សមាជិកអឺរ៉ុបទាំងអស់នឹងផ្តើមចាក់ថ្នាំបង្ការកូវីដ១៩ ក្នុងថ្ងៃតែមួយ នៅមុនដំណាច់ឆ្នាំ
ក្រោយពីបានទទួលបានការអនុញ្ញាតពីអាជ្ញាធរឱសថអឺរ៉ុបឱ្យប្រើថ្នាំបង្ការរបស់ក្រុមភ្លាម រដ្ឋជាសមាជិកសហភាពអឺរ៉ុបទាំង២៧ នឹងអាចចាប់បើកយុទ្ធនាការចាក់ថ្នាំវ៉ាក់សាំងប្រឆាំងនឹងជំងឺកូវីដ១៩ ក្នុងថ្ងៃមួយស្មើគ្នា។ នេះជាប្រសាសន៍អះអាងរបស់លោកស្រីប្រធានគណៈកម្មការអឺរ៉ុប អួស៊ុយឡា វ៉ុនឌឺលីយ៉ែន នៅចំពោះមុខសភាអឺរ៉ុប នាថ្ងៃពុធទី ១៦ធ្នូនេះ។ ការចាក់ថ្នាំបង្ការទំនងជានឹងត្រូវចាប់ផ្តើមនៅមុនដំណាច់ឆ្នាំ២០២០នេះតែម្តងផង។
ចុះផ្សាយនៅថ្ងៃ៖
ស្តាប់ - ០២:១១
យុទ្ធនាការចាក់ថ្នាំបង្ការប្រឆាំងកូវីដនៅអឺរ៉ុប ដែលគ្រោងធ្វើជាបឋម នៅខែមករាឆ្នាំ២០២១ ទំនងអាចចាប់ផ្តើមបាននៅមុនដំណាច់ឆ្នាំនេះ ឬសប្តាហ៍ក្រោយផង។ នៅទីបំផុត ក្រោមគំនាបរបស់អាល្លឺម៉ង់ ភ្នាក់ងារឱសថអឺរ៉ុបដែលជាអ្នកផ្តល់សិទ្ធិប្រើប្រាស់ថ្នាំ នឹងត្រូវផ្តល់សេចក្តីសម្រេចឱ្យប្រើថ្នាំបង្ការប្រឆាំងកូវីដ១៩របស់ក្រុមហ៊ុន Pfizer-BioNTech នៅថ្ងៃទី ២១ ធ្នូ មិនមែនថ្ងៃទី ២៩ធ្នូទេ។
ដូច្នេះ នៅពេល “បានទទួលការអនុញ្ញាតភ្លាម យុទ្ធនាការចាប់ថ្នាំបង្ការត្រូវចាប់ផ្តើមភ្លាម ! ក្នុងពេលដ៏ឆាប់បំផុត តាមដែលអាចធ្វើទៅបាន ហើយត្រូវចាប់ផ្តើមក្នុងថ្ងៃតែមួយ នៅតាមគ្រប់ប្រទេសជាសមាជិកអឺរ៉ុបទាំង២៧”។ នេះបើតាមការអះអាងរបស់លោកស្រីប្រធានគណៈកម្មការអឺរ៉ុប Ursula von der Leyen ដោយសន្យាថានឹងប្រឹងឱ្យអស់សមត្ថភាពក្នុងការដាក់ឱ្យដំណើរការថ្នាំបង្ការរបស់ក្រុមហ៊ុន លើទីផ្សារអឺរ៉ុប ពីរថ្ងៃក្រោយការអនុញ្ញាតរបស់អាជ្ញាធរឱសថអឺរ៉ុប។
ថ្នាំបង្ការកូវីដ១៩ ដែលបញ្ជាទិញរួមដោយអឺរ៉ុប នឹងត្រូវចែកចាយដល់ប្រទេសជាសមាជិក តាមក្បួនសមមាត្រ ប្រទេសមានប្រជាជនច្រើន ទទួលបានច្រើន ប្រជាជនតិចទទួលបានបរិមាណតិច និងមានបរិមាណគ្រប់គ្រាន់សម្រាប់ពលរដ្ឋអឺរ៉ុបគ្រប់រូប។ នេះបើតាមការបញ្ជាក់បន្ថែមរបស់លោកស្រីប្រមុខសហភាពអឺរ៉ុប។
អឺរ៉ុបទាំង២៧នឹងផ្តើមចាប់ថ្នាំបង្ការក្នុងថ្ងៃតែមួយ ជាសកម្មភាពប្រកបដោយនិម្មិត្តរូបណាស់ ប៉ុន្តែវាដូចជាយឺតយ៉ាវជាងគេខ្លាំងណាស់ មែនទេ ? ចិន រុស្ស៊ី អង់គ្លេស សហរដ្ឋអាមេរិក និងកាណាដា ព្រមទាំងបណ្តាប្រទេសជាច្រើនទៀត ដូចយ៉ាងម៉ិចស៊ិក អារ៉ាប៊ីសាអូឌីត បានផ្តើមយុទ្ធនាការចាក់ថ្នាំបង្ការ តាំងពីប៉ុន្មានថ្ងៃមកហើយមែន តែវាមិនមែនជាយឺតយ៉ាវទេសម្រាប់អឺរ៉ុប ព្រោះអឺរ៉ុបត្រូវការគិតគូរឱ្យបានល្អិតល្អន់អំពីគុណភាពនៃថ្នាំវ៉ាក់សាំង ថាពិតជាមានប្រសិទ្ធភាពជាប្រាកដសិន ទើបចាក់ជូនពលរដ្ឋ។ នេះបើតាមការពន្យល់របស់លោក Alain Fisher ប្រធានក្រុមប្រឹក្សាដឹកនាំយុទ្ធសាស្ត្រថ្នាំបង្ការអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ