កូវីដ១៩ ៖ អង់គ្លេសហាមមិនឱ្យមានការជួបជុំគ្នាលើសពី៦នាក់
ប្រឈមនឹងការស្ទុះឡើងជាថ្មីនៃករណីឆ្លងកូវីដ១៩ អង់គ្លេសដែលជាប្រទេសរងគ្រោះខ្លាំងជាងគេនៅអឺរ៉ុប ចាប់រឹតបន្តឹងវិធានការជាថ្មី។ អាជ្ញាធរបានចេញបម្រាមមិនឱ្យពលរដ្ឋជួបជុំផ្តុំគ្នា មិនថានៅក្នុងកន្លែងបិទជិត ឬទីវាលសាធារណៈ លើសពី៦នាក់ទេ។ វិធានការនេះនឹងត្រូវចូលជាធរមានចាប់ពីថ្ងៃចន្ទសប្តាហ៍ក្រោយទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
រហូតមកទល់នឹងពេលនេះ អង់គ្លេសបានកំរិតឱ្យមានការជួបជុំគ្នា ដល់ ៣០នាក់ ប៉ុន្តែចាប់ពីថ្ងៃចន្ទ សប្តាហ៍ក្រោយទៅ អាជ្ញាធរនឹងរឹតបន្តឹងវិធានការ មិនឱ្យមានការជួបជុំលើសពី៦នាក់ទេ ព្រោះកូរ៉ូណាវីរុសថ្មីកំពុងចាប់កំរើក និងធ្វើការចម្លងរីករាលដាលខ្លាំងឡើងវិញ ជាពិសេស ក្នុងចង្កោមពលរដ្ឋវ័យក្មេង ២០-៣០ឆ្នាំ។ នេះបើតាមសេចក្តីប្រកាសរបស់រដ្ឋាភិបាល នៅល្ងាចថ្ងៃទី ៨កញ្ញា២០២០។
លោកនាយករដ្ឋមន្ត្រីនឹងផ្តល់សន្និសីទកាសែតលម្អិតនៅរសៀលថ្ងៃពុធទី ៩ កញ្ញានេះ។ តែបើតាមសេចក្តីថ្លែងការណ៍របស់ការិយាល័យនាយករដ្ឋមន្ត្រី ការកំហិតមិនឱ្យមានការជួបជុំគ្នា លើសពី ៦នាក់ ត្រូវអនុវត្តនៅគ្រប់ទិសទី មិនថានៅខាងក្នុង និង ខាងក្រៅកន្លែងណាមួយទេ។ ការជួបជុំជាលក្ខណៈឯកជននៅក្នុងផ្ទះ ឬនៅតាមទីវាលសាធារណៈ និងគ្រប់ទីកន្លែងផ្សេងទៀត ដូចជាហាងកាហ្វេបា និងអាហារដ្ឋាន ក៏មិនត្រូវឱ្យមានក្រុមជុំលើសពី៦នាក់ដែរ។ រដ្ឋាភិបាលចាំបាច់ត្រូវទប់ស្កាត់វីរុស នៅពេលនេះ ដោយពង្រឹងវិន័យ ចេញវិធានការយ៉ាងសាមញ្ញកាត់បន្ថយជំនួបសង្គម ដែលងាយយល់និងស្រួលប៉ូលិសធ្វើការ។ ដូច្នេះគ្រប់គ្នាត្រូវតែគោរពច្បាប់សង្គមនេះ។ នេះបើតាមសេចក្តីថ្លែងការណ៍ដដែល។
មានតែ គ្រួសារមានសមាជិកលើសពី៦នាក់ សាលារៀន កន្លែងធ្វើការ ពិធីរៀបអាពាហ៍ពិពាហ៍ បុណ្យសព និងលេងកីឡាជាក្រុមស្របតាមបទដ្ឋានសុខាភិបាលទេ ដែលអាចមានសិទ្ធិជួបជុំគ្នាលើសពី៦នាក់បាន។ ខុសពីនោះ រាល់អ្នកល្មើសនឹងបម្រាម នឹងត្រូវផាកពិន័យជាប្រាក់ ចំនួន ១០០លីវ (ឬប្រមាណ១០០អឺរ៉ូ) នៅលើកទីមួយ។ ប្រាក់ពិន័យនឹងគុណទ្វេឡើងរហូតដល់៣២០០លីវ បើហ៊ានល្មើសម្តងហើយម្តងទៀត។
អង់គ្លេសជាប្រទេសរងគ្រោះស្លាប់ដោយកូវីដ១៩ច្រើនជាងគេនៅអឺរ៉ុប (៤១៥០០នាក់)។ អាជ្ញាធរតំបន់ និងរដ្ឋខ្លះរបស់អង់គ្លេសបានចាប់ផ្តើមបិទខ្ទប់តំបន់ជាថ្មី ដោយអន្លើៗវិញហើយ ដើម្បីរារាំងកុំឱ្យកូវីដ១៩រីករាលដាលខ្លាំងឈានដល់ការបិទទូទាំងប្រទេសទាន់។
ឧទាហរណ៍នៅប៉ុលតុន ក្រុងភាគពាយ័ព្យប្រទេស នៅរដ្ឋហ្កាល់ អាជ្ញាធរមូលដ្ឋាន ចាប់ពង្រឹងវិធានការខ្លាំងបិទខ្ទប់ក្រុង កំរិតការចូលសួរសុខទុក្ខចាស់ជរា បិទហាងបិទបា តាំងពីថ្ងៃអង្គារទី ៨កញ្ញាម្សិលមិញមក ដោយសង្កេតឃើញមានករណីឆ្លងថ្មី ពិសេសក្នុងចំណោមពលរដ្ឋវ័យក្មេង ក្នុងចំនួនដ៏ច្រើនជាងគេបើប្រៀបទៅនឹងអត្រាឆ្លងជាមធ្យមនៅទូទាំងប្រទេស។
ថ្វីបើចំនួនអ្នកស្លាប់ដោយកូវីដ១៩បានធ្លាក់ចុះទាបខ្លាំងបំផុតបើប្រៀបទៅនឹងខែមីនា ប៉ុន្តែចំនួនអ្នកវិជ្ជមានកូវីដ១៩បានកើនឡើងយ៉ាងខ្លាំងនៅអង់គ្លេស ដូចបណ្តាប្រទេសផ្សេងទៀតនៅអឺរ៉ុបដែរ។ ក្រៅអំពីកំរិតការជួបជុំ រដ្ឋាភិបាលអង់គ្លេសបានចាប់បើកយុទ្ធនាការអប់រំណែនាំឡើងវិញ ចាប់ពីថ្ងៃពុធនេះទៅ ឱ្យពលរដ្ឋយល់អំពីភាពសំខាន់នៃការលាងដៃ ការពាក់ម៉ាស និងការរក្សាគម្លាតសុវត្ថិភាពពីមនុស្សទៅមនុស្សម្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ