មេដឹកនាំពិភពលោកបើកកិច្ចប្រជុំកំពូល “ភពផែនដីតែមួយ” នៅថ្ងៃចន្ទនេះ
បណ្តាមេដឹកនាំពិភពលោកនឹងព្យាយាមធ្វើឱ្យកិច្ចការទូតបរិស្ថានអន្តរជាតិចាប់ផ្តើមមានសកម្មភាពឡើងវិញនៅថ្ងៃចន្ទ ទី១១ មករានេះ តាមរយៈកិច្ចប្រជុំកំពូលស្តីអំពីជីវចម្រុះ។ ជំនួបកំពូលនេះគឺជាចំនុចផ្តើមដ៏សំខាន់មួយក្នុងឆ្នាំ ២០២១ ចំពោះកិច្ចខិតខំប្រឹងប្រែងដើម្បីទប់ស្កាត់ផលប៉ះពាល់ធ្ងន់ធ្ងរបង្កឡើងដោយការកើនឡើងកម្តៅផែនដីនិងការបាត់បង់ប្រភេទសត្វនានា។
ចុះផ្សាយនៅថ្ងៃ៖
សន្ទុះនៃកិច្ចខិតខំប្រឹងប្រែងសម្រាប់បុព្វហេតុអាកាសធាតុនិងជីវចម្រុះ បានជាប់គាំងក្នុងឆ្នាំ ២០២០ ដោយសារតែការឆ្លងរាលដាលជាសកលនៃជំងឺកូវីដ១៩។ កូវីដ១៩ ដែលជាវិបត្តិសុខភាពសាធារណៈ និងដែលត្រូវអ្នកជំនាញនិយាយថាជាលទ្ធផលកើតចេញពីការបំផ្លាញបរិស្ថាន។
កិច្ចប្រជុំកំពូល “ភពផែនដីតែមួយ” (The One Planet Summit) គឺជាព្រឹត្តិការណ៍ដ៏ធំដែលរៀបចំឡើងដោយប្រទេសបារាំង ក្នុងភាពជាដៃគូជាមួយអង្គការសហប្រជាជាតិ និងធនាគារពិភពលោក ព្រមទាំងមានការចូលរួមពីប្រធានាធិបតីបារាំងលោកអេម៉ានុយអែល ម៉ាក្រុង អគ្គលេខាធិកាអ.ស.ប លោកអង់តូនីញ៉ូ ហ្គូទែរស៍ និងលោកស្រី អួរស៊ូឡា វ៉ុនឌែរ ឡេយែន ប្រធានគណៈកម្មការអឺរ៉ុប។
បារាំងដែលទទួលធ្វើជាម្ចាស់ផ្ទះរៀបចំកិច្ចប្រជុំថ្ងៃនេះ សង្ឃឹមថាតាមរយៈជំនួបកំពូលភពផែនដីតែមួយ មេដឹកនាំពិភពលោកនឹងអាចបង្កើតក្របខ័ណ្ឌថ្មីមួយរួមគ្នា ដើម្បីឈានឆ្ពោះទៅការពារប្រព័ន្ធអេកូឡូស៊ី និងប្រភេទសត្វផ្សេងៗ។
រហូតមកដល់ពេលនេះ កិច្ចខិតខំប្រឹងប្រែងដើម្បីការពារនិងស្តារបរិស្ថានធម្មជាតិក្នុងសកលលោក បានជួបភាពបរាជ័យយ៉ាងខ្លាំង។ ភពផែនដីស្ថិតនៅលើចំណុចមួយដែលកំពុងឈានទៅដល់ការផុតពូជដ៏ធំនូវប្រភេទសត្វជាច្រើន ដែលកំពុងបាត់ខ្លួនជាបន្តបន្ទាប់គ្នា។
ក្រុមប្រឹក្សាវិទ្យាសាស្ត្ររបស់អង្គការសហប្រជាជាតិសម្រាប់ជីវចម្រុះ បានព្រមាននៅក្នុងរបាយការណ៍ឆ្នាំ ២០១៩ ថា សត្វចំនួន ១ លានប្រភេទ ប្រឈមទៅនឹងការផុតពូជ ហើយភាគច្រើនគឺដោយសារតែការបាត់បង់ទីជម្រកនិងការធ្វើអាជីវកម្មហួសកម្រិត។
របាយការណ៍ខាងលើ បានសន្និដ្ឋានថាសកម្មភាពរបស់មនុស្សបានបំផ្លាញយ៉ាងខ្លាំង លើផ្ទៃដីដែលគ្មានទឹកកកចំនួន ៣ ភាគ ៤ នៅលើភពផែនដីយើងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ