ក្រៅតែពីការកើនឡើងនៃករណីឆ្លងកូវីដ បារាំងកំពុងជួបអាកាសធាតុក្តៅខ្លាំង ដូចឡដុត
ចាប់តាំងពីថ្ងៃសុក្រ ចុងសប្តាហ៍ នេះ ប្រទេសបារាំងបានជួបរលកកំដៅ ក្តៅខ្លាំង និងរយៈពេលយូរ ដ៏កម្រនឹងមាន។ នៅថ្ងៃសុក្រ សីតុណ្ហភាពនៅតំបន់ខ្លះ បានកើនឡើងដល់ ៤២អង្សារ។ តំបន់ចំនួន ៩ ដែលនៅក្នុងនោះ មានទីក្រុងប៉ារីស ត្រូវអាជ្ញាធរចាត់ចូលក្នុងតំបន់ក្រហម ដែលមានន័យថា អាចនឹងមានការកើនឡើងនៃអត្រាមរណភាព ដោយសារជំងឺកូវីដ និងដោយសារខ្យល់ពុលអូហ្សូន ដែលកើតមាន នៅពេល អាកាសធាតុចាប់ក្តៅខ្លាំង។
ចុះផ្សាយនៅថ្ងៃ៖
ស្តាប់ - ០២:៣២
នៅប្រទេសបារាំង ពីជើងទៅត្បូង ពីលិចទៅកើត រលកកំដៅលាតសន្ធឹង នៅស្ទើរគ្រប់ផ្ទៃប្រទេស។ តំបន់ចំនួន៩ត្រូវចាត់ចូលជាតំបន់ប្រកាសអាសន្ន ពណ៌ក្រហម ចំណែកតំបន់ចំនួន ៥២ស្ថិតនៅក្នុងតំបន់ពណ៌ទឹកក្រូចជាមួយនឹងសីតុណ្ហភាពចន្លោះ ពី៣៩ និង៤២អង្សារសេ កាលពីថ្ងៃសុក្រ។
អាជ្ញាធរបានសម្រេចដាក់ក្រុងប៉ារីស និងតំបន់ជុំវិញ ទៅក្នុងបញ្ជីឈ្មោះតំបន់ប្រកាសអាសន្នពណ៌ក្រហម ដោយសាររលកកំដៅ ព្រោះថា នៅតាមទីក្រុងដែលសំបូរមនុស្សរស់នៅច្រើន អត្រាមរណភាពដោយសារខ្យល់ពុលអូហ្សូន និងជំងឺកូវីដ នឹងអាចកើនឡើងខ្ពស់ជាងគេ។
រលកកំដៅលើកនេះនឹង មានរយៈពេលយូរ រហូតដល់ថ្ងៃពុធសប្តាហ៍ក្រោយ។ ចំណែកអាកាសធាតុវិញ គឺក្តៅខ្លាំងជាងឆ្នាំមុន ដល់ទៅ ៥អង្សាសេ បើប្រៀបធៀបនឹងរលកកំដៅ កាលពីខែសីហា ឆ្នាំ មុន។ នៅចុងកំពូលអគារតួអេហ្វែល ក្នុងទីក្រុងប៉ារីស នាពេល អាធាត្រ គេវាស់ឃើញ មានសីតុណ្ហភាព ២៩អង្សា ដែលតាមពិតអាចជាកំដៅ ថ្ងៃត្រង់ ក្នុងខែមិថុនា។
អាជ្ញាធរបារាំងបានអំពាវនាវឲ្យប្រជាជនប្រុងប្រយ័ត្នទ្វេដង ជាមួយនឹងរលកកំដៅ ក្តៅខ្លាំងផង និងជំងឺឆ្លងរាតត្បាតកូវីដ ដែលកំពុងចាប់កំរើក ខ្លាំងឡើងវិញ ជាពិសេស ក្នុងចំណោមយុវជន។
រដ្ឋមន្រ្តីសុខាភិបាលបារាំង លោកOlivier Veran បានទទូចសុំឲ្យប្រជាជនបារាំង ប្រុងប្រយ័ត្ន និងមិនត្រូវភ្លេច គម្លាតសង្គម និងការរក្សាអនាម័យ ដើម្បីកុំឲ្យឆ្លងជំងឺកូវីដ។ សម្រាប់រដ្ឋមន្រ្តីបារាំង អាកាសធាតុក្តៅស្អុះស្អាប់ខ្លាំងមិនមែនជាលេស ដែលគេត្រូវប្រើ ដើម្បីព្រងើយកន្តើយមិនពាក់ម៉ាស ការពារមុខនោះទេ។
ទោះទែរម៉ូម៉ែត្រចង្អុលកម្រិតសីតុណ្ហភាព ដល់៤០អង្សា ដែលធ្វើឲ្យគេពិបាកធុញថប់ នឹងពាក់ម៉ាសក្តី អាជ្ញាធរបារាំង ក្នុងទីក្រុងធំៗចំនួន ៥ ដូចជាម៉ារសីយ៍ បរដូ ការកាសូន រ៉ែន អាហ្សាស្យូ បានចេញបញ្ជាឲ្យមនុស្សពាក់ម៉ាស ជាចាំបាច់ នៅទីកន្លែងសាធារណៈបើកចំហ នៅបន្ទាប់ពី គេរកឃើញមានសំបុកឆ្លង ជំងឺកូវីដ កាន់តែច្រើន នៅប៉ុន្មានថ្ងៃមកនេះ។ តាមអគ្គនាយកដ្ឋានសុខភាព ករណីឆ្លងថ្មីនៃជំងឺកូវីដ បានកើនដល់ ២២៨៨នាក់ ក្នុងរយៈពេលតែមួយថ្ងៃសុក្រ។ រដ្ឋាភិបាល បារាំង ដែលព្រួយបារម្ភពីរលកទី២នៃជំងឺឆ្លងកូវីដ ទើបបានចេញក្រិត្យអនុញ្ញាតឲ្យអាជ្ញាធរថ្នាក់មូលដ្ឋាន ចេញបញ្ជាឲ្យគេពាក់ម៉ាស ជាចាំបាច់ នៅទីកន្លែងសាធារណៈ បើកចំហរ បន្ទាប់ពីគេសង្កេតចំនួនមនុស្សឆ្លងកូវីដ មាននៅតំបន់ ទីក្រុង ដែល មនុស្សម្នារ គិតតែជប់លៀង សប្បាយ ជួបជុំគ្នា ដោយគ្មានរក្សាគម្លាតសង្គម នៅក្នុងពេលវិស្សមកាល ក្នុងរដូវក្តៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ