អង្គការសហប្រជាជាតិ បើកវេទិកាកំពូលវិសាមញ្ញ ស្តីអំពីវ៉ាក់សាំងប្រឆាំងកូវីដ១៩
នៅថ្ងៃទី៣ និងទី៤ធ្នូ អង្គការសហប្រជាជាតិ ត្រូវបើកវេទិកាកំពូលវិសាមញ្ញ តាមប្រព័ន្ធវីស្យូខុនហ្វឺរិនស៍ ដើម្បីពិភាក្សាស្តីអំពី យុទ្ធសាស្ត្ររួម ក្នុងការចែកចាយ និងចាក់វ៉ាក់សាំងប្រឆាំងកូវីដ១៩។ ប្រមុខរដ្ឋ រដ្ឋមន្រ្តីក្រសួងសុខាភិបាល ចំនួន១៤០ប្រទេស ព្រមទាំងតំណាងមន្ទីរពិសោធន៍ផលិតឱសថមួយចំនួន នឹងចូលរួមក្នុងកិច្ចប្រជុំពិសេសនេះ។
ចុះផ្សាយនៅថ្ងៃ៖
ខណៈដែលប្រទេសធំៗមួយចំនួន ដូចជាសហរដ្ឋអាមេរិក អង់គ្លេស និងរុស្សីជាដើម បានប្រកាសថានឹងចាប់ផ្តើមបើកយុទ្ធនាការចាក់វ៉ាក់សាំងកូវីដ១៩ មុនគេ អង្គការសហប្រជាជាតិ ចង់យកវេទិការប្រជុំពិសេសនេះ ជំរុញឲ្យមានការសហការគ្នាទូទាំងពិភពលោកតែម្តង ដើម្បីផលិត ចែកចាយ ដឹកជញ្ជូន បើកយុទ្ធនាការចាក់ ឲ្យមានសមភាព។
សម្រាប់អង្គការសហប្រជាជាតិ ការយកតែរួចខ្លួន តាមប្រទេសនីមួយៗតែម្នាក់ឯង មិនមែនជារឿងល្អឡើយ ព្រោះវិបត្តិឆ្លងរាលដាល នៃកូវីដ១៩នេះ គឺជា វិបត្តិសកល ដែលតម្រូវឲ្យមានយុទ្ធសាស្ត្រសកលដែរ។
ដោយឡែក អង្គការក្រៅរដ្ឋាភិបាលមួយចំនួន ក៏បានក្រើនរំលឹកផងដែរ អំពីសារៈសំខាន់ ក្នុងការប្រយុទ្ធប្រឆាំង នឹងការផ្សព្វផ្សាយព័ត៌មានមិនពិត ស្តីអំពីគ្រោះថ្នាក់នៃថ្នាំវ៉ាក់សាំងប្រឆាំងកូវីដ ដែលបញ្ហានេះ វាធ្វើឲ្យប្រជាជនទូទៅមានភាពរុញរា មិនហ៊ានទទួលការចាក់វ៉ាក់សាំង។ ដូច្នេះ ប្រទេសទាំងអស់ ត្រូវតែធ្វើការបែងចែកចំណេះដឹង ព្រម-ទាំងទិន្នន័យប្រសិទ្ធិភាព នៃវ៉ាក់សាំង ឲ្យមានតម្លាភាពបំផុត ដើម្បីឲ្យប្រជាពលរដ្ឋទូទៅ មានការទុកចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ