ្លួន ចេញពីវិបត្តិសេដ្ឋកិច្ចបង្កឡើយដោយកូវីដ១៩ បានមុនគេ។ សង្វាក់ផលិតកម្ម នៃឧស្សាហកម្មចិន បានចាប់ផ្តើមស្ទុះឡើងវិញ តាំងតែពីពាក់កណ្តាលឆ្នាំ២០២០ ខណៈដែលប្រទេសផ្សេងៗនៅអឺរ៉ុប និងសហរដ្ឋអាមេរិកជាដើម កំពុងតែវិកវរ ជ្រួលច្របល់ខ្លាំងដោយការឆ្លងរាលដាលកូវីដ១៩។ នៅអឺរ៉ុប ក្នុងឆ្នាំ២០២០ តម្រូវការទំនិញមួយចំនួនបានកើនឡើងខ្លាំង ដូចជាសម្ភារៈបរិក្ខាពេទ្យ សម្ភារៈអនាម័យ និងទំនិញបច្ចេកវិទ្យាអេឡិចត្រូនិកជាដើម ដោយសារតែមនុស្សត្រូវរៀន ឬ ធ្វើការពីផ្ទះ តាមប្រពន្ធអនឡាញ។ ទំនិញទាំងអស់នេះ គឺភាគច្រើន ត្រូវនាំចូលពីចិន។
គួររំលឹកថា ក្នុងវិស័យពាណិជ្ជកម្មជាមួយសហភាពអឺរ៉ុប ចិនបានវ៉ាដាច់ជប៉ុន នៅឆ្នាំ២០០៤ ហើយពេលនេះបានវ៉ាដាច់សហរដ្ឋអាមេរិក។ តែយ៉ាងណាក៏ដោយ ជញ្ជីងពាណិជ្ជកម្ម រវាងសហភាពអឺរ៉ុប និងចិន គឺមិនមានតុល្យភាពទេ ដោយផ្អៀងទៅខាងចិនខ្លាំង ហើយចេះតែកើនពីមួយឆ្នាំទៅមួយឆ្នាំ។ ឆ្នាំ២០១៩ ជញ្ជីងពាណិជ្ជកម្មផ្អៀងទៅខាងចិន ចំនួនប្រមាណ១៦៤.៧ពាន់លានអឺរ៉ូ ហើយនៅឆ្នាំ២០២០វិញ គឺមានចំនួន ១៨១ពាន់លានអឺរ៉ូ។
ដោយឡែក នៅថ្ងៃចន្ទទី១៥កុម្ភៈ លោក Bruno Le Maire រដ្ឋមន្ត្រីក្រសួងសេដ្ឋកិច្ចបារាំង បានថ្លែងការបារម្ភថា អឺរ៉ុបកំពុងស្ថិតក្នុងភាពងាយគ្រោះថ្នាក់ ដោយសារពឹងផ្អែកជ្រុលទៅលើមុខទំនិញយុទ្ធសាស្ត្រមួយចំនួន ដែលនាំចូលពីចិន និងពីអាស៊ី ជាក់ស្តែង ដូចជាគ្រឿងផ្សំអេឡិចត្រូនិក (Semi-conducteur) និងគ្រឿងផ្សំថ្មអគ្គិសនីជាដើម។ ប្រការនេះ ធ្វើឲ្យឧស្សាហកម្មផលិតរថយន្តនៅអឺរ៉ុប ត្រូវប្រឈមនឹងបញ្ហាទៅថ្ងៃមុខ។ លោកបានអំពាវនាវឲ្យអឺរ៉ុប ចាត់វិធានការដាក់រនាំងច្បាប់ ដើម្បីពង្រឹងការផលិតក្នុងស្រុក និងទប់ស្កាត់ការរបូតហូរចេញ នូវចំណេះដឹងបច្ចេកវិទ្យា តាមរយៈការទិញប្រមូលយកក្រុមហ៊ុនអឺរ៉ុប ពីសំណាក់ក្រុមហ៊ុនបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ