អាកាសធាតុ ៖ តំបន់បូលឡើងកម្តៅសីតុណ្ហភាពខ្លាំង ស្ទើរបំបែកកំណត់ត្រាចាស់
មានកំណត់ត្រាថ្មី ! មេឃក្តៅណាស់ ក្តៅខ្លាំងជ្រុលបន្តិចផង។ តាំងពីថ្ងៃសៅរ៍រហូតដល់ថ្ងៃចន្ទទី ២៧កក្កដា២០២០នេះ សីតុណ្ហភាពនៅតំបន់ភាគខាងជើងបំផុតប្រទេសន័រវេស បានឡើងខ្ពស់ខ្លាំង មិនធ្លាប់ជួបប្រទះឡើយគិតចាប់តាំងពីឆ្នាំ១៩៧៩មក។ និយាយជារួម សីតុណ្ហភាពតំបន់ប៉ូលអាកទិកទាំងមូល បានឡើងខ្ពស់ លើសកម្រិតកម្តៅធម្មតា គ្រប់រដូវទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
សម្រាប់បណ្តាជនរស់នៅតំបន់អឌ្ឍគោលខាងជើង ពេលនិយាយអំពីរដូវក្តៅ គេគិតឃើញភ្លាមដល់វិស្សមកាលនិងពន្លឺព្រះអាទិត្យ ប៉ុន្តែក៏ជាសញ្ញាអាសន្នប្រាប់អំពីបម្រែបម្រួលអាកាសធាតុ ថាសីតុណ្ហភាពនៃភពផែនដីកំពុងកើនឡើងយ៉ាងឆាប់រហ័សដែរ។
ជាក់ស្តែងនៅតំបន់ភាគខាងជើងប្រទេសន័រវេស ត្រង់ប្រជុំកោះ Svalbard ឬ Spitzberg សីតុណ្ហភាពបានឡើង ដល់ ២១,២អង្សា តាំងពីសៅរ៍ទី ២៥កក្កដាមក និងរហូតមកទល់ថ្ងៃចន្ទនេះទៀត ពោលគឺស្ទើរស្មើនឹងកម្រិតសីតុណ្ហភាពដ៏ខ្ពស់បំផុតក្នុងកំណត់ត្រា (២១,៣អង្សា)។ តំបន់ធ្លាប់ជួបករណីសីតុណ្ហភាពឡើងខ្ពស់បែបនេះម្តង កាលពីឆ្នាំ១៩៧៩។ តាមធម្មតា ក្នុងខែកក្កដា សីតុណ្ហភាពនៅតំបន់ប្រជុំកោះន័រវែសដែលស្ថិតនៅចម្ងាយប្រមាណតែ១០០០គីឡូម៉ែត្រពីចំណុចប៉ូលខាងជើង មានកំរិតប្រែប្រួលត្រឹមពី ៥ទៅ៨អង្សា តែប៉ុណ្ណោះ។
ការឡើងកម្តៅខ្លាំងបែបនេះ នឹងជះផលវិបាកអាក្រក់ខ្លាំងណាស់ទៅលើជីវិតសត្វខ្លាឃ្មុំនៅតំបន់ប៉ូល និងមនុស្សជាតិណាស់ បើគិតក្នុងរយៈពេលវែង។ តែកម្តៅសីតុណ្ហភាពហាក់គ្មានថ្ងៃចុះថយទេ។ របាយការណ៍ផ្លូវការរបស់ន័រវែសClimate in Svalbard 2100 បានព្យាករថា សីតុណ្ហភាពនៅតំបន់ប្រជុំកោះនេះនឹងអាចកើនឡើងជាមធ្យមប្រមាណពី ៧ ទៅ១០អង្សា ពីពេលនេះដល់ដំណាច់សតវត្សរ៍ (២០៧០-២១០០) បើប្រៀបធៀបទៅនឹងសតវត្សរ៍មុន ក្នុងរយៈពេលដូចគ្នាពីឆ្នាំ១៩៧០-២០០០។ ការប្រែប្រួលអាកាសធាតុ បានស្តែងឱ្យឃើញស្រាប់ហើយ។ ពីឆ្នាំ១៩៧១-២០១៧ កម្តៅសីតុណ្ហភាពបានកើនឡើងប្រមាណ៣-៥អង្សា។ នេះបើតាមរបាយការណ៍ន័រវែសដដែល។
គ្រប់អ្នកវិទ្យាសាស្ត្រសុទ្ធតែបានដឹងជាទូទៅថា តំបន់ប៉ូលអាកទិក ឡើងកម្តៅលឿនជាងផ្នែកផ្សេងនៃភពផែនដី។ ប៉ុន្តែរដូវក្តៅឆ្នាំនេះ បានបង្ហាញភស្តុតាងថ្មី និងបំផុសឱ្យមានក្តីព្រួយបារម្ភកាន់តែខ្លាំងជាពិសេសថែមទៀត ៖ តំបន់ប៉ូល បានស្គាល់បាតុភូតរលកកម្តៅហួតហែងខ្លាំង មួយរយៈខ្លី ឬវែង មួយសាៗ ដោយដុបៗ ជាពិសេសនៅតំបន់ប៉ូលគ្រប់គ្រងដោយរុស្ស៊ី។ អ្នកវិទ្យាសាស្ត្រ បានសម្គាល់ឃើញទៀតថា នៅពេលក្តៅខ្លាំងមែនទែន សីតុណ្ហភាពនៅតំបន់ប៉ូលខាងជើង បានឡើងដល់ទៅ ៣៨អង្សា។
នៅតំបន់ស៊ីបេរី សីតុណ្ហភាពឡើងខ្ពស់ជាងកម្រិតកម្តៅធម្មតា ចំនួន ៥អង្សា ជាមធ្យម តាំងពីខែមករា ឆ្នាំ២០២០មក។ ជាផលវិបាក ផ្ទាំងដីដែលកករឹង នៅតំបន់នេះ អាចនឹងត្រូវរលាយកាន់តែលឿន។ ការរលាយផ្ទាំងដីកក ធ្លាប់បង្កការហិនហោចជាសម្ភារៈ ច្រើនមកហើយ ដូចជាធ្វើឱ្យខូចខាតហេដ្ឋារចនាសម្ព័ន្ធ និងអាចជាគំរាមកំហែងបរិស្ថានយ៉ាងធ្ងន់ធ្ងរទៀត នេះបើតាមអ្នកវិទ្យាសាស្ត្រ។ ផ្ទាំងដីកករឹងនៅតំបន់ប៉ូល ជាកំណប់រ៉ែធ្យូងថ្មដែលជាប្រភពបញ្ចេញឧស្ម័នកាបូនិក ដ៏មហិមារ និងដែល ជាតំណាងគ្រោះថ្នាក់ខ្លាំងណាស់សម្រាប់អាកាសធាតុ និងចំពោះសុខភាពមនុស្សជាតិទាំងឡាយ។ ម្យ៉ាងវិញទៀតផ្ទាំងដីកកនោះក៏មានខ្ទប់វីរុស និងបាក់តេរី ដ៏ច្រើនសន្ធឹកសន្ធាប់ទៀតណាស់។ នៅពេលណាផ្ទាំងដីនោះរលាយ បរិស្ថានរងការបំពុលហើយ បាក់តេរីនិងវីរុសអាចនឹងចេញមកចម្លងលើមនុស្សសត្វរុក្ខជាតិគ្រប់បែបយ៉ាងបានទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ