មន្ទីរពិសោធន៍បារាំង Sanofi បរាជ័យក្នុងការធ្វើតេស្តសាកល្បងថ្នាំសម្រាប់ព្យាបាលជំងឺកូវីដ
មន្ទីរពិសោធន៍បារាំង សាណូហ្វី Sanofiបានប្រកាសនៅថ្ងៃអង្គារនេះពីបរាជ័យ ក្នុងការធ្វើតេស្តសាកល្បងថ្នាំសម្រាប់ព្យាបាលជំងឺកូវីដ។ តាមសេចក្តីប្រកាសរបស់ក្រុមហ៊ុនផលិតឱសថបារាំង ដែលបានសហការជាមួយ ក្រុមហ៊ុនអាមេរិកាំង Regeneron ការធ្វើតេស្តសាកល្បងក្នុងដំណាក់កាលទី៣ នៃ ថ្នាំឈ្មោះKevzara សម្រាប់ព្យាបាលអ្នកជំងឺកូវីដ ក្នុងស្ថានភាពធ្ងន់ធ្ងរ មិនបានផ្តល់លទ្ធផលជាវិជ្ជមាននោះទេ។
ចុះផ្សាយនៅថ្ងៃ៖
ស្តាប់ - ០២:០៧
នៅក្នុងសេចក្តីប្រកាសរបស់ខ្លួន នៅថ្ងៃអង្គារនេះ ក្រុមហ៊ុនផលិតឱសថបារាំង Sanofi បានប្រកាសបញ្ឈប់ការធ្វើតេស្តសាកល្បងលើមនុស្សដើម្បី ផ្ទៀងផ្ទាត់ និងវាយតម្លៃប្រសិទ្ធភាពថ្នាំ Kevzara សម្រាប់ព្យាបាលអ្នកជំងឺកូវីដ បន្ទាប់ពីការធ្វើតេស្តសាកល្បងក្នុងដំណាក់កាលទី៣ មិនបានផ្តល់លទ្ធផលទៅតាមការរំពឹងទុក។
នៅក្នុងដំណាក់កាលធ្វើតេស្តកន្លងមក មន្ទីរពិសោធន៍បារាំងផ្តោតសំខាន់លើ២ផ្នែក គឺ ប្រសិទ្ធិភាព របស់ Kevzara ចំពោះការបំបាត់អាការៈក្តៅខ្លួន និង ការថប់ដង្ហើម (បំបាត់សេចក្តីត្រូវការបន្ថែមផ្នែកខ្យល់អុកស៊ីហ្សែន)។ ផ្នែកទីពីរ គឺការវាយតម្លៃអំពីភាពប្រសើរឡើងនៃស្ថានភាពជំងឺរយៈពេលវែង ពោលគឺប្រសិទ្ធភាពកាត់បន្ថយអត្រាមរណៈ និងភាពធ្ងន់ធ្ងរនៃជំងឺ (កាត់បន្ថយការសម្រាកព្យាបាលនៅមន្ទីរពេទ្យ និងការដាក់អុកស៊ីហ្សែនជំនួយជីវិត)។
នៅមុនប្រកាសពីបរាជ័យ ក្នុងការធ្វើតេស្តសាកល្បងដំណាក់កាលទី៣ លើប្រសិទ្ធភាព ថ្នាំ Kevzara មន្ទីរពិសោធន៍បារាំង Sanofi បានធ្វើតេស្តសាកល្បងទៅលើអ្នកជំងឺកូវីដ ដែលស្ថិតក្នុងស្ថានភាពធ្ងន់ធ្ងរ សរុប ៤២០នាក់ ក្នុងប្រទេសចំនួន ១១ ដូចជា ប្រេស៊ីល អ៊ីតាលី បារាំង ជប៉ុននិងអេស្ប៉ាញ(ឈីលី កាណាដា រុស្ស៊ី អ៊ីស្រាអែល អាល្លឺម៉ង់)ជាដើម។
ថ្នាំ Kevzara ជាប្រភេទថ្នាំ immunosuppresseur ជំនួយប្រព័ន្ធការពារខ្លួនដែលក្រុមហ៊ុនឱសថបារាំងSanofi និងអាមេរិក Regeneron បានសហការស្រាវជ្រាវរួមគ្នាតាំងពីឆ្នាំ២០១៧មក សម្រាប់ព្យាបាលជំងឺរលាកសន្លាក់ (polyarthrite rhumatoïde)។ តាមក្រុមហ៊ុនSanofi មានភស្តុតាងតាមបែបវិទ្យាសាស្រ្តដែលថា ថ្នាំKevzara ជាថ្នាំមានសក្តានុពលសម្រាប់ព្យាបាលអ្នកជំងឺកូវីដ ដែលស្ថិតក្នុងស្ថានភាពធ្ងន់ធ្ងរ។ ការសិក្សាទៅលើអ្នកជំងឺកូវីដ ចំនួន២១នាក់ នៅប្រទេសចិន បានបង្ហាញថា ធាតុសកម្មរបស់ថ្នាំបានធ្វើឲ្យអ្នកជំងឺលែងក្តៅខ្លួន និងមិនសូវត្រូវការខ្យល់អុកស៊ីហ្សែន។
បើតាមអ្នកដឹកនាំការស្រាវជ្រាវរបស់សាណូហ្វី លោក John Reed បើទោះបីជា ការធ្វើតេស្តដំណាក់កាលទី៣ ដើម្បីផ្ទៀងផ្ទាត់ និងវាយតម្លៃប្រសិទ្ធភាពថ្នាំ មិនបានផ្តល់លទ្ធផលដែលគេធ្លាប់សង្ឃឹមទុក ប៉ុន្តែ ក្រុមអ្នកស្រាវជ្រាវនៅតែមានមោទនភាព ដែលបានចូលរួម រហូតដល់ទីបញ្ចប់ ដើម្បីសិក្សាពីអត្ថប្រយោជន៍របស់ថ្នាំ សម្រាប់ការព្យាបាលអ្នកជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ