កូវីដ១៩នៅបារាំង៖ វិធានការបិទខ្ទប់ប្រទេសទាំងស្រុងជាលើកទី៣ ត្រូវគេជឿថាចៀសមិនរួច
នៅប្រទេសបារាំង មានការព្រួយបារម្ភកាន់ខ្លាំងឡើងថា គេប្រហែលជាមិនអាចចៀសផុត ពីការបិទខ្ទប់ប្រទេសទាំងស្រុង ជាលើកទី៣នោះទេ ដោយសារតែការឆ្លងរាលដាលកូវីដ១៩ នៅតែកើនខ្ពស់។ ជាងនេះទៀត អ្នកជំនាញសុខាភិបាលបារាំង បានលើកឡើងថា ក្នុងរវាងប៉ុន្មានសប្តាហ៍ខាងមុខ កូវីដ១៩ទំរង់បំប្លែងខ្លួនថ្មី ដែលមានប្រភពចេញពីអង់គ្លេសនោះ នឹងឆ្លងរាលដាលពាសពេញប្រទេសបារាំង។
ចុះផ្សាយនៅថ្ងៃ៖
ចំនួនអ្នកឆ្លងកូវីដ១៩ថ្មី នឹងអ្នកជំងឺដែលត្រូវការការសង្គ្រោះបន្ទាន់ បានកើនឡើងជាប្រចាំ នៅបារាំង។ មេរោគកូវីដ១៩ ទម្រង់បំប្លែងខ្លួនថ្មី ដែលមានប្រភពចេញពីអង់គ្លេស កំពុងតែធ្វើឲ្យព្រួយបារម្ភបំផុត ព្រោះមានកម្លាំងឆ្លងរាលដាលលឿនខ្លាំង ហើយមានការសង្ស័យថា វាអាចមានកម្លាំងបង្កគ្រោះថ្នាក់ខ្ពស់ ដល់អ្នកជំងឺថែមទៀតផង។
លោក Jean-François Delfraissy ប្រធានក្រុមប្រឹក្សាវិទ្យាសាស្ត្រ បានថ្លែងតាមទូរទស្សន៍ BFMTV ថា « ប្រហែលជាត្រូវតែបិទប្រទេសទាំងស្រុងម្តងទៀតហើយ »។ លោកបញ្ជាក់ថា បើបិទបានលឿនរហ័ស នោះវិធានការទប់ស្កាត់ការឆ្លងរាលដាល នឹងមានប្រសិទ្ធិភាពខ្ពស់ទៅតាមនោះដែរ។
ដោយឡែកលោកOlivier Véran រដ្ឋមន្ត្រីក្រសួងសុខាភិបាលបារាំង បានលើកឡើង កាលពីថ្ងៃអាទិត្យ ថាសម្រាប់ពេលនេះ រដ្ឋាភិបាលកំពុងតែរងចាំ ពិនិត្យមើលតួលេខ នៃលទ្ធផល ដែលបានមកពីវិធានបំរាមគោលចរ ហាមចេញដើរចាប់ពីម៉ោង៦ល្ងាច។ លោកបញ្ជាក់ថា បើវិធានការនេះ មិនហុចផលវិជ្ជមាន ហើយមេរោគបំប្លែងខ្លួនថ្មី រីកឆ្លងរាលដាលពាសពេញប្រទេស នោះរដ្ឋាភិបាល ត្រូវតែសម្រេចដាក់ចុះនូវវិធានការថ្មីបន្ថែមទៀត។
យ៉ាងណាក៏ដោយ អ្នកវិភាគនយោបាយ និងអ្នកជំនាញ បានលើកឡើងប្រហាក់ប្រហែលគ្នាថា ការបិទខ្ទប់ប្រទេសជាលើកទី៣ ប្រហែលជាមិនអាចគេចផុតនោះទេ។ សំណួរនាពេលនេះ គឺថា តើវិធានការបិទខ្ទប់ប្រទេសជាលើកទី៣នេះ នឹងមានវិសាលភាព និងកម្រិតតឹងតែងប៉ុណ្ណា។ កាលពីសប្តាហ៍មុននេះ លោករដ្ឋមន្ត្រីក្រសួងអប់រំបារាំង បានអះអាងថា លោកមិនគាំទ្រគំនិតបិទសាលារៀនទេ ព្រោះកុមារសិស្សានុស្សិតត្រូវតែបន្តទទួលបានការសិក្សារៀនសូត្រ ហើយមួយទៀត វាក៏អនុញ្ញាតឲ្យឪពុកម្តាយអាចបន្តធ្វើការងារបាន។
នៅថ្ងៃពុធខាងមុខនេះ លោកប្រធានាធិបតីម៉ាក្រុង នឹងចេញមកថ្លែងសារទៅកាន់ប្រជាជន ជាថ្មីម្តងទៀត ដែលតាមការស្មាន គឺប្រហែលជាលោក នឹងប្រកាសអំពីវិធានការបិទខ្ទប់ប្រទេស ជាលើកទី៣ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ