ព័រទុយហ្កាល់សមរភូមិប្រយុទ្ធថ្មីរវាងចិននិងសហរដ្ឋអាមេរិក ?
សហរដ្ឋអាមេរិកមិនសប្បាយចិត្តទេ បើព័រទុយហ្កាល់សេចក្តីសម្រេចចិត្តឱ្យក្រុមហ៊ុនចិនជាអ្នកសាងសង់ផែទទួលកប៉ាល់កុងតឺន័រនៅកំពង់ផែស៊ីណេស sines។ នេះបើតាមប្រសាសន៍របស់លោកឯកអគ្គរដ្ឋទូតអាមេរិកប្រចាំទីក្រុងលីស្បូន ដោយបានព្រមានឱ្យព័រទុយហ្កាល់ ជ្រើសរើសយកតែមួយ ក្នុងចំណោមអំណាចទាំងពីរគឺ អាមេរិក និងចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
កាលពីខែតុលាឆ្នាំ២០១៩ ព័រទុយហ្កាល់បានប្រកាសរកវិនិយោគបរទេសមកសាងសង់កំពង់ផែ ស៊ីណេស ពង្រីកជាផែកុងតឺន័រ ដែលអាចនឹងចាប់ដំណើរការនៅឆ្នាំ២០២៤។ នៅក្នុងចំណោមក្រុមហ៊ុនបរទេសជាច្រើនបានមកដាក់ពាក្យ និងមានសំណាងឈ្នះច្រើនជាងគេ មានក្រុមហ៊ុនយក្សផ្នែកដឹកជញ្ជូនជើងទឹកចិន Cosco ឬក្រុមហ៊ុន Shanghai International Port Group។ នេះបើតាមប្រភពសារព័ត៌មានក្នុងស្រុក។
ព័រទុយហ្កាល់មិនទាន់សម្រេចទេ ប៉ុន្តែនៅថ្ងៃសៅរ៍ទិ ២៦ កញ្ញា២០២០នេះ នៅក្នុងបទសម្ភាសន៍ជាមួយសារព័ត៌មានប្រចាំសប្តាហ៍Expresso ឯកអគ្គរដ្ឋទូតអាមេរិកប្រចាំក្រុងលីស្បូនលោក Georges Glass បានអះអាងថា ស៊ីណេស ដែលស្ថិតនៅជាង១០០គីឡូម៉ែត្រពីរដ្ឋធានី ជាកំពង់ផែប្រកបដោយយុទ្ធសាស្ត្របំផុតសម្រាប់សហរដ្ឋអាមេរិក ព្រោះជាកំពង់ផែទឹកជ្រៅអឺរ៉ុបដែលនៅជិតដីអាមេរិកជាងគេ។ អាមេរិកសង្ឃឹមថាស៊ីណេសមិនធ្លាក់ទៅក្នុងដៃចិនទេ ...! នេះបើតាមការប្រសាសន៍របស់លោកក្លាស ដោយគូសបញ្ជាក់ថា កំពង់ផែដែលមានរចនាសម្ព័ន្ធសម្រាប់ទទួលឧស្ម័នរាវពីអាមេរិកមកអឺរ៉ុប តាំងពីឆ្នាំ២០១៦មក បានលើកព័រទុយហ្កាល់ឱ្យក្លាយជាស្នូលនៃការផ្គត់ផ្គង់ឧស្ម័ននិងជាមជ្ឈមណ្ឌលសន្តិសុខថាមពលរបស់អឺរ៉ុប។ តែដោយអាមេរិកដែលគ្មានក្រុមហ៊ុនគ្រប់គ្រងកំពង់ផែនៅបរទេស ដូច្នេះអាមេរិកចង់ឃើញ ក្រុមហ៊ុនអឺរ៉ុប (លោកខាងលិច) ជាអ្នកធ្វើប្រតិបត្តិការនិងសាងសង់ផែកុងតឺន័រនៅកំពង់ផែស៊ីណេសនេះ។ នេះបើតាមការលម្អិតបន្ថែមរបស់លោកឯកអគ្គរដ្ឋទូត។
គ្រាន់តែបានឮសំដីទូតអាមេរិកភ្លាម រដ្ឋមន្ត្រីការបរទេសព័រទុយហ្កាល់បានបញ្ចេញប្រតិកម្មយ៉ាងទាន់ហន់ភ្លាមថា “នៅព័រទុយហ្កាល់ អាជ្ញាធរព័រទុយហ្កាល់ជាអ្នកសម្រេច ដើម្បីប្រយោជន៍ព័រទុយហ្កាល់”។
សូមបញ្ជាក់ថា ក្រោយវិបត្តិហិរញ្ញវត្ថុឆ្នាំ២០១១មក ព័រទុយហ្កាល់បានក្លាយជាប្រទេសអឺរ៉ុបមួយដែលទទួលវិនិយោគចិនច្រើនជាងគេបំផុត។ តាំងពីខែមីនា២០១៩មក អាមេរិកបានប្រឆាំងនឹងគម្រោងវិនិយោគអគ្គីសនីរបស់ព័រទុយហ្កាល់ជាមួយក្រុមហ៊ុនរដ្ឋចិន ក្រោមហេតុផលថាក្រុមហ៊ុនទូរគមនាគមន៍ចិនហួវៃមានចំណែកអភិវឌ្ឍប្រព័ន្ធ៥Gនៅព័រទុយហ្កាល់ ឬការជ្រៀតចូលនៃក្រុមហ៊ុនចិនក្នុងក្រុមហ៊ុនសំណង់ព័រទុយហ្កាល់។ លោកឯកអគ្គរដ្ឋទូត Glass បានទទួលស្គាល់ថាព័រទុយហ្កាល់ជាសមរភូមិមួយនៃសង្គ្រាមចិននិងអាមេរិកនៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ