របាយការណ៍៖យុទ្ធនាការបោសសម្អាតគ្រាប់មីន និងផ្តល់ជំនួយដល់ជនរងគ្រោះក្នុងលោកកំពុងរំខានដោយវិបត្តិកូវីដ១៩
នៅថ្ងៃព្រហស្បតិ៍ ទី១២ វិច្ឆិកា អង្គការឃ្លាំមើលគ្រាប់មីនបានផ្សព្វផ្សាយរបាយការណ៍ប្រចាំឆ្នាំ ២០២០ ជាសាធារណៈស្តីពីយុទ្ធនាការបោសសម្អាតគ្រាប់មីន និងយុទ្ធនាការផ្តល់ជំនួយដល់ជនរងគ្រោះ។ របាយការណ៍បានបញ្ជាក់ថា យុទ្ធនាការបោសសម្អាតគ្រាប់មីនរួមទាំងយុទ្ធនាការផ្តល់ជំនួយដល់ជនរងគ្រោះត្រូវបានផ្អាកដោយវិបត្តិជំងឺកូវីដ១៩។ ទន្ទឹមគ្នានេះ របាយការណ៍ក៏បានកត់សម្គាល់ឃើញពីកណើនជនរងគ្រោះស៊ីវិលដោយគ្រាប់មីនប្រឆាំងមនុស្ស និងដោយសំណល់ជាតិផ្ទុះក្នុងសម័យសង្រ្គាម។ បន្ទាប់មក អង្គការឃ្លាំមើលគ្រាប់មីនក៏បានសម្តែងក្តីបារម្ភចំពោះការធ្លាក់ចុះថវិកាសម្រាប់ប្រតិបត្តិការដោះគ្រាប់មីនដែរ។
ចុះផ្សាយនៅថ្ងៃ៖
ស្តាប់ - ០១:៥៨
ក្នុងឆ្នាំ ២០១៩ កន្លងទៅ មានជនរងគ្រោះដោយគ្រាប់មីន និងសំណល់ជាតិផ្ទុះផ្សេងទៀតយ៉ាងតិច ៥ ៥៥៤នាក់ ក្នុងនោះមានកូនក្មេងយ៉ាងតិចចំនួន ១ ៥៦២នាក់ និងមានស្លាប់យ៉ាងតិចចំនួន ២ ១៧០នាក់នៅក្នុងរដ្ឋ និងដែនដីសរុបចំនួន ៥៥។ បើធៀបនឹងឆ្នាំ ២០១៨ និងឆ្នាំ ២០១៦ ចំនួនជនរងគ្រោះបានធ្លាក់ចុះ តែមានការកើនឡើង បើធៀបនឹងឆ្នាំ ២០១៣ ដែលមានតែ ៣ ៤៥៧នាក់។ ម្យ៉ាងទៀត និងបើផ្អែកលើរបាយការណ៍របស់អង្គការឃ្លាំមើលគ្រាប់មីនដដែល ភាគច្រើននៃចំនួនជនរងគ្រោះជាស៊ីវិលក្នុងឆ្នាំ ២០១៩ ជាបុរស និងចំនួនច្រើនមានអាយុក្រោម ១៨ឆ្នាំ។ របាយការណ៍បានកត់សម្គាល់ឃើញពីកំណើនចំនួនជនរងគ្រោះដោយគ្រាប់មីនតាំងពីឆ្នាំ ២០១៤ នៅក្នុងប្រទេសមួយក្តាប់តូចដែលកំពុងស្គាល់សន្ទុះជម្លោះប្រដាប់អាវុធ។
ភូមាជាប្រទេសតែមួយគត់ដែលគ្រាប់មីនប្រឆាំងមនុស្សត្រូវបានប្រើដោយក្រុមប្រដាប់អាវុធមិនមែនរដ្ឋាភិបាល និងកម្លាំងរដ្ឋាភិបាលតាំងពីពាក់កណ្តាលឆ្នាំ ២០១៩។ នៅក្នុងប្រទេសផ្សេងដូចយ៉ាងអាហ្វហ្កានីស្ថាន កូឡុំប៊ី ឥណ្ឌា លីប៊ី និងប៉ាគីស្ថាន គ្រាន់មីនប្រឆាំងមនុស្សត្រូវបានប្រើច្រើនដោយក្រុមប្រដាប់អាវុធមិនមែនរដ្ឋាភិបាល។ តាមរបាយការណ៍របស់អង្គការឃ្លាំមើលគ្រាប់មីន មានផ្ទៃដីយ៉ាងតិច ១៥៦គីឡូម៉ែត្រក្រឡាត្រូវបានបោសសម្អាតគ្រាប់មីនក្នុងឆ្នាំ ២០១៩ ពិសេសនៅក្នុងប្រទេសអាហ្វហ្កានីស្ថាន កម្ពុជា ក្រូអាស៊ី និងអ៊ីរ៉ាក់ ហើយមានគ្រាប់មីនជាង ១២៣ ០០០គ្រាប់ត្រូវបានដោះ និងកម្ទេចចោល។
តែរបាយការណ៍បានបញ្ជាក់ថា យុទ្ធនាការបោសសម្អាតគ្រាប់មីនក្នុងឆ្នាំ ២០២០ ត្រូវបានផ្អាកដោយសារវិបត្តិកូវីដ១៩ ហើយយុទ្ធនាការផ្តល់ជំនួយដល់ជនរងគ្រោះក៏កំពុងជួបភាពរអាក់រអួលខ្លាំងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ