ប្រឈមនឹងមេរោគកូវីដបំប្លែងខ្លួនថ្មី បារាំងត្រូវបិទប្រទេសជាលើកទីបី ?
មិនស្ទុះឡើងខ្លាំងមែន តែចំនួនអ្នកឆ្លងកូវីដ១៩ នៅប្រទេសបារាំង និងនៅអឺរ៉ុប បើនិយាយជារួម កើនឡើង ជាលំដាប់ និងបន្តកើនឡើងក្នុងទិសតែមួយ ដោយប្រាកដ ជារៀងរាល់ថ្ងៃ។ ហេតុដូច្នេះហើយបានជាអ្នកជំនាញវិទ្យាសាស្ត្រសុខាភិបាល បារម្ភថា បារាំងទំនងជាត្រូវបិទប្រទេសជាលើកទីបីដោយចៀសមិនរួចទេ បើមេរោគកូវីដបំប្លែងខ្លួនថ្មី ចាប់វាយលុកមកដល់បារាំង ព្រោះមេរោគកូវីដបំប្លែងខ្លួនអង់គ្លេស ឬអាហ្វ្រិកខាងត្បូង ចម្លងលឿនជាមេរោគកូវីដដើមឆ្ងាយណាស់។
ចុះផ្សាយនៅថ្ងៃ៖
ស្តាប់ - ០២:០៦
បន្ទាប់ពីបានចេញបម្រាមគោចរទូទាំងប្រទេស ចាប់ពីម៉ោង៦ល្ងាចទៅទល់នឹងម៉ោង៦ព្រឹក បានមួយសប្តាហ៍មក សម្មតិកម្មបិទខ្ទប់ប្រទេសជាលើកទីបីកំពុងគ្រលាស់ចេញពីបបូរមាត់អ្នកជំនាញកាន់តែច្រើនឡើងៗ។
បារាំងកំពុងស្ថិតក្នុងស្ថានភាពស្ទាក់ស្ទើរខ្លាំង ព្រោះម្យ៉ាងវាដូចជាឆាប់បន្តិចក្នុងការវាយតម្លៃអំពីឥទ្ធិពលនៃបម្រាមគោចរក្នុងការទប់ស្កាត់ការចម្លងមេរោគកូវីដ។ ប៉ុន្តែទន្ទឹមពេលជាមួយគ្នា មេរោគកូវីដបំប្លែងខ្លួនថ្មីអង់គ្លេស និងអាហ្វ្រិកខាងត្បូង កំពុងគំរាមកំហែងបារាំងនិងអឺរ៉ុបកាន់តែខ្លាំង។ ជាមួយសមត្ថភាពចម្លងខ្លាំងប្រមាណពី ៤០%ទៅ៧០%ខ្លាំងជាងមេរោគកូវីដ១៩ដើម មេរោគកូវីដបំប្លែងខ្លួនថ្មី អាចនឹងធ្វើឱ្យចំនួនអ្នកឆ្លងកូវីដ១៩ ស្ទុះឡើងលឿនខ្លាំងនៅសប្តាហ៍ខាងមុខ និងដែលអាចជំរុញឱ្យរដ្ឋាភិបាលត្រូវចាត់វិធានការបិទខ្ទប់ប្រទេសជាថ្មី។
ចំណែកក្រុមប្រឹក្សាសន្តិសុខជាតិបារាំង ដែលបានជួបប្រជុំគ្នាជាថ្មី នៅថ្ងៃពុធម្សិលមិញ ព្រមទាំងនាយករដ្ឋមន្ត្រីផ្ទាល់ មិនបានច្រានចោលសេណារីយោបិទខ្ទប់ប្រទេសជាលើកទីបីដែរ។ លោកប្រមុខរដ្ឋាភិបាលបារាំងត្រូវផ្តល់សម្រេចនៅល្ងាចថ្ងៃព្រហស្បតិ៍នេះ។ នៅល្ងាចថ្ងៃព្រហស្បតិ៍ទី ២១មករានេះដែរ បារាំងនិងបណ្តាសមាជិកសហភាពអឺរ៉ុប២៦ផ្សេងទៀតត្រូវបើកជំនួបកំពូលអឺរ៉ុបជាលើកទី៩ ដើម្បីរកដំណោះស្រាយរួមក្នុងការប្រយុទ្ធប្រឆាំងនឹងមេរោគបំប្លែងខ្លួនថ្មីផង ពន្លឿនការចាក់ថ្នាំបង្ការផង។
ក្នុងពេលរង់ចាំ ថាតើបារាំងនឹងពង្រឹងវិធានការបន្ថែមឬយ៉ាងណានោះ ចិនបានប្រកាសផ្អាកជើងហោះហើរ នៃក្រុមហ៊ុន Air France ប៉ារីស-តានជីន Tianjin (ជិតទីក្រុងប៉េកាំង) ចាប់ពីថ្ងៃទី ២៥មករា ២០២១ទៅសម្រាប់រយៈពេលពីរសប្តាហ៍ បន្ទាប់ពីបានរកឃើញអ្នកដំណើរ៥នាក់ ធ្វើដំណើរមកពីទីក្រុងប៉ារីស មានផ្ទុកមេរោគកូរ៉ូណានៃជំងឺកូវីដ១៩។ សូមបញ្ជាក់ថាតាំងពីខែកក្កដាឆ្នាំ២០២០មក ក្រុមហ៊ុនអាកាសចរណ៍អ៊ែរហ្វ្រង់ បានទទួលការអនុញ្ញាតឱ្យហោះហើរភ្ជាប់ពីបារាំងទៅ/មកចិនបីជើងក្នុងមួយសប្តាហ៍ (ប៉ារីសសៀងហៃពីរជើងមួយសប្តាហ៍ និងប៉ារីសទានជីនមួយជើង។ អាជ្ញាធរចិនបានកំរិតចរាចរណ៍ជើងអាកាសអន្តរជាតិខ្លាំងណាស់ ដោយហាមឃាត់ការហោះហើរទាំងស្រុងជាមួយប្រទេសខ្លះ និងមានលក្ខខណ្ឌតេស្តកូវីដ១៩អវិជ្ជមានជាមួយប្រទេសខ្លះទៀត ដូចយ៉ាងបារាំង អាល្លឺម៉ង់ ឬអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ