ប្រមុខការទូតចិនសង្ឃឹមអាចមានកិច្ចព្រមព្រៀងពាណិជ្ជកម្មរវាងចិន និងសហភាពអឺរ៉ុបក្នុងឆ្នាំ ២០២០
ប្រមុខការទូតចិនលោកវ៉ាង យីកំពុងបន្តដំណើរទស្សនកិច្ចមួយជុំទ្វីបអឺរ៉ុបនៅក្នុង ៥ប្រទេស។ បន្ទាប់ពីប្រទេសអ៊ីតាលី ន័រវែស និងហូឡង់ លោកវ៉ាង យីបានបំពេញទស្សនកិច្ចក្នុងប្រទេសបារាំងពីថ្ងៃសុក្រដល់ថ្ងៃអាទិត្យ ទី៣០ សីហា។ បន្ទាប់ពីបានជួបដោយប្រធានាធិបតីបារាំងលោកម៉ាក្រុងក្នុងថ្ងៃសុក្រ និងដោយប្រមុខការទូតបារាំងលោកហ្សង់អ៊ីវ ឡឺឌ្រីយ៉ង់ក្នុងថ្ងៃសៅរ៍ ទី២៩ សីហា លោកវ៉ាង យីបានចូលរួមធ្វើសន្និសីទនៅវិទ្យាស្ថានបារាំងនៃទំនាក់ទំនងអន្តរជាតិក្នុងក្រុងប៉ារីសនាថ្ងៃអាទិត្យ ទី៣០ សីហា។ ថ្លែងនាឱកាសនោះ លោកវ៉ាង យីសង្ឃឹមអាចមានកិច្ចព្រមព្រៀងស្តីពីការការពារវិនិយោគបរទេសរវាងចិន និងសហភាពអឺរ៉ុបដែលបានចរចាអស់ជាច្រើនឆ្នាំកន្លងមក។
ចុះផ្សាយនៅថ្ងៃ៖
ស្តាប់ - ០២:៣៤
គឺជាមួយនឹងក្តីសុទិដ្ឋិនិយមដែលប្រមុខការទូតចិនលោកវ៉ាង យីយល់ថា ចិន និងសហភាពអឺរ៉ុបមានលទ្ធភាពក្នុងការសម្រេចឲ្យបាននូវកិច្ចព្រមព្រៀងស្តីពីការការពារវិនិយោគបរទេសរវាងគ្នាពីពេលនេះទៅដំណាច់ឆ្នាំ ២០២០។ តែលោកវ៉ាង យីបានទទួលស្គាល់ថា ដើម្បីអាចឈានទៅដល់គោលដៅចុងក្រោយ ចិន និងអឺរ៉ុបត្រូវធ្វើសម្បទានឲ្យគ្នាទៅវិញ ទៅមកដើម្បីទម្លាយភាពទាល់ច្រកនៅក្នុងកិច្ចចរចាដែលចិន និងអឺរ៉ុបបានផ្តើមជជែកគ្នាតាំងពី ៧ឆ្នាំកន្លងមក។ ភាពអូសបន្លាយនៃកិច្ចចរចាពាណិជ្ជកម្មរវាងចិន និងអឺរ៉ុបបានកើតមានឡើង ខណៈដែលសហរដ្ឋអាមេរិកបានលើកឡើងនូវចំណុចគួរឲ្យបារម្ភមួយចំនួននៅក្នុងសង្រ្គាមពាណិជ្ជកម្មជាមួយចិន។ ចំណុចគួរឲ្យបារម្ភទាំងនោះរួមមាន ការគោរពកម្មសិទ្ធិបញ្ញា បិទបញ្ចប់ការបញ្ជូនបច្ចេកវិទ្យាដែលចិនបានដាក់លើក្រុមហ៊ុនបរទេស និងប្រាក់ឧបត្ថម្ភធនឲ្យក្រុមហ៊ុន រោងចក្ររដ្ឋចិន។
ក្នុងខែឧសភា ឯកអគ្គរដ្ឋទូតអឺរ៉ុបនៅចិនបានបញ្ជាក់ថា សហភាពអឺរ៉ុបសង្ឃឹមសម្រេចបានកិច្ចព្រមព្រៀងពាណិជ្ជកម្មជាមួយចិនយ៉ាងយូរក្នុងខែកញ្ញាខាងមុខ។ តែប្រធានគណៈកម្មការអឺរ៉ុបលោកស្រី Ursual von der Leyen បានលើកឡើងក្នុងខែមិថុនាពីទំនាក់ទំនងលំបាកជាមួយចិនដោយបញ្ជាក់ថា អឺរ៉ុបត្រូវការមហិច្ឆតាជាងនេះពីចិនដើម្បីសម្រេចបាននូវកិច្ចព្រមព្រៀងមួយនៅមុនដំណាច់ឆ្នាំ ២០២០។ តែវិបត្តិកូវីដ-១៩ បានផ្លាស់ប្តូរលើកម្មវិធីដែលបានព្រាងទុក ពិសេសការលើកជំនួបកំពូលវិសាមញ្ញរវាងសហភាពអឺរ៉ុប និងប្រមុខរដ្ឋចិនលោកស៊ី ជីនពីងដែលគ្រោងរៀបចំក្នុងខែកញ្ញាខាងមុខ។
ដោយឡែក កិច្ចព្រមព្រៀងពាណិជ្ជកម្មអឺរ៉ុប និងចិនក៏ត្រូវបានប្រធានាធិបតីបារាំងលោកម៉ាក្រុងនិយាយជាមួយលោកវ៉ាង យីក្នុងថ្ងៃសុក្រ ទី២៨ សីហា។ លោកម៉ាក្រុងបានគូសបញ្ជាក់ពីភាពចាំបាច់ក្នុងការកសាងដៃគូអឺរ៉ុប ចិនរឹងមាំ និងសមភាពដោយផ្អែកលើគោលការណ៍នៃភាពមានទៅ មានមក និងការគោរពច្បាប់ពហុភាគី។ និយាយពីទំនាក់ទំនងទ្វេភាគីបារាំង ចិនវិញ លោកម៉ាក្រុងបានអំពាវនាវឲ្យមានភាពចម្រើនពិតប្រាកដ និងឆាប់រហ័សនូវភាពជាដៃគូនៅក្នុងវិស័យនុយក្លេអ៊ែរស៊ីវិល និងកសិចំណីអាហារ។ ប្រធានបទដដែលនេះក៏ត្រូវបានលើកឡើងដោយប្រមុខការទូតបារាំងលោកហ្សង់អ៊ីវ ឡឺឌ្រីយ៉ង់នៅក្នុងជំនួបជាមួយលោកវ៉ាង យីក្នុងថ្ងៃសៅរ៍ ទី២៩ សីហា។
ទន្ទឹមគ្នានេះ ប្រមុខការទូតនៃប្រទេសទាំងពីរក៏បាននិយាយពីស្ថានការណ៍នៅក្នុងម៉ាលី លីបង់ កូរ៉េខាងជើង រួមទាំងវិបត្តិនៅអ៊ីរ៉ង់។ តែអ្វីដែលលោកឡឺឌ្រីយ៉ង់មិនភ្លេចនិយាយនោះ ស្ថានការណ៍សិទ្ធិមនុស្សធ្លាក់ចុះនៅចិន ពិសេសនៅហុងកុង និងខេត្តស៊ីនជាំង។ តែលោកវ៉ាង យីបានប្រតិកម្មបកវិញនៅក្នុងសន្និសីទរៀបចំនៅវិទ្យាស្ថានបារាំងនៃទំនាក់ទំនងអន្តរជាតិក្រុងប៉ារីសនាថ្ងៃអាទិត្យ ទី៣០ សីហាថា រឿងនៅហុងកុង និងនៅស៊ីនជាំងជារឿងផ្ទៃក្នុងរបស់ចិនដែលប្រទេសផ្សេងមិនគួរលូកដៃចូលជ្រៀតជ្រែកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ