ជម្លោះនៅតំបន់ការ៉ាបាក់៖អាស៊ែបៃហ្សង់ និងអាមេនីចោទគ្នាពីបទរំលោភលើបទឈប់បាញ់
នៅរសៀលថ្ងៃសៅរ៍ ទី១០ តុលា ប្រទេសអាស៊ែបៃហ្សង់ និងប្រទេសអាមេនីបានចោទគ្នាពីបទរំលោភលើកិច្ចព្រមព្រៀងឈប់បាញ់ដែលទើបចូលជាធរមាននាម៉ោង ១២ថ្ងៃត្រង់ក្នុងថ្ងៃសៅរ៍ដដែល។ កិច្ចព្រមព្រៀងឈប់បាញ់នេះជាលទ្ធផលនៃកិច្ចចរចារវាងប្រមុខការទូតអាស៊ែបៃហ្សង់ និងអាមេនីក្នុងប្រទេសរុស្ស៊ីកាលពីថ្ងៃសុក្រ ទី៩ ឆ្លងចូលថ្ងៃសៅរ៍ ទី១០ តុលាដោយមានប្រមុខការទូតរុស្ស៊ីធ្វើជាអាជ្ញាកណ្តាល។ ក្រសួងការពារអាស៊ែបៃហ្សង់បានថ្លែងថា អាមេនីបានបំពានលើបទឈប់បាញ់ដោយព្យាយាមវាយប្រហារលើស្រុកចំនួន ២ នៅតំបន់ការ៉ាបាក់។ ចំណែកក្រសួងការពារជាតិអាមេនីបានឆ្លើយបកវិញថា ការថ្លែងរបស់ក្រសួងការពារអាស៊ែបៃហ្សង់ជារឿងមិនពិត និងថា អាស៊ៃបៃហ្សង់ជាអ្នករំលោភលើបទឈប់បាញ់ដោយបានបើកការវាយប្រហារនៅម៉ោង ១២ និង ៥នាទី ពោល ៥នាទីក្រោយពីបទឈប់បាញ់បានចូលជាធរមាន។ គួររម្លឹកថា ក្រៅពីព្រមព្រៀងឈប់បាញ់ ភាគីជម្លោះទាំងពីរក៏ព្រមចូលតុចរចាដើម្បីដោះស្រាយជម្លោះដោយសន្តិវិធីដែរ។ តែលោកប៉ាស្កាល់ បូនីហ្វាស់ នាយកវិទ្យាស្ថានទំនាក់ទំនងអន្តរជាតិ និងយុទ្ធសាស្រ្តក្នុងប្រទេសបារាំងយល់ឃើញថា កិច្ចចរចារវាងភាគីជម្លោះទាំងពីរមិនមែនងាយស្រួលទេ។
ចុះផ្សាយនៅថ្ងៃ៖
ស្តាប់ - ០១:៣៤
« គេអាចគិតថា ជម្លោះរវាងអាស៊ែបៃហ្សង់ និងអាមេនីមិនទាន់អាចដោះស្រាយចប់សព្វគ្រប់ដោយសារតែកិច្ចចរចានឹងបើកធ្វើនៅពេលខាងមុខទេ។ មានគោលការណ៍ពីរដែលកំពុងដើរបញ្ច្រាស់ទិសគ្នាទាក់ទងនឹងជម្លោះនៅក្នុងតំបន់ការ៉ាបាក់។ គោលការណ៍ទី១ គឺបូរណភាពទឹកដី ប្រសិនបើគេផ្អែកលើគោលការណ៍ដែលថា តំបន់ការ៉ាបាក់ជាអធិបតេយ្យរបស់ប្រទេសអាស៊ៃបៃហ្សង់ និងដែលគ្មាននរណាម្នាក់បានទទួលស្គាល់ឯករាជ្យភាពរបស់តំបន់ការ៉ាបាក់។
គោលការណ៍ទី២ គឺសិទ្ធិសម្រេចរបស់ប្រជាជនដែលកំពុងរស់នៅក្នុងតំបន់ការ៉ាបាក់ដែលភាគច្រើនជាជនជាតិអាមេនី។ វាច្បាស់ណាស់ថា ប្រជាជនភាគច្រើននៅការ៉ាបាក់សព្វថ្ងៃពិតជាមិនចង់រស់នៅក្រោមការគ្រប់គ្រងរបស់ប្រទេសអាស៊ៃបៃហ្សង់ទេ។ ឃើញថា គោលការណ៍ទាំងពីរនេះផ្ទុយគ្នាស្រឡះ ហើយខ្ញុំមិនដឹងថា តើត្រូវធ្វើដូចម្តេចដើម្បីអាចច្របាច់ ឬផ្សះផ្សាគោលការណ៍ទាំងពីរនេះឲ្យចូលគ្នាបានឡើយ។ ក្នុងរយៈពេលកន្លងទៅ គេធ្លាប់បានសាកល្បងចង់ផ្តល់ស្វ័យភាពឲ្យតំបន់ការ៉ាបាក់នៅក្នុងក្របខណ្ឌដែលតំបន់នេះស្ថិតជាអធិបតេយ្យរបស់អាស៊ែបៃហ្សង់។
តែខ្ញុំមិនជឿថាអ្វីដែលកំពុងកើតមានពេលនេះ ប្រជាជនអាមេនីរស់ក្នុងតំបន់ការ៉ាបាក់យល់ព្រមត្រឡប់ទៅរស់ក្រោមអធិបតេយ្យរបស់អាស៊ែបៃហ្សង់ជាថ្មីនោះឡើយ។ ដូច្មេះការចរចាដែលនឹងបើកធ្វើនាពេលខាងមុខពិតជាពិបាកនឹងរកបាននូវដំណោះស្រាយមួយដែលអាចទទួលបានទាំងអស់គ្នាចំពោះជម្លោះមួយនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ