បារាំង៖លោកម៉ាក្រុងអំពាវនាវឲ្យមានកិច្ចសហប្រតិបត្តិការជាលក្ខណៈអន្តរជាតិស្តីពីសុខភាពមនុស្ស សត្វ និងបរិស្ថាន
នៅថ្ងៃអង្គារ ទី៨ ធ្នូ ប្រធានាធិបតីបារាំងលោកអេម៉ានុយអែល ម៉ាក្រុងបានអំពាវនាវឲ្យមានកិច្ចសហប្រតិបត្តិការជាលក្ខណៈអន្តរជាតិស្តីពីសុខភាពមនុស្ស សត្វ និងបរិស្ថាន។ កម្មវត្ថុនៃកិច្ចសហប្រតិបត្តិមួយនេះ គឺដើម្បីបង្ការទប់ស្កាត់នូវជំងឺឆ្លងរាតត្បាតនាពេលអនាគត។ ការអំពាវនាវរបស់លោកម៉ាក្រុងបានធ្វើឡើងនៅក្នុងសុន្ទរកថារបស់លោកដែលចាក់ផ្សាយនាការបិទបញ្ចប់សន្និសីទវិទ្យាសាស្រ្តរៀបចំដោយបណ្តាញឆ្លុះបញ្ចាំងពីអនាគតវិស័យកសិកម្ម។
ចុះផ្សាយនៅថ្ងៃ៖
ស្តាប់ - ០២:០១
សន្និសីទវិទ្យាសាស្រ្តរៀបចំដោយបណ្តាញឆ្លុះបញ្ចាំងពីអនាគតវិស័យកសិកម្មបានចូលរួមដោយក្រុមអ្នកវិទ្យាសាស្រ្ត ក្រុមគ្រូពេទ្យ ក្រុមអ្នកជំនាញកសិកម្ម ក្រុមអ្នកចិញ្ចឹមសត្វ និងក្រុមអ្នកបរិស្ថាន។ « ការសន្យារបស់អស់លោកក្នុងការគិតគូរពីបញ្ហាកសិកម្ម និងផែនដីសម្រាប់ពេលអនាគតគឺសំខាន់ណាស់ »នេះជាការថ្លែងរបស់ប្រធានាធិបតីបារាំងលោកម៉ាក្រុង។ តាមប្រមុខរដ្ឋបារាំង ជំងឺឆ្លងរាតត្បាតដែលពិភពលោកកំពុងជួបប្រទះពេលនេះជាការទាញសញ្ញាអាសន្នមួយ។ អន្តរាគមន៍របស់ប្រមុខរដ្ឋបារាំងនៅក្នុងសន្និសីទវិទ្យាសាស្រ្តបានធ្វើឡើង បន្ទាប់ពីលោកបានប្រកាសពីការបង្កើតនូវក្រុមប្រឹក្សាអន្តរជាតិនៃអ្នកជំនាញជាន់ខ្ពស់មួយដោយដាក់ឈ្មោះ « One health » ឬប្រែថា « សុខភាពមួយ »។
ទស្សនៈ « សុខភាពមួយ » នេះជាការចម្លងយកគំរូពីក្រុមអ្នកជំនាញអន្តររដ្ឋាភិបាលស្តីពីការប្រែប្រួលអាកាសធាតុ និងអង្គការអន្តរជាតិស្តីពីសុខភាពសត្វ។ លោកម៉ាក្រុងបានបញ្ជាក់ថា នៅក្នុងសង្វាក់ជីវសាស្រ្តដែលប្រមូលផ្តុំ « សុខភាពមនុស្ស » « សុខភាពសត្វ » និង « សុខភាពប្រព័ន្ធអេកូឡូស៊ី »ក្រុមកសិករជាអ្នកធានាសុខភាពនៃការមានជីវិត។ ទន្ទឹមគ្នានេះ ប្រមុខរដ្ឋបារាំងក៏បានឡើងពីការពង្រឹងវិស័យកសិកម្មដើម្បីចិញ្ចឹមមនុស្សលោកដោយគិតគូរពីការថែរក្សាជីវចម្រុះ និងការប្រយុទ្ធប្រឆាំងនឹងបម្រែបម្រួលអាកាសធាតុ។ លោក Thierry Lefrançois នាយកនៃការអភិវឌ្ឍន៍ប្រព័ន្ធជីវសាស្រ្តបានយល់ឃើញពីការបាត់បង់ចំណងទាក់ទងរវាងជីវចម្រុះ ការកាប់បំផ្លាញព្រៃឈើ និងសុខភាព។
ចំណែកលោក Jean-Pierre Rennaud ប្រធានក្រុមប្រឹក្សាវិទ្យាសាស្រ្តផែនដី A បានគូសបញ្ជាក់ថា ទស្សនៈ « សុខភាពមួយ » ត្រូវបានអង្គការសហប្រជាជាតិបង្កើតឡើងតាំងពីឆ្នាំ ២០១០ មកម្ល៉េះ តែនៅ ១០ឆ្នាំក្រោយមក ទស្សនៈមួយនេះហាក់មិនសូវចម្រើនទៅមុខសោះ។ តាមលោក Rennaud ការដែលប្រធានាធិបតីបារាំងចង់ជំរុញសក្ដានុពលអន្តររដ្ឋលើទស្សនៈមួយនេះ គឺជាសញ្ញាល្អមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ