បារាំងចាប់តម្រូវឲ្យពាក់ម៉ាសនៅកន្លែងសាធារណៈ នៅតំបន់ដែលករណីឆ្លងកូវីដ កើនឡើង
អាជ្ញាធរបារាំង ចាប់ពង្រឹងវិធានការពាក់ម៉ាសនៅកន្លែងសាធារណៈ មិនថា នៅ កន្លែងបិទជិត នៅតាមទីវាល នៅតាមតំបន់ខ្លះ ដែលកំពុងមានការកើនឡើង ករណីឆ្លងជំងឺកូវីដ។ នៅថ្ងៃចន្ទនេះ នាយករដ្ឋមន្រ្តីថ្មីរបស់បារាំង លោក ហ្សង់ កាស្តិច បានធ្វើដំណើរទៅទីក្រុង លីល ភាគខាងជើងប្រទេសបារាំង ដើម្បី ពិនិត្យមើលការអនុវត្តវិធានការពាក់ម៉ាស នៅកន្លែងសាធារណៈ ដែលត្រូវចូលជាធរមាន ចាប់ពីថ្ងៃចន្ទ។ អ្នកដែលល្មើស មិនព្រមពាក់ម៉ាស តាមការតម្រូវរបស់អាជ្ញាធរនឹងត្រូវចាប់ពិន័យឲ្យបង់ប្រាក់ ១៣៥អឺរ៉ូ។
ចុះផ្សាយនៅថ្ងៃ៖
ស្តាប់ - ០២:៤២
ពីការពាក់ម៉ាសគ្មានប្រយោជន៍ ក្លាយទៅជាការពាក់ម៉ាស ចាំបាច់ នៅកន្លែងសាធារណៈ បិទជិត និងចុងក្រោយ គឺការពាក់ម៉ាសចាំបាច់នៅតាមផ្លូវ នៅកន្លែងវាល។ រដ្ឋាភិបាលបារាំង បានផ្លាស់ប្តូរជំហរ បត់បែន ទៅតាមកាលៈទេសៈ ដែលជំងឺកូវីដកំពុងចាប់កំរើក កើនឡើង វិញ នៅក្នុងប្រទេស។ ចាប់តាំងពីថ្ងៃសុក្រ ទី ៣១កក្កដា រដ្ឋាភិបាលបានចេញក្រឹត្យ ដែលអនុញ្ញាតឲ្យអាជ្ញាធរនៅតាមទីក្រុង អាចមានសិទ្ធិ ចាប់តម្រូវឲ្យមនុស្សពាក់ម៉ាស នៅកន្លែងសាធារណៈ បន្ទាប់ពីសង្កេតឃើញការកើនឡើងនៃករណីឆ្លងជំងឺកូវីដ នៅតំបន់មួយចំនួន នៅប៉ុន្មានសប្តាហ៍ចុងក្រោយនេះ។ តាមអាជ្ញាធរសុខាភិបាលបារាំង ករណីឆ្លងកូវីដ បានកើនឡើង ដល់ ១ពាន់នាក់ ក្នុងមួយថ្ងៃ ដែលជាចំនួនដ៏ខ្ពស់ មិនធ្លាប់មាន គិតចាប់តាំងពីខែមេសាមក។
បន្ទាប់ពីតំបន់Mayenne ដែលតម្រូវឲ្យគេពាក់ម៉ាសនៅកន្លែងសាធារណៈ អាជ្ញាធរ ទីក្រុងលីល ភាគខាងជើង ប្រទេសបារាំង កាលពីថ្ងៃសុក្រ បានប្រកាសចាត់វិធានការដូចគ្នានេះ ដោយតម្រូវឲ្យមនុស្សពាក់ម៉ាស នៅកន្លែងសាធារណៈ ដូចជានៅតាមផ្លូវដើរដែលសំបូរហាងទំនិញ នៅតាមទីក្រុង និងនៅតាមសួនច្បារ សួនឧទ្យានដែលជាកន្លែងសំបូរមនុស្សកកកុញ នៅរដូវក្តៅ។
ទីក្រុងលីល ដែលមានប្រជាជនជាង ១លាននាក់ បានតម្រូវឲ្យមនុស្សម្នាពាក់ម៉ាសជាចាំបាច់ នៅតាមទីវាល បន្ទាប់ពីសង្កេតឃើញថា អត្រាមនុស្សឆ្លងនៅ លីល បានកើនឡើង សឹងទ្វេដង បើប្រៀបធៀបនឹងសប្តាហ៍កន្លងទៅ ពោលគឺ ពី ១៧នាក់ ទៅ ៣១នាក់ នៃចំនួន មនុស្ស ១សែននាក់។ ៣១នាក់ នៃ១សែននាក់ជាអត្រាខ្ពស់ ឈានទៅរកអត្រាប្រកាសអាសន្ន (ដែលគេកំណត់ត្រឹម៥០នាក់)។ សម្រាប់អាជ្ញាធរក្រុងលីល វិធានការតម្រូវឲ្យពាក់ម៉ាសជាចាំបាច់នៅកន្លែងសាធារណៈ ដែលបើកចំហ ដូចជានៅសួនច្បារជាដើម ធ្វើឡើង ដើម្បី ជៀសវាងកុំឲ្យមានការឆ្លងជំងឺកូវីដខ្លាំង ដែលនឹងអាចឈានទៅបិទទីក្រុងសាជាថ្មី។ វិធានការរបស់អាជ្ញាធរមានសុពលភាពរយៈពេល១ខែ និងអាចពន្យារពេល បើសិនចាំបាច់ ចំណែកអ្នកដែលល្មើស មិនព្រមពាក់ម៉ាស នៅកន្លែងសាធារណៈ នឹងត្រូវចាប់ផាកពិន័យ ឲ្យបង់ប្រាក់ ១៣៥អឺរ៉ូ។
លោកនាយករដ្ឋមន្រ្តីបារាំង ហ្សង់ កាស្តិច បានធ្វើដំណើរទៅដល់ទីក្រុងលីល ជាទីដែលវិធានការពាក់ម៉ាស ជាចាំបាច់ នៅកន្លែងសាធារណៈ នៅទីវាល ចាប់ចូលជាធរមាន នៅថ្ងៃចន្ទនេះ។ បន្ទាប់ពីស្តាប់របាយការណ៍នៃស្ថានភាពជំងឺកូវីដ ប្រមុខរដ្ឋាភិបាលបារាំង ត្រូវធ្វើទស្សនកិច្ច នៅ រោងចក្រ ផលិតម៉ាស ដ៏សំខាន់មួយ របស់ទីក្រុងលីល ដែលល្បីល្បាញខាងឧស្សាហកម្ម វាយនភណ្ឌ។ ចាប់តាំងពីកើតមានវិបត្តិកូវីដ រដ្ឋាភិបាលបារាំង បានត្រលប់ទៅជំរុញ ការផលិតម៉ាសក្នុងស្រុក ជាអាទិភាព ដើម្បី ផ្គត់ផ្គង់តម្រូវការក្នុងស្រុក កុំឲ្យមានការខ្វះខាត និងត្រូវរត់ទៅទិញ ពីស្រុកចិន ដូចកាលពី មុនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ