បារាំងអំពាវនាវរកការចរចាក្នុងក្របខណ្ឌOCDE ក្រោយអាមេរិកដំឡើងពន្ធលើទំនិញបារាំង
កាលពីថ្ងៃសុក្រទី១០មិថុនាកន្លងទៅ រដ្ឋាភិបាលសហរដ្ឋអាេមរិក បានប្រកាសដំឡើងពន្ធលើទំនិញបារាំង ដែលគិតជាទឹកប្រាក់ប្រមាណ១៣០០លានដុល្លារ។ ការដំឡើងពន្ធលើទំនិញបារាំងនេះ គឺជាវិធានការសងសិក របស់រដ្ឋាភិបាលអាមេរិក មកលើរដ្ឋាភិបាលបារាំង ដែលបានធ្វើច្បាប់យកពន្ធពីលើក្រុមហ៊ុនបច្ចេកវិទ្យាធំៗរបស់អាមេរិក ដែលប្រមូលប្រាក់ចំណូលនៅក្នុងប្រទេសបារាំង។ ឆ្លើយតបនឹងការសងសិកនេះ បារាំងបានអំពាវនាវ ឲ្យមានការចរចា ស្រុះស្រួលគ្នា នៅក្របខណ្ឌ នៃអង្គការសហប្រតិបត្តិការអភិវឌ្ឍន៍សេដ្ឋកិច្ច ហៅកាត់ថា OCDE។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
សហរដ្ឋអាេមរិក បានសម្រេចដំឡើងពន្ធ បន្ថែមចំនួន២៥% ទៅលើមុខទំនិញមួយចំនួនរបស់បារាំង មានដូចជាផលិតផលគ្រឿងសំអាង និង កាបូបយួរដៃ ដែលគិតជាទឹកប្រាក់សរុប ប្រមាណជា១៣០០លានដុល្លារ។ ខុសពីអ្វី ដែលលោកដូណាល់ ត្រាំធ្លាប់បានគំរាម អត្រាពន្ធថ្មីនេះ មិនប៉ះពាល់ទៅលើផលិតផលនាំចេញសំខាន់ៗផ្សេងទៀត របស់បារាំង ដូចជាស្រាឆំប៉ាញ និង ហ្វ្រូម៉ាស ទេ។ ដោយលែក អត្រាពន្ធដាថ្មីនេះ មិនទាន់ចូលជាធរមានភ្លាមទេ ដោយត្រូវរងចាំ៦ខែទៀត។ ប្រការនេះ ហាក់មានន័យថា រដ្ឋាភិបាលអាមេរិក មានបំណងទុកផ្លូវចរចា ជាមួយនឹងរដ្ឋាភិបាលបារាំង។
ប្រភពស្និទនឹងខុទ្ទការល័យលោករដ្ឋមន្ត្រីក្រសួងសេដ្ឋកិច្ចបារាំង បានអះអាងថា នៅថ្ងៃសៅរ៍ទី១១កក្កដា លោករដ្ឋមន្ត្រីក្រសួងសេដ្ឋកិច្ចបារាំង បានទូរស័ព្ទនិយាយគ្នាជាច្រើនម៉ោង ជាមួយនឹងលោករដ្ឋមន្ត្រីក្រសួងសេដ្ឋកិច្ចអាមេរិក ព្រមទាំងជាមួយមន្ត្រីអាមេរិក ទទួលបន្ទុកការចរចាពាណិជ្ជកម្ម។ តែខ្លឹមសារនៃការនិយាយគ្នាយ៉ាងណា គឺគេមិនបានទំលាយឲ្យដឹងទេ។
សូមរំលឹកថា បារាំង និងសហរដ្ឋអាេមរិក ស្ថិតក្នុងស្ថានភាពគំរាមគ្នាទៅវិញទៅមកក្នុងវិស័យពន្ធដានេះ ប្រមាណ១ឆ្នាំហើយ។ នៅខែកក្កដាឆ្នាំ២០១៩ សភាបារាំង បានបោះឆ្នោតអនុម័តលើសេចក្តីព្រាងច្បាប់ សំដៅរិតបន្តឹងការប្រមូលពន្ធ ពីក្រុមហ៊ុនបច្ចេកវិទ្យាធំៗទាំងអស់ ដែលរកស៊ីកើបប្រាក់ចំណេញបានក្នុងប្រទេសបារាំង។ ដោយក្រុមហ៊ុនបច្ចេកវិទ្យាធំៗទាំងនោះ មានដូចជាGoogle Apple Facebook Amazon (GAFA) គឺជាសុទ្ធតែជាក្រុមហ៊ុនអាមេរិក រដ្ឋាភិបាលអាមេរិកបានចេញមុខការពារ ដោយចោទថាច្បាប់បារាំង ជាច្បាប់រើសអើង ដោយអយុត្តិធម៌។ ការប្រមូលពន្ធរបស់បារាំងនេះ នឹងចាប់ផ្តើមអនុវត្តនៅដំណាច់ឆ្នាំ២០២០។
គួររំលឹដែរថា នៅរវាងខែតុលា ២០១៩ ភាគីបារាំង និងអាមេរិក បានយល់ព្រមគ្នាចរចា ក្នុងក្របខណ្ឌអង្គការសហប្រតិបត្តិការអភិវឌ្ឍន៍សេដ្ឋកិច្ច ហៅកាត់ថា OCDE។ តែការចរចា បានអាក់ខាន បន្ទាប់ពីវិបត្តិកូវីដ១៩បានផ្ទុះផ្ទុះឡើង។ ភាគីអាមេរិក បានដកខ្លួនចេញ ព្រោះមិនបានលទ្ធផលរហ័សដូចចិត្ត។
នៅរសៀលថ្ងៃសៅរ៍ទី១១កក្កដា លោក Bruno Le Maire រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបារាំង បានអំពាវនាវ ឲ្យភាគីអាមេរិកត្រលប់មករកតុចរចាវិញ។ លោកលើកឡើងថា វិវាទពន្ធដានេះ ត្រូវតែដោះស្រាយ តាមរយៈការចរចាជាលក្ខណៈអន្តរជាតិ ហើយប្រទេសសមាជិក OCDE សឹងតែទាំងអស់ បានសម្តែងការគាំទ្រចំពោះសំណើរដែលធ្លាប់មានកន្លងមកហើយ។ ប្រសិនបើគ្មានការចរចាណាមួយទេ នៅដំណាច់ឆ្នាំ២០២០នេះ បារាំងនឹងចាប់ផ្តើមអនុវត្តច្បាប់ពន្ធដាថ្មី ទៅលើក្រុមហ៊ុនបច្ចេកវិទ្យាអ៊ីនធ័រណិតទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ