OIL៖ជំងឺកូវីដ១៩ បានបង្កឲ្យមានភាពច្រឡំបល់រវាងពេលវេលាសម្រាប់ជីវិតការងារ និងជីវិតឯកជន
នៅថ្ងៃពុធ ទី១៣ មករា អង្គការពលកម្មអន្តរជាតិហៅកាត់ជាភាសាអង់គ្លេស ILO បានចេញផ្សាយរបាយការណ៍មួយស្តីពីភាពស្រពិចស្រពិលទាក់ទងនឹងពេលម៉ោងធ្វើការងារនៅផ្ទះ និងពេលម៉ោងសម្រាប់ជីវិតឯកជន និងគ្រួសារ។ ភាពស្រពិចស្រពិលនេះបានកើតឡើងនៅក្នុងសម័យកូវីដ១៩ ពោលខណៈដែលរដ្ឋាភិបាលបានស្នើឲ្យក្រុមហ៊ុនរៀបចំនីតិវិធីធ្វើការងារពីផ្ទះរបស់បុគ្គលិកខ្លួន។ ILO បានគូសបញ្ជាក់ថា ការធ្វើការងារពីផ្ទះនឹងបន្តមានយូរពេលទៅមុខទៀត ហើយអ្វីដែលក្រុមនិយោជិកត្រូវការ គឺទទួលបានការការពារប្រសើរ និងទទួលបាននូវការយល់ដឹងឲ្យបានច្បាស់លាស់ពីសិទ្ធិ រួមទាំងហានិភ័យស្តីពីជីវិតរស់នៅបែបថ្មីនេះ។
ចុះផ្សាយនៅថ្ងៃ៖
ស្តាប់ - ០២:២៩
តើពេលវេលាធ្វើការងារត្រូវចប់នៅពេលណា ហើយពេលវេលាសម្រាប់ជីវិតឯកជន និងគ្រួសារត្រូវចាប់ផ្តើមនៅពេលណា? នេះជាសំណួរដែលចោទឡើងដោយអង្គការពលកម្មអន្តរជាតិ ឬហៅកាត់ ILO។ ការងារដែល ILO ចង់និយាយនេះ គឺការធ្វើការងារពីផ្ទះ។ តាមពិតទៅ ការធ្វើការងារពីផ្ទះមិនមែនជារឿងថ្មីទេ តែវាបានស្ទុះឡើងយ៉ាងគំហុកតែមួយប៉ប្រិចភ្នែកនៅពេលដែលពិភពលោកបានញាំញីដោយវីរុសកូវីដ១៩។ តាមការប៉ាន់ស្មានរបស់ ILO មាននិយោជិកប្រមាណជា ២៦០លាននាក់ ពោលស្មើនឹង ៧,៩% នៃនិយោជិកសរុបក្នុងលោកបានធ្វើការពីផ្ទះក្នុងឆ្នាំ ២០១៩ ហើយភាគច្រើនជាស្រ្តី។
តែនៅប៉ុន្មានខែដើមឆ្នាំ ២០២០ ដែលពិភពលោកវាយលុកដោយកូវីដ១៩ ពេញទំហឹង អត្រានិយោជិកធ្វើការពីផ្ទះបានស្ទុះឡើងដល់ ២០%។ ILO បានបែងចែកក្រុមនិយោជិកធ្វើការងារពីផ្ទះជា ៣ប្រភេទ ប្រភេទទី១ ក្រុមនិយោជិកដែលធ្វើការងារពីផ្ទះជាលក្ខណៈអចិន្រ្តៃយ៍ ប្រភេទទី២ ក្រុមនិយោជិកមួយភាគធំទទួលបន្ទុកផ្នែកផលិតដែលសង្វាក់ផលិតកម្មមិនអាចធ្វើដោយស្វ័យប្រវត្តិបាន ដូចជាផលិតកម្មធ្វើដោយដៃ ឬការផ្គុំដំឡើងគ្រឿងអេឡិចត្រូនិកជាដើម និងទី៣ ក្រុមនិយោជិកដែលត្រូវការតែទូរស័ព្ទ និងម៉ាស៊ីនកុំព្យូទ័រដើម្បីធ្វើការងារ។ តាម ILO អ្នកធ្វើការងារនៅផ្ទះមួយភាគដែលរស់ក្នុងប្រទេសមានប្រាក់ចំណូលទាប និងមធ្យមត្រូវបានចាត់ទុកជានិយោជិកឯករាជ្យ ពោលមិនមែនជាបុគ្គលិករបស់ក្រុមហ៊ុនណាមួយទេ។
យ៉ាងណាក៏ដោយ និងដោយសារការធ្វើការងារពីផ្ទះបន្តមានយូរអង្វែងទៀត ILO ចង់ឲ្យមានច្បាប់ការងារមួយច្បាស់លាស់ស្តីពីលក្ខខណ្ឌធ្វើការងារពីផ្ទះ។ ILO បានគូសបញ្ជាក់នៅក្នុងរបាយការណ៍របស់ខ្លួនថា ហានិភ័យខ្ពស់ចំពោះអ្នកធ្វើការងារនៅផ្ទះ គឺភាពមិនច្បាស់លាស់រវាងពេលម៉ោងសម្រាប់ធ្វើការងារ និងពេលម៉ោងសម្រាប់ជីវិតឯកជន និងជីវិតគ្រួសារ។ តែ ILO បានទទួលស្គាល់ថា គុណប្រយោជន៍មួយដ៏ល្អនៃការធ្វើការងារនៅផ្ទះ គឺភាពបត់បែននៃម៉ោងពេល។ ILO បានផ្តល់ជាអនុសាសន៍ថា ការធានារ៉ាប់រងជួយមើលកូនរបស់អ្នកធ្វើការងារនៅផ្ទះជារឿងសំខាន់ខ្លាំងណាស់ដើម្បីជួយបង្កើនបរិមាណ និងគុណភាពការងារ រួមទាំងជួយធ្វើឲ្យមានសមភាពរវាងជីវិតការងារ និងជីវិតឯកជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ