សហភាពអឺរ៉ុបបានបង្ហាញនយោបាយថ្មីស្តីពីអន្តោប្រវេសន៍
នៅថ្ងៃពុធ ទី២៣ កញ្ញា សហភាពអឺរ៉ុបបានបង្ហាញនយោបាយថ្មីស្តីពីអន្តោប្រវេសន៍ដែលនឹងចូលជំនួសវិធានឌុយប្លាំងដែលអឺរ៉ុបបានចុះហត្ថលេខាក្នុងឆ្នាំ ២០១៣ និងដែលមានភាពចម្រូងចម្រាសខ្លាំងនៅក្នុងចំណោមប្រទេសសមាជិក។ ប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែន (Ursula von der Leyen) បានចេញមុខការពារនយោបាយថ្មីរបស់អឺរ៉ុបស្តីពីអន្តោប្រវេសន៍ដោយលោកស្រីយល់ថា មានយុត្តិធម៌ និងសមហេតុផលរវាងការទទួលខុសត្រូវ និងសាមគ្គីភាព។ តែនយោបាយអន្តោប្រវេសន៍ថ្មីមួយនេះក៏មានការរិះគន់ខ្លាំងដែរ ពិសេសអង្គការ Oxfam បានចោទគណៈកម្មការអឺរ៉ុបពីបទឱនលំទោននៅចំពោះមុខរដ្ឋាភិបាលដែលប្រឆាំងនឹងអន្តោប្រវេសន៍។
ចុះផ្សាយនៅថ្ងៃ៖
ស្តាប់ - ០២:៣៧
គេត្រូវរង់ចាំ ៥ឆ្នាំក្រោយវិបត្តិអន្តោប្រវេសន៍នៅអឺរ៉ុបក្នុងឆ្នាំ ២០១៥ ទើបអឺរ៉ុបមាននយោបាយថ្មីស្តីពីអន្តោប្រវេសន៍ដែលមានចំណងជើងថា « កតិកាសញ្ញាអឺរ៉ុបស្តីពីអន្តោប្រវេសន៍ និងសិទ្ធិជ្រកកោន »។ នយោបាយថ្មីស្តីពីអន្តោប្រវេសន៍នេះនឹងចូលជំនួសវិធានឌុយប្លាំងដែលអឺរ៉ុបបានចុះហត្ថលេខាក្នុងឆ្នាំ ២០១៣ និងដែលមានភាពប្រទាញប្រទង់គ្នាខ្លាំងរវាងសមាជិកទាំង ២៧ប្រទេស។ ជាមួយនឹង « កតិកាសញ្ញាអឺរ៉ុបស្តីពីអន្តោប្រវេសន៍ និងសិទ្ធិជ្រកកោន » គោលការណ៍នៃការចែកចាយជនអន្តោប្រវេសន៍ដោយបង្ខំរវាងប្រទេសសមាជិកដែលបានអនុម័តក្នុងឆ្នាំ ២០១៥ នឹងត្រូវបោះបង់ចោល។ « កតិកាសញ្ញាអឺរ៉ុបស្តីពីអន្តោប្រវេសន៍ និងសិទ្ធិជ្រកកោន » តម្រូវឲ្យពង្រឹងការត្រួតពិនិត្យនៅព្រំដែនខាងក្រៅ រឹតបន្តឹងការបញ្ជូនជនអន្តោប្រវេសន៍គ្មានក្រដាសស្នាមស្នាក់នៅទៅកាន់ប្រទេសកំណើតវិញ និងពន្លឿននីតិវិធីសុំសិទ្ធិជ្រកកោនរបស់ជនអន្តោប្រវេសន៍។
« កតិកាសញ្ញាអឺរ៉ុបស្តីពីអន្តោប្រវេសន៍ និងសិទ្ធិជ្រកកោន » ដដែលនេះតម្រូវឲ្យមានការចូលរួមពីគ្រប់ប្រទេសសមាជិកទាំងអស់ដោយផ្អែកតាមទម្ងន់សេដ្ឋកិច្ច និងចំនួនពលរដ្ឋរបស់ប្រទេសសមាជិកនីមួយៗ នេះបើតាមការពន្យល់របស់ស្នងការអឺរ៉ុបទទួលបន្ទុកកិច្ចការផ្ទៃក្នុងលោកស្រី Ylva Johansson។តែលោកស្រី Ylva Johansson បានបញ្ជាក់បន្ថែមថា ប្រទេសសមាជិកនីមួយមានជម្រើសរវាងទទួលអ្នកសុំសិទ្ធិជ្រកកោន ទទួលខុសត្រូវក្នុងការបញ្ជូនជនអន្តោប្រវេសន៍ម្នាក់ទៅកាន់ប្រទេសកំណើតវិញ ឬមួយក៏ចូលរួមចំណែកសាងសង់មជ្ឈមណ្ឌលទទួលជនអន្តោប្រវេសន៍។ ក្នុងករណីណាដែលអឺរ៉ុបជួបវិបត្តិអន្តោប្រវេសន៍ដូចឆ្នាំ ២០១៥ រដ្ឋសមាជិកមួយត្រូវទទួលបន្ទុកការផ្លាស់ទីលំនៅរបស់ក្រុមជនភៀសខ្លួន ឬក៏បញ្ជូនពួកគេឲ្យត្រឡប់ទៅប្រទេសកំណើតវិញ។
តែបើការបញ្ជូននេះជួបបរាជ័យក្នុងរយៈពេល ៨ខែ រដ្ឋសមាជិកនោះនឹងត្រូវទទួលពួកគេឲ្យស្នាក់នៅ។ តែមិនទាន់អីផង នយោបាយអឺរ៉ុបថ្មីស្តីពីអន្តោប្រវេសន៍បានទទួលរងការរិះគន់ស្រេចទៅហើយ។ « គណៈកម្មការអឺរ៉ុបបានទម្លាក់ការទទួលខុសត្រូវលើទាំងអស់គ្នាដោយគ្មានមេកើយ គ្មានរចនាសម្ព័ន្ធ និងគ្មានក្របខ័ណ្ឌ »នេះជាការបញ្ជាក់របស់លោក Yves Pascouau អ្នកជំនាញអន្តោប្រវេសន៍។ « គឺជាកុងសង់ស៊ុសរវាងការខ្វះសេចក្តីក្លាហាន និងការស្អប់ជនបរទេស »នេះជាការតិះដៀលរបស់អ្នកស្រាវជ្រាវបែលហ្សិកលោក François Gemenne។ ចំណែកអង្គការក្រៅរដ្ឋាភិបាល Oxfamបានចោទគណៈកម្មការអឺរ៉ុបពីបទឱនលំទោននៅចំពោះមុខរដ្ឋាភិបាលដែលប្រឆាំងអន្តោប្រវេសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ