កូវីដ-១៩៖WHO ជំរុញប្រទេសសមាជិកឲ្យចូលរួមនៅក្នុងយន្តការណ៍របស់ WHO ដើម្បីទទួលបានថ្នាំវ៉ាក់សាំង
នៅថ្ងៃអង្គារ ទី១៨ សីហា អង្គការសុខភាពពិភពលោកហៅកាត់ WHO បានផ្ញើលិខិតទៅកាន់ប្រកាន់ប្រទេសសមាជិកទាំងអស់ដោយអំពាវនាវឲ្យពួកគេចូលរួមនៅក្នុងយន្តការណ៍របស់អង្គការដើម្បីទទួលបានថ្នាំវ៉ាក់សាំងការពារជំងឺកូវីដ-១៩។ ការអំពាវនាវនេះបានធ្វើឡើងតាមរយៈអគ្គនាយក WHO លោក Tedros Adhanom Ghebreyesus នៅក្នុងសន្និសីទកាសែតមួយ។ ទន្ទឹមគ្នានេះ លោក Tedros ក៏បានរម្លឹកជាថ្មីពីការប្រឆាំងទប់នឹងជាតិនិយមស្តីពីថ្នាំវ៉ាក់សាំងប្រឆាំងកូវីដ-១៩។ អ្វីជាការកត់សម្គាល់ អន្តរាគមន៍របស់ប្រមុខ WHO បានធ្វើឡើង ខណៈដែលពិភពលោកនៅមិនទាន់មានថ្នាំព្យាបាល និងថ្នាំវ៉ាក់សាំងប្រឆាំងកូវីដ-១៩។ ទន្ទឹមគ្នានេះ មានប្រទេសកាន់តែច្រើនកំពុងប្រឈមនឹងកំណើនករណីឆ្លងថ្មី និងបារម្ភពីរលកឆ្លងលើកទី២។
ចុះផ្សាយនៅថ្ងៃ៖
ស្តាប់ - ០២:៤៤
យន្តការណ៍នៃការទទួលបានថ្នាំវ៉ាក់សាំងប្រឆាំងកូវីដ-១៩ ដែលអង្គការសុខភាពពិភពលោកហៅកាត់ WHO កំពុងរៀបចំពេលនេះមានឈ្មោះ COVAX ។ តាមរយៈលិខិតមួយច្បាប់ផ្ញើទៅឲ្យប្រទេសសមាជិកទាំងអស់ អគ្គនាយកអង្គការ WHO លោក Tedros បានជំរុញប្រទេសសមាជិកទាំងអស់ឲ្យចូលរួមជាមួយយន្តការណ៍ COVAX ដើម្បីទទួលបានថ្នាំវ៉ាក់សាំងប្រឆាំងកូវីដ-១៩ ជាលក្ខណៈសកល។ ទន្ទឹមគ្នានេះ និងដោយមិននិយាយចំឈ្មោះប្រទេសណាមួយ លោក Tedros បានអំពាវនាវជាថ្មីម្តងទៀតឲ្យប្រឆាំងទប់នឹងជាតិនិយមស្តីពីថ្នាំវ៉ាក់សាំងដែលមានប្រទេសខ្លះចង់ទទួលបានផ្តាច់មុខតែម្នាក់ឯង។
គេនៅមិនទាន់ដឹងថា តើយន្តការណ៍ COVAX របស់អង្គការសុខភាពពិភពលោកនឹងត្រូវដាក់ឲ្យដំណើរការនៅពេលណា និងមានប្រទេសសមាជិកប៉ុន្មានចូលរួមទេ។ តែលោក Bruce Aylward ដែលជាទីប្រឹក្សារបស់លោក Tedros បានបញ្ជាក់ក្នុងថ្ងៃអង្គារ ទី១៨ សីហាថា ការរៀបចំយន្តការណ៍ COVAX បានឈានចូលដល់ដំណាក់ការចុងក្រោយ និងថា មានជាង ១៧០ប្រទេស ពោលស្មើនឹង ៧០% នៃប្រជាជនក្នុងលោកបានបញ្ជាក់ពីការចង់ចូលរួម ឬបានបង្ហាញពីចំណាប់អារម្មណ៍របស់ពួកគេចំពោះយន្តការណ៍ COVAX។ លោក Aylward បានបន្ថែមថា WHO កំពុងរង់ចាំចម្លើយច្បាស់លាស់ពីប្រទេសទាំងនោះចាប់ពីពេលនេះដល់ថ្ងៃទី៣១ សីហា។
លោក Tedros បានពន្យល់ថាតាមរយៈយន្តការណ៍ COVAX ការចែកចាយថ្នាំវ៉ាក់សាំងនឹងត្រូវរៀបចំជាពីរដំណាក់ការ។ ដំណាក់ការទី១ ការចែកចាយនឹងធ្វើឡើងជាលក្ខណៈសមាមាត្រ និងក្នុងពេលតែមួយដល់គ្រប់ប្រទេសចូលរួមដើម្បីកាត់បន្ថយហានិភ័យទូទៅ។ ដំណាក់ការទី២ ការចែកចាយនឹងត្រូវគិតគូរពីការគំរាមកំហែង និងភាពងាយរងគ្រោះរបស់ប្រទេសនានា។ តាមអគ្គនាយក WHO ដដែល វិធានការដ៏ឆាប់បំផុតក្នុងការបញ្ចប់ការឆ្លងរាលដាលនៃកូវីដ-១៩ និងការបើកសេដ្ឋកិច្ចឡើងវិញ គឺត្រូវផ្តើមចេញពីការការពារពលរដ្ឋដែលប្រឈមនឹងហានិភ័យខ្លាំងជាងគេ ពោលមិនមែនការពារពលរដ្ឋទាំងអស់តែនៅក្នុងប្រទេសខ្លះទេ។
នៅក្នុងន័យនេះ លោក Tedros បានលើកឡើងពីការផ្តល់អាទិភាពចំពោះបុគ្គលិកដែលធ្វើការនៅតាមមណ្ឌលសុខភាព ដូចយ៉ាងគ្លីនិក ឬមន្ទីរពេទ្យ និងនៅតាមគ្រឹះស្ថានផ្នែកសេវាជំនួយសង្គម ព្រោះពួកគេជាអ្នកព្យាបាល និងការពារពលរដ្ឋ ហើយមានទំនាក់ទំនងផ្ទាល់នឹងក្រុមមនុស្សដែលមានហានិភ័យមរណៈខ្ពស់។ គួររម្លឹកថា ខណៈដែលការប្រជែងរកថ្នាំវ៉ាក់សាំងកំពុងបន្តមានយ៉ាងសកម្ម ចំនួនអ្នកស្លាប់ដោយកូវីដ-១៩ ក្នុងលោកមានជិត ៧៧៥ ០០០នាក់ គិតតាំងពីដំណាច់ខែធ្នូឆ្នាំ ២០១៩ មកដល់ថ្ងៃទី១៨ សីហា ឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ