Oxfam ទាមទារឲ្យអឺរ៉ុបចាត់វិធានការលើការបញ្ចេញឧស្ម័នកាបូនិចដោយអ្នកមានចំណូលខ្ពស់
សហភាពអឺរ៉ុបចាំបាច់ត្រូវតែចាត់វិធានការកាត់បន្ថយការបញ្ចេញឧស្ម័នកាបូនិចដោយអ្នកមាន ហើយក្នុងពេលជាមួយគ្នា គឺត្រូវបង្កើនជំនួយដល់ប្រជាជនក្រីក្រដើម្បីអាចប្រយុទ្ធប្រឆាំងនឹងការប្រែប្រួលអាកាសធាតុទៅតាមគោលនយោបាយមួយប្រកបដោយសមធម៌ នេះជាការទាមទាររបស់អង្គការ Oxfam ក្នុងថ្ងៃអង្គា ទី៨ ធ្នូ។ ការទាមទាររបស់ Oxfam ធ្វើឡើងតែប៉ុន្មានថ្ងៃប៉ុណ្ណោះ មុនជំនួបកំពូលដាក់ចេញនូវគោលដៅថ្មីសម្រាប់ការកាត់បន្ថយការបញ្ចេញឧស្ម័ន ត្រឹមឆ្នាំ២០៣០ខាងមុខ។
ចុះផ្សាយនៅថ្ងៃ៖
យោងការសិក្សាមួយរបស់ Oxfam ការកាត់បន្ថយការបញ្ចេញឧស្ម័នផ្ទះកញ្ចាក់ដោយសហភាពអឺរ៉ុបរហូតមកទល់នឹងបច្ចុប្បន្នត្រូវបានធ្វើឡើងដោយមិនស្មើភាពគ្នាទេ។ ការសិក្សាដដែលបានបង្ហាញថានៅក្នុងចន្លោះពីឆ្នាំ១៩៩០ ដល់ឆ្នាំ២០១៥ ការបញ្ចេញឧស្ម័នដោយប្រជាជនដែលមានចំណូលទាបនិងមធ្យមបានធ្លាក់ចុះ។ ក៏ប៉ុន្តែ ការបញ្ចេញឧស្ម័នដោយអ្នកមានចំណូលខ្ពស់នៅតែបន្តកើនឡើងនៅក្នុងកម្រិតមួយដែលមិនអាចទទួលយកបាន។ គិតជាសរុប ពលរដ្ឋសហភាពអឺរ៉ុបតែ ១០% ដែលមានប្រាក់ចំណូលខ្ពស់ទទួលខុសត្រូវចំពោះការបញ្ចេញឧស្ម័នផ្ទះកញ្ចក់រហូតដល់ទៅ ២៧% នៃការបញ្ចេញឧស្ម័នផ្ទះកញ្ចក់សរុបនៅក្នុងសហភាពអឺរ៉ុបទាំងមូល។
Oxfam បានគូសបញ្ចាក់ថា ដើម្បីគោរពឲ្យបាននូវកិច្ចព្រមព្រៀងក្រុងប៉ារីសឆ្នាំ ២០១៥ ស្តីពីអាកាសធាតុ សហភាពអឺរ៉ុបត្រូវកាត់បន្ថយឧស្ម័នផ្ទះកញ្ចាក់ឲ្យបានយ៉ាងតិច ៦៥% ពីពេលនេះទៅឆ្នាំ ២០៣០ ធៀបនឹងកម្រិតឆ្នាំ ១៩៩០។ គណៈកម្មការអឺរ៉ុបបានស្នើឲ្យកាត់បន្ថយឧស្ម័នផ្ទះកញ្ចាក់នៅអឺរ៉ុបឲ្យបានយ៉ាងតិច ៦៥% ពីពេលនេះទៅឆ្នាំ ២០៣០ តែសភាបានទាមទារឲ្យកាត់បន្ថយ ៦០%។ យ៉ាងណាក៏ដោយ ថ្នាក់ដឹកនាំអឺរ៉ុបទាំង ២៧ប្រទេសសមាជិកត្រូវកំណត់យកកម្មវត្ថុមួយនាកិច្ចប្រជុំកំពូលរយៈពេល ២ថ្ងៃចាប់ពីថ្ងៃព្រហស្បត្តិ៍ ទី១០ ធ្នូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ