កូវីដ១៩៖ ក្រោយបិទប្រទេស១០ថ្ងៃមក បារាំងនៅតែស្ថិតនៅក្នុងភាពអាសន្នដដែល
ប្រឈមនឹងការឆ្លងរាលដាលជម្ងឺកូវីដ១៩ រដ្ឋាភិបាលបារាំង បានសម្រេចបិទខ្ទប់ប្រទេសឡើងវិញ ប្រមាណ១០ថ្ងៃមកហើយ។ ក៏ប៉ុន្តែជាការសង្កេតទូទៅ សន្ទុះនៃការឆ្លងរាលដាល នៅតែខ្លាំងដដែល ចំណែកអ្នកជំងឺកូវីដ១៩ ដែលមានស្ថានភាពធ្ងន់ធ្ងរ ត្រូវសង្គ្រោះបន្ទាន់នោះ ក៏កាន់តែកើនឡើងជានិច្ច ធ្វើឲ្យប្រព័ន្ធមន្ទីរពេទ្យបារាំង មានការព្រួយបារម្ភបំផុត។ រដ្ឋាភិបាលបារាំង កំពុងរងសំពាធជាខ្លាំង រវាងប្រព័ន្ធមន្ទីរពេទ្យដែលទាមទារឲ្យរិតបន្តឹង ខណៈប្រព័ន្ធសេដ្ឋកិច្ចអាជីវកម្ម ទាមទារឲ្យបើកដំណើរការឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
តើឆ្លងកាត់១០ថ្ងៃ នៃការបិទខ្ទប់ប្រទេសទាំងស្រុងនេះ វាបានហុចផលវិជ្ជមានអ្វីខ្លះហើយ ក្នុងការប្រយុទ្ធប្រឆាំងនឹងការឆ្លងរាលដាល ជំងឺកូវីដ១៩? នេះគឺជាចំងល់ ដែលប្រជាជនបារាំង គ្រប់រូប ចោទសួរ និងអន្ទះអន្ទែងចង់ដឹងចម្លើយ ព្រោះថាគ្រប់គ្នា ហាក់ដូចជាអត់ទ្រាំលែងបានទៀតហើយ ចំពោះវិធានការការរិតត្បិតទាំងឡាយ។ ជាងនេះទៀត មានដំណឹងលេចឮថា រដ្ឋាភិបាលអាចនឹងសម្រេចបន្តបិទខ្ទប់ប្រទេស ថែមមួយខែទៀត ពោលគឺរហូតដល់ដើមខែមករា។
ឆ្លើយតបនឹងសំណួរអ្នកកាសែត នៅល្ងាចថ្ងៃអាទិត្យទី៨វិច្ឆិកា លោក Olivier Veran រដ្ឋមន្ត្រីក្រសួងសុខាភិបាលបារាំង បានលើកឡើងថា វិធានការបិទខ្ទប់ប្រទេស១០ថ្ងៃមកនេះ បានហុចផលវិជ្ជមានខ្លះហើយ ក៏ប៉ុន្តែសម្រាប់ពេលនេះ គេមិនត្រូវប្រញ៉ាប់ធ្វើការសន្និដ្ឋានពេកទេ។ លោកបានបញ្ជាក់ថា នៅសប្តាហ៍ក្រោយក្រសួងនឹងពិនិត្យទិន្នន័យ ហើយធ្វើការវិភាគសន្និដ្ឋាន ដើម្បីឲ្យប្រជាជនបានដឹង។
ដោយឡែក លោកវិជ្ជបណ្ឌិត Philippe Juvin ប្រធានផ្នែកសង្គ្រោះបន្ទាន់ នៅមន្ទីរពេទ្យ George Pompidou ក្រុងប៉ារីស បានលើកឡើងតាមទូរទស្សន៍ ដោយលោកបានក្រើនរំលឹកថា មិនត្រូវដកចេញនូវវិធានការបិទខ្ទប់ ដោយលឿនរហ័សជ្រុលពេកនោះទេ។ អាចដកចេញនូវវិធានការតឹងតែងទាំងនេះបាន ល្គឹកណា ការឆ្លងរាលដាលចុះអន់ថយ។
គួរបញ្ជាក់ថា គិតត្រឹម២៤ម៉ោងចុងក្រោយ នៅបារាំង មានអ្នកស្លាប់ដោយកូវីដ១៩ ចំនួន២៧១នាក់បន្ថែមទៀត ដែលធ្វើឲ្យចំនួនអ្នកស្លាប់សរុបទាំងអស់ គឺ៤០៤៣៩នាក់ នៅទូទាំងប្រទេស។ ចំនួនអ្នកជំងឺកូវីដ១៩ ដែលធ្ងន់ធ្ងរ ត្រូវការការសង្គ្រោះបន្ទាន់ បានកើនឡើងជាលំដាប់ ដោយនៅសប្តាហ៍កន្លងទៅ បានឡើងដល់ ៤៥២៧នាក់ ទល់នឹង ៣៧២១នាក់កាលពីសប្តាហ៍មុនមួយទៀត។ នៅតំបន់ខ្លះ មន្ទីរពេទ្យបានសម្រេចបញ្ជូនអ្នកជំងឺកូវីដ១៩ ទៅកាន់តំបន់ផ្សេងទៀត ដើម្បីកុំឲ្យចាល់អ្នកជំងឺខ្លាំង។ ដោយឡែក ចំនួនអ្នកឆ្លងកូវីដ១៩ ថ្មីបន្ថែមវិញ ក៏បានកើនឡើងឥតឈប់ ដោយនៅថ្ងៃសុក្រ សប្តាហ៍មុន មានរហូតដល់ទៅ៦ម៉ឺននាក់ក្នុងមួយថ្ងៃ ដែលនេះគឺជាកម្រិតខ្ពស់បំផុតមិនធ្លាប់មានទេ នៅបារាំង។
គួរកត់សំគាល់ផងដែរថា វិធានការបិទខ្ទប់ប្រទេសនេះ បានធ្វើឲ្យសេដ្ឋកិច្ចបារាំង ជួបការលំបាកជាខ្លាំង។ សហគមហាងទំនិញ និងភោជនីយដ្ឋានជាដើម បាននាំគ្នាតវ៉ា ទាមទារបើកដំណើរការអាជីវកម្មឡើងវិញ ឲ្យបានឆាប់ជាទីបំផុត។ លោកFrançois Villeroy de Galhau ទេសាភិបាលធនាគារជាតិបារាំង បាននិយាយថា ឆ្នាំ២០២០នេះ សេដ្ឋកិច្ចបារាំង និងដើរថយក្រោយចំនួនចន្លោះ ពី៩% ទៅ១០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ