បារាំង៖ មហាបាតុកម្មប្រឆាំងនឹងគម្រោងច្បាប់ « សន្តិសុខរួម »
នៅទីក្រុងប៉ារីស ក៏ដូចជានៅតាមទីក្រុងធំៗមួយចំនួននៃប្រទេសបារាំង កាលពីរសៀលថ្ងៃសៅរ៍ ទី២៨វិច្ឆិកា មានមនុស្សជាច្រើនពាន់នាក់ បានធ្វើបាតុកម្ម ប្រឆាំងនឹងគម្រោងច្បាប់សន្តិសុខរួម ដែលរដ្ឋាភិបាលបារាំង បានដាក់ស្នើទៅកាន់រដ្ឋសភា។ ក្នុងចំណោមចំណុចដែលរងនូវការតវ៉ា គឺមានមាត្រាមួយដែលកំណត់ ផ្ទន្ទាទោសមនុស្សដែលថតវីដេអូ សកម្មភាពអន្តរាគមន៍របស់សមត្ថកិច្ច ហើយយកវាទៅផ្សព្វផ្សាយ ដើម្បីបង្កបញ្ហាដល់សមត្ថកិច្ច។
ចុះផ្សាយនៅថ្ងៃ៖
ស្តាប់ - ០២:៥៧
មនុស្សជាច្រើនពាន់នាក់ បានប្រមូលផ្តុំគ្នាធ្វើបាតុកម្ម នៅក្នុងសង្កាត់ Bastille និងទីលាន Place de la République កណ្តាលទីក្រុងប៉ារីស ដើម្បីប្រឆាំងនឹងគម្រោងច្បាប់ « សន្តិសុខរួម » (Loi Sécurité globale)។ បាតុករហឹង្សាខ្លះ ស្លៀកខ្មៅពាក់ខ្មៅ បាននាំគ្នាដុតបំផ្លាញរថយន្ត ធុងសំរាម និងជំរកចាំរថយន្តក្រុង នៅតាមផ្លូវ ព្រមទាំងបានយកសម្ភារៈការដ្ឋានសំណង់ ដើម្បីដាក់បាំងជារនាំថែមទៀតផង។ បាតុករខ្លះទៀត បានគាស់ដុំថ្ម គប់ទៅលើសមត្ថកិច្ច យ៉ាងអាណាធិបតេយ្យបំផុត។
ក្រៅពីដើម្បីប្រឆាំងនឹងគម្រោងច្បាប់សន្តិសុខរួម បាតុកម្មដែលមានសឹងតែទូទាំងប្រទេសនេះ បានសំដៅផងដែរ បរិហាអំពីសកម្មភាពបង្រ្កាបដោយហិង្សា របស់នគរបាល ហើយដែលករណីខ្លះ គឺជាអំពើរើសអើងប្រកាន់ពូជសាសន៍ មកលើប្រជាជន។ ពាក្យថា « នគរបាលហិង្សា » ឬ « យើងស្អប់នគរបាល » បានបន្លឺចេញពីមាត់បាតុករសឹងតែគ្រប់ៗគ្នា។
សូមបញ្ជាក់ថា នៅក្នុងគម្រោងច្បាប់សន្តិសុខរួម ដែលរដ្ឋាភិបាលបារាំង បានស្នើទៅកាន់សភា មានមាត្រាមួយ គឺមាត្រា២៤ ដែលបានកំណត់ ផ្តន្ទាទោសការថតនិងផ្សព្វផ្សាយវីដេអូ ក្នុងពេលសមត្ថកិច្ចធ្វើអន្តរាគមន៍ បើការផ្សព្វផ្សាយនេះ ធ្វើទៅក្នុងគោលបំណងអាក្រក់ណាមួយ មកលើសមត្ថកិច្ច។ សមាជិកសភា ក៏ដូចជាសមាជិករដ្ឋភិបាលដែលគាំទ្រមាត្រានេះ បានអះអាងថា ស្មារតីរបស់មាត្រា គឺដើម្បីធានាការពារការងាររបស់សមត្ថកិច្ច ដែលប្រឈម និងរងនូវអំពើហិង្សាកាន់តែច្រើនឡើង ដោយសារតែការថតវីដេអូផ្សព្វផ្សាយ បង្ហាញអត្តសញ្ញាណរបស់ពួកគេ នៅតាមបណ្តាញសង្គម។
យ៉ាងណាក៏ដោយ មាត្រាច្បាប់នេះ បានបង្កឲ្យមានការតវ៉ា ពីសំណាក់មតិប្រជាជនភាគច្រើន និងជាពិសេស ពីសំណាក់ ក្រុមអ្នកកាសែត និងអង្គការការពារសិទ្ធិមួយចំនួនផង ដោយគេលើកឡើងថា វាមានខ្លឹមសាររិតត្បិតសិទ្ធិសេរីភាព ក្នុងការផ្សព្វផ្សាយព័ត៌មាន។ ជាងនេះទៀត ការថតវីដេអូ ក្នុងពេលអន្តរាគមន៍របស់សមត្ថកិច្ច គឺជាវិធីតែមួយគត់ ដើម្បីទប់ទល់ជាមួយ ការប្រើកម្លាំងហួសប្រមាណ ដោយហិង្សារបស់សមត្ថកិច្ច។
យ៉ាងណាមិញ ក្នុងពេលដែលកំពុងតែមានការតវ៉ា ទាក់ទិននឹងមាត្រាច្បាប់នេះ ស្រាប់តែមួយករណី បែកធ្លាយវីដេអូ នគរបាលបារាំង ធ្វើសកម្មភាពវាយដំទៅលើបុរសស្បែកខ្មៅម្នាក់ យ៉ាងដំណំ កាលពីថ្ងៃព្រហស្បតិ៍ទី២៦វិច្ឆិកា។ បញ្ហានេះ វាបានមកបន្ថែម ពីលើកំហិងរបស់បាតុករ ក៏ដូចជាអ្នកតវ៉ាបរិហារ អំពីអំពើហិង្សារបស់នគរបាលបារាំង ដែលកាន់តែមានទំរង់ធ្ងន់ធ្ងរឡើង។
បច្ចុប្បន្នច្បាប់ សន្តិសុខរួមនេះ ត្រូវបានសភាជាតិបារាំង សម្រេចអនុម័តយល់ព្រម និងបញ្ជូនបន្តទៅកាន់ព្រឹទ្ធសភា។ ប្រឈមនឹងការតវ៉ាកាន់តែខ្លាំងឡើង លោកនាយករដ្ឋមន្ត្រីបារាំង បានធានាអះអាង នៅថ្ងៃទី២៧វិច្ឆិកាថា លោកនឹងបង្កើតគណៈកម្មការឯករាជ្យមួយ ដើម្បីពិនិត្យលើខ្លឹមសារនៃច្បាប់នេះឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ