កូវីដ១៩៖បារាំងលើកការបិទខ្ទប់ប្រទេស តែដាក់ជំនួសវិញដោយបំរាមគោចរពីម៉ោង ៨យប់ដល់ម៉ោង ៦ភ្លឺ
នៅក្នុងប្រទេសបារាំង ការបិទខ្ទប់ប្រទេសលើកទី២ រយៈពេល ១ខែកន្លះត្រូវបានលើកចេញវិញនាថ្ងៃទី១៥ ធ្នូ។ តែត្រូវដាក់ជំនួសវិញដោយបំរាមគោចរពីម៉ោង ៨យប់ដល់ម៉ោង ៦ភ្លឺចាប់ពីថ្ងៃទី១៥ ធ្នូដល់ថ្ងៃទី៧ មករា ឆ្នាំ ២០២១។ ដោយឡែក ពិភពលោកវប្បធម៌ ហាងកាហ្វេ និងភោជនីយដ្ឋាននឹងបន្តបិទទ្វាររហូតដល់ថ្ងៃទី ២០មករា។ តែនាយករដ្ឋមន្រ្តីលោកហ្សង់ កាស្តិចបានបញ្ជាក់នៅក្នុងបទសម្ភាសន៍ជាមួយវិទ្យុមួយក្នុងថ្ងៃអង្គារ ទី១៥ ធ្នូថា ការបើកពិភពលោកវប្បធម៌ ហាងកាហ្វេ និងភោជនីយដ្ឋានឲ្យមានដំណើរការឡើងវិញចាប់ពីថ្ងៃទី២០ មករាក៏នៅមិនទាន់ច្បាស់ដែរ។
ចុះផ្សាយនៅថ្ងៃ៖
ស្តាប់ - ០២:៤៩
ចាប់ពីថ្ងៃទី១៥ ធ្នូ ឆ្នាំ ២០២០ដល់ថ្ងៃទី៧ មករា ឆ្នាំ ២០២១ ពលរដ្ឋបារាំងអាចធ្វើដំណើរបានដោយសេរីដោយមិនចាំបាច់បំពេញលិខិតអនុញ្ញាតទៀតឡើយ។ តែការធ្វើដំណើរដោយសេរីនេះមានត្រឹមពីម៉ោង ៦ព្រឹកដល់ម៉ោង ៨យប់ប៉ុណ្ណោះ ព្រោះការលើកចេញវិញនូវការបិទខ្ទប់ប្រទេសរយៈពេល ១ខែកន្លះកន្លងទៅត្រូវបានដាក់ជំនួសវិញដោយបំរាមគោចរ។ ពលរដ្ឋដែលធ្វើដំណើរនៅចន្លោះពីម៉ោង ៨យប់ដល់ម៉ោង ៦ភ្លឺត្រូវបំពេញលិខិតអនុញ្ញាត ពិសេសអ្នកចេញទៅធ្វើការ ទៅមើលសាច់ញាតិមានធុរៈ ឬទៅជួបពេទ្យ។ បើគ្មានហេតុផលត្រឹមត្រូវទេនឹងទទួលការផាកពិន័យចំនួន ១៣៥អឺរ៉ូ។ តែបំរាមគោចរនេះមិនជាប់ពាក់ព័ន្ធនឹងយប់ថ្ងៃទី២៤ និង ២៥ធ្នូដែលជាថ្ងៃបុណ្យណូអែលទេ។
រហូតមកទល់ពេលនេះ ហាងលក់ទំនិញគ្រប់ប្រភេទបានអនុញ្ញាតឲ្យបើកទ្វារឡើងវិញ។ គឺលើកលែងតែពិភពវប្បធម៌ ដូចជារោងកុន រោងល្ខោន និងហាងកាហ្វេ រួមទាំងភោជនីយដ្ឋាននឹងត្រូវបន្តបិទទ្វាររហូតដល់ថ្ងៃទី២០ មករា ឆ្នាំ ២០២១។ តើចាប់ពីថ្ងៃទី២០ មករាឆ្នាំក្រោយទៅ រោងកុន រោងល្ខោន ហាងកាហ្វេ និងភោជនីយដ្ឋានអាចបើកទ្វារទទួលភ្ញៀវឡើងវិញបានទេ?។ មិនធានាទេ ព្រោះអ្វីៗវាអាស្រ័យលើការវិវឌ្ឍន៍ជាក់ស្តែងរបស់កូវីដ១៩ និងអាស្រ័យលើអកប្បកិរិយារបស់ពលរដ្ឋម្នាក់ៗក្នុងពេលប្រារព្ធពិធីបុណ្យណូអែល និងឆ្លងឆ្នាំថ្មី នេះជាចម្លើយរបស់នាយករដ្ឋមន្រ្តីលោកហ្សង់ កាស្តិចនៅក្នុងបទសម្ភាសន៍ជាមួយវិទ្យុមួយនាព្រឹកថ្ងៃទី១៥ ធ្នូ។
នៅក្រោយចម្លើយរបស់លោកកាស្តិច ក្រុមបុគ្គលិកក្នុងវិស័យពាក់ព័ន្ធនឹងវិធានការនេះបាននាំគ្នាធ្វើបាតុកម្មក្នុងទីក្រុងប៉ារីស និងទីក្រុងផ្សេងទៀតក្នុងប្រទេសបារាំង។ ម្ចាស់ភោជនីយដ្ឋានបានចោទជាសំណួរថា តើភោជនីយដ្ឋានជាកន្លែងចម្លងវីរុសកូវីដ១៩ ឬ?។ ពិតណាស់ នេះជាចម្លើយរបស់លោកកាស្តិចដោយលោកសំអាងលើលទ្ធផលសិក្សារបស់ក្រុមអ្នកវិទ្យាសាស្រ្ត។ ដោយឡែក និងដើម្បីកម្រិតហានិភ័យនៃការចម្លងកូវីដ១៩នៅមុនពេលវ៉ាកងរបស់សិស្សសាលាដែលចាប់ផ្តើមនៅថ្ងៃសៅរ៍ ទី១៩ ធ្នូ លោកកាស្តិចបានលើកសំណើរបស់ក្រុមប្រឹក្សាវិទ្យាសាស្រ្តដែលស្នើឲ្យសិស្សឈប់ ២ថ្ងៃមុន ពោលចាប់ពីថ្ងៃព្រហស្បតិ៍ ទី១៧ ធ្នូ។
ក្រៅពីនៅសាលា ក្រុមប្រឹក្សាវិទ្យាសាស្រ្តក៏បានផ្តល់អនុសាសន៍ឲ្យអ្នកដែលគ្រោងទៅជួបជុំក្រុមគ្រួសារក្នុងថ្ងៃបុណ្យណូអែលទី២៤ ធ្នូ និងថ្ងៃឆ្លងឆ្នាំថ្មីទី៣១ ធ្នូត្រូវធ្វើស្វ័យចត្តាឡីស័កមួយសប្តាហ៍មុននឹងចេញទៅជួបជុំគ្រួសារ។ គួរបញ្ជាក់ថានៅបារាំងសព្វថ្ងៃ ចំនួនអ្នកឆ្លងថ្មីជាមធ្យមក្នុងមួយថ្ងៃមានជាង ១០ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ