ប្រមុខការទូតបារាំង ថាព្រួយបារម្ភអំពី ភាពកាន់តែផ្តាច់ការខ្លាំងឡើង របស់រដ្ឋាភិបាលលោកពូទីន
មួយថ្ងៃក្រោយបាតុកម្មយ៉ាងផុសផុល នៅប្រទេសរុស្ស៊ី ដើម្បីទាមទារឲ្យដោះលែងលោកអាឡិចសី ណាវ៉ាល់នី លោកប្រមុខការទូតបារាំង បាននិយាយលើកឡើងថា ការចាប់ខ្លួនសកម្មជនប្រឆាំង និងបាតុករ ដោយកំរោលពីសំណាក់សមត្ថកិច្ចរុស្ស៊ី គឺជារឿងពិបាកយកភ្នែកមើលណាស់។ លោកប្រមុខការទូតបារាំង ក៏បានឆ្លៀតបរិហារផងដែរ អំពីទំនោរកាន់តែផ្តាច់ការឡើង នៃរដ្ឋាភិបាលរុស្ស៊ី ដឹកនាំដោយលោកពូទីន។
ចុះផ្សាយនៅថ្ងៃ៖
ស្តាប់ - ០២:៣៣
ឆ្លើយទៅកាន់អ្នកសំភាសន៍ តាមវិទ្យុ France Inter លោក Jean Yves Le Drian រដ្ឋមន្ត្រីការបរទេសបារាំង បានលើកឡើងថា ទំនោរកាន់តែផ្តាច់ការនៃរដ្ឋាភិបាលរុស្ស៊ី នាពេលបច្ចុប្បន្ន គឺធ្វើឲ្យលោកមានការព្រួយបារម្ភខ្លាំងណាស់។ លោកថា ការចាប់ខ្លួនមនុស្សរាប់រយនាក់ នៅមុនថ្ងៃធ្វើបាតុកម្ម ដោយយកលេសថា ដើម្បីទប់ស្កាត់សកម្មភាពបាតុកម្ម ប្រឆាំងរដ្ឋាភិបាល វាគឺជារឿងមួយពិបាកទ្រាំបើកភ្នែកមើលណាស់។
លោកប្រមុខការទូតបារាំង បានឆ្លៀតលើកឡើងថា លោកមានការកោតសរសើរ ចំពោះប្រជាជនរុស្ស៊ីដែលហ៊ានធ្វើបាតុកម្ម មិនខ្លាចការបង្រ្កាប ហើយជាពិសេស លោកសូមកោតសរសើរ ចំពោះលោក អាឡិចសី ណាវ៉ាល់នី ដែលមានសេចក្តីក្លាហាន ហ៊ានត្រលប់ចូលប្រទេសរុស្ស៊ីវិញ ទាំងដឹងថាខ្លួនប្រាកដជាត្រូវគេចាប់ដាក់ឃុំ យ៉ាងណាក្តី។
ទាក់ទិននឹងគោលជំហរបារាំង ជាមួយនឹងរដ្ឋាភិបាលរុស្ស៊ី លោកប្រមុខការទូតបារាំង បញ្ជាក់ថា រុស្ស៊ីជាប្រទេសជិតខាងជាមួយបារាំង និងសហភាពអឺរ៉ុប ដែលមានចំណែកសំខាន់ក្នុងកិច្ចការសន្តិសុខរួមនៃតំបន់។ លោកបន្តថា តែយ៉ាងណាក៏ដោយ បារាំង ត្រូវតែប្រកាន់ជំហរម៉ឺងម៉ាត់ រឹងមាំ ក្នុងការជជែកជាមួយរុស្ស៊ី។
សូមបញ្ជាក់ថា កាលពីថ្ងៃអាទិត្យទី២៣មករា ប្រជាជនរុស្ស៊ីរាប់ម៉ឺននាក់ បានធ្វើបាតុកម្មនៅតាមទីក្រុងធំៗជាង៦០ ទូទាំងប្រទេស ដើម្បីទាមទារឲ្យដោះលែងលោកអាឡិចសី ណាវ៉ាល់នី សកម្មជននយោបាយ ដែលហ៊ានរិះគន់អំពើពុករលួយរបស់រដ្ឋាភិបាល និងបក្សពួកលោកពូទីន។ យោងតាមអង្គការ OVD-Info មានបាតុករយ៉ាងហោច ៣៥០០នាក់ ត្រូវបានចាប់ខ្លួន ដោយក្នុងនោះ ១៣៦០នាក់ នៅក្រុងម៉ូស្គូ និង៥២៣នាក់ នៅក្រុងសាំងប៉េតេសបួរ។
ដោយឡែក លោក Dmitri Peskov អ្នកនាំពាក្យវិមានក្រឹមឡាំង បាននិយាយបន្ទោស ក្រសួងការបរទេសអាមេរិក ថាបានលូកដៃក្នុងកិច្ចការផ្ទៃក្នុងរុស្ស៊ី តាមរយៈការផ្សព្វផ្សាយទីតាំងជួបជុំបាតុកម្ម។ ជាការចោទដែលស្ថានទូតអាមេរិកប្រចាំក្រុងម៉ូស្គូ បានច្រានចោល ដោយលើកឡើងថា វាជានីតិវិធីធម្មតា ដែលស្ថានទូតអាេមរិក នៅគ្រប់ប្រទេសទាំងអស់ ត្រូវប្រកាសកុំឲ្យប្រជាជនអាមេរិក ទៅកាន់កន្លែងអាចប្រឈមគ្រោះថ្នាក់ជាយថាហេតុណាមួយ។ ទោះយ៉ាងនេះក្តី អ្នកនាំពាក្យ រដ្ឋាភិបាលរុស្ស៊ី បានលើកឡើងថា បាតុកម្មកាលពីថ្ងៃទី២៣មករា គ្មានអ្វីអស្ចារ្យទេ ព្រោះថាអ្នកធ្វើបាតុកម្មមានតែបន្តិចនាក់ រីឯអ្នកបោះឆ្នោតជូនលោកពូទីនវិញ មានដល់ទៅ៧៦% នៃចំនួនប្រជាជនរុស្ស៊ីឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ