FAO៖តម្លៃគ្រឿងបរិភោគជាមូលដ្ឋានបានឡើងខ្ពស់មិនធ្លាប់មានគិតតាំងពីឆ្នាំ ២០១៤
អង្គការកសិកម្ម និងស្បៀងអាហារពិភពលោកហៅកាត់ FAO បានប្រកាសក្នុងថ្ងៃព្រហស្បតិ៍ ទី៤ កុម្ភៈថា តម្លៃគ្រឿងបរិភោគជាមូលដ្ឋាននៅលើទីផ្សារអន្តរជាតិបានស្ទុះឡើងខ្ពស់មិនធ្លាប់មានគិតតាំងពីខែកក្កដា ឆ្នាំ ២០១៤។ គ្រាប់ធញ្ញជាតិ ស្ករ ប្រេងឆា ផលិតផលធ្វើពីទឹកដោះគោ ឬមួយក៏សាច់ត្រូវបាន FAO ចាត់ទុកជាស្បៀងមូលដ្ឋានចាំបាច់សម្រាប់ចិញ្ចឹមជីវិតប្រចាំថ្ងៃរបស់មនុស្សលោក។ តាម FAO តម្លៃគ្រឿងបរិភោគជាមូលដ្ឋានទាំងនេះបានកើនឡើងជាមធ្យមចំនួន ៤,៣% ក្នុងខែមករា ឆ្នាំ ២០២១ បើធៀបនឹងខែធ្នូ ឆ្នាំ ២០២០ កន្លងទៅ។ តែកំណើននេះមានកម្រិតខ្ពស់មិនធ្លាប់មាន បើគិតតាំងពីខែកក្កដា ឆ្នាំ ២០១៤។
ចុះផ្សាយនៅថ្ងៃ៖
ស្តាប់ - ០២:២៨
ស្ករសជាផលិតផលដែលតម្លៃរបស់វាបានស្ទុះឡើងខ្លាំងក្នុងខែមករាកន្លងទៅជាមួយនឹងកំណើនចំនួន ៨,១% បើធៀបនឹងខែធ្នូ ឆ្នាំ ២០២០។ មានកត្តាសំខាន់ចំនួនពីរដែលបានជំរុញឲ្យស្ករសឡើងថ្លៃ គឺកត្តាអាកាសធាតុ និងកត្តាបារម្ភពីកង្វះស្ករស។ បន្ទាប់ពីស្ករស គឺគ្រាប់ធញ្ញជាតិដែលមានតម្លៃកើនឡើងចំនួន ៧% ពិសេសគ្រាប់ពោតដែលតម្លៃរបស់វាបានកើនឡើងជាង ៤០% ក្នុងឆ្នាំ ២០២០។ តម្លៃគ្រាប់ពោតហក់ឡើងខ្លាំងក៏ដោយសារតែចិនត្រូវការច្រើន និងការផ្គត់ផ្គង់ក្នុងលោកមានការថយចុះជាមួយនឹងបរិមាណស្តុកតិចតួចនៅសហរដ្ឋអាមេរិក និងការផ្អាកនាំចេញគ្រាប់ពោតរបស់ប្រទេសអាហ្សង់ទីន។
ចំណែកតម្លៃស្រូវសាឡីបានកើនឡើងចំនួន ៦,៨% ក្នុងខែមករាបើធៀបនឹងខែធ្នូ ឆ្នាំ ២០២០។ រុស្ស៊ីដែលជាប្រទេសនាំចេញស្រូវសាឡីទី១ ក្នុងលោកបានសម្រេចដំឡើងពន្ធនាំចេញទ្វេដងកាលពីខែមីនា ឆ្នាំ ២០២០។ តម្លៃអង្ករក៏កំពុងស្គាល់កំណើនដោយសារមានតម្រូវការខ្លាំងពីក្រុមអតិថិជនអាស៊ី និងអាហ្រ្វិក។ ទាក់ទងនឹងតម្លៃប្រេងឆាវិញត្រូវបាន FAO បញ្ជាក់ថា មានការកើនឡើងចំនួន ៥,៨% ដែលជាកម្រិតមួយខ្ពស់ខ្លាំងមិនធ្លាប់មានគិតតាំងពីខែឧសភា ឆ្នាំ ២០១២។ តម្លៃប្រេងឆាឡើងថ្លៃមកពីផលិតកម្មប្រេងដូងនៅប្រទេសម៉ាឡេស៊ី និងឥណ្ឌូណេស៊ីមានបរិមាណតិចជាងការគ្រោងទុកដោយសារតែភ្លៀងធ្លាក់ច្រើនពេក និងកង្វះពលករបរទេស។
ដោយឡែក តម្លៃផលិតផលធ្វើពីទឹកដោះគោបានស្គាល់កំណើន ១,៦% ប្រចាំខែដោយសារតែចិនបាននាំចូលច្រើននៅពេលជិតចូលឆ្នាំចិនខាងមុខ។ គ្រឿងបរិភោគជាមូលដ្ឋានចុងក្រោយលើកឡើងដោយអង្គការ FAO គឺសាច់។ សាច់ដែលតម្លៃរបស់វាបានកើនឡើងចំនួន ១% ក្នុងខែមករា បើធៀបនឹងខែធ្នូឆ្នាំ ២០២០។ តម្លៃសាច់ឡើងថ្លៃក៏ដោយសារតែមានកំណើនតម្រូវការសាច់បសុបក្សីនៅក្នុងលោក ពិសេសសាច់បសុបក្សីពីប្រទេសប្រេស៊ីល។ តម្រូវការសាច់បសុបក្សីពីប្រេស៊ីលក៏មកពីមានប្រទេសអឺរ៉ុបជាច្រើនបានកម្រិតផលិកម្ម និងការនាំចេញសាច់បសុបក្សីរបស់ខ្លួនដោយសារតែមានការឆ្លងរាតត្បាតនូវជំងឺគ្រុនផ្តាសាយបក្សី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ