មិនចូលសាលាយូរ តើអាចបង្កផលវិបាកយ៉ាងណាខ្លះសម្រាប់កុមារ ?
ចុះផ្សាយនៅថ្ងៃ៖
ស្តាប់ - ០៨:៥៦
ផលវិបាកមានច្រើន ៖ ស្ត្រេស ឡើងទម្ងន់ កំណើនវិសមភាពនិងអំពើហិង្សាក្នុងគ្រួសារ ... ការបិទសាលាដោយបង្ខំ ដើម្បីទប់ស្កាត់ការរាតត្បាតនៃជំងឺកូវីដ១៩ អាចនឹងបង្កឱ្យមានផលមិនល្អច្រើនដល់ជីវិតប្រចាំថ្ងៃរបស់កុមារ។ ផលវិបាកខ្លះអាចបន្សល់ទុកស្នាមរយៈពេលយូរ។ អ្នកវិទ្យាសាស្ត្រនិងជំនាញបារាំងកាន់តែច្រើនឡើងៗ បានអំពាវនាវឱ្យបើកសាលានិងបន្ធូរបន្ថយវិន័យសុវត្ថិភាពចំពោះកុមារ។
ការរាតត្បាតនៃជំងឺកូវីដ១៩ បានបង្ខំឱ្យអាជ្ញាធរ បិទប្រទេស បង្ឃាំងប្រជាពលរដ្ឋឱ្យនៅក្នុងផ្ទះ និង បិទសាលារៀន។ ការបិទទ្វារសាលា ទោះបីជាតែមួយរយៈក៏ដោយ ក៏បង្កឱ្យមានការខាតបង់សង្គមនិងសេដ្ឋកិច្ចយ៉ាងខ្លាំង។ ភាពរំខាននេះប៉ះពាល់ដល់ប្រជាពលរដ្ឋគ្រប់ស្រទាប់វណ្ណៈ ប៉ុន្តែ កុមារនិងគ្រួសារក្រីក្រ រងផលប៉ះពាល់ខ្លាំងជាងគេ។ ហេតុដូច្នេះហើយបានជាក្រុមអ្នកជំនាញ និងវិទ្យាសាស្ត្រសុខាភិបាលបារាំង កាន់តែច្រើនឡើង បាននាំគ្នាចេញសេចក្តីអំពាវនាវ ឱ្យរដ្ឋាភិបាលគីតគូរបើកសាលារៀនឡើងវិញឱ្យបានកាន់តែឆាប់។ ជាមួយនឹងភស្តុតាងវេជ្ជសាស្ត្រជាច្រើន បង្ហាញកាន់ច្បាស់ឡើងៗថាកុមារមិនសូវឆ្លង និងមិនសូវចម្លងមេរោគកូរ៉ូណាថ្មី ដូចមនុស្សចាស់ គណៈកម្មការវិទ្យាសាស្ត្របារាំងទើបបានចេញអនុសាសន៍ នៅថ្ងៃសៅរ៍ទី ៦មិថុនា យល់ព្រមឱ្យអាជ្ញាធរបន្ធូរបន្ថយវិធានការរក្សាសុវត្ថិភាពសុខភាពកុមារនៅតាមសាលារៀន ដើម្បីបើកឱកាសឱ្យក្មេងបានចូលសាលារៀនវិញ តាមធម្មតា និង ជំនះភាពភ័យខ្លាចឆ្លងជំងឺកូវីដបាន។
តាំងពីថ្ងៃទី ១៦មីនា ២០២០មក ជីវិតប្រចាំថ្ងៃកុមារ នៅជាងកន្លះផែនដី បានប្តូរផ្លាស់។ ក្មេងមិនអាចចេញក្រៅរត់លេងជាមួយក្មេងដទៃ ឬជួបប្រលែងជាងជាមួយពួកម៉ាក មិនទៅសាលាតែត្រូវរៀននៅផ្ទះតាមការបង្រៀនពីចម្ងាយឬតាមអនឡាញ ឬត្រូវរៀនតាមសមត្ថភាពនិងលទ្ធភាពរបស់គ្រួសារ។ ចំណែកឪពុកម្តាយ ដែលត្រូវនៅជាប់ជាប្រចាំជាមួយកូនៗក្នុងផ្ទះ មិនមែនមានស្ត្រេសខ្លាចជំងឺកូរ៉ូណាថ្មីតែមួយមុខទេ តែស្ត្រេសនឹងការងារដែលត្រូវបំពេញពីចម្ងាយ(អនឡាញ)ផង ស្ត្រេសខ្លាចភាពអត់ការងារធ្វើផង ស្ត្រេសខ្លាចការថយ ឬបាត់បង់លែងប្រាក់ចំណូលទៀត។
ការប្តូរផ្លាស់របៀបរបបរស់នៅយ៉ាងភ្លាមភ្លែតដោយគ្មានការគ្រោងទុកបែបនេះ អាចជះឥទ្ធិពលអាក្រក់ លើសុខភាពផ្លូវចិត្ត និងផ្លូវកាយយ៉ាងខ្លាំង ក្នុងពេលភ្លាមផងៗ និងទៅថ្ងៃក្រោយយូរទៀតផង។ ឥទ្ធិពលអាក្រក់លើសុខភាពផ្លូវចិត្តនិងផ្លូវកាយអាចបន្សល់ទុក្ខនូវផលវិបាកកាន់ខ្លាំងចំពោះកុមារក្នុងគ្រួសារដែលមានជីវភាពយ៉ាប់យឺនស្រាប់។ នេះបើតាមការគូសបញ្ជាក់របស់ភ្នាក់ងារសុខាភិបាលជាតិបារាំង នៅក្នុងរបាយការណ៍ចេញផ្សាយកាលពីថ្ងៃទី ៤ ឧសភា ២០២០។
ហានិភ័យឡើងស្ត្រេស ឡើងទម្ងន់
ជាប់បង្ឃាំងយូរ រស់ក្នុងភាពភ័យខ្លាចឆ្លងជំងឺរាតត្បាត ភាពធុញថប់តប់ប្រមល់ ខ្វះការប្រាស្រ័យជួបទាក់ទងជាមួយមិត្ត ជាមួយភក្តិ និងជាមួយគ្រូបង្រៀន នៅក្នុងផ្ទះតែគ្មានកន្លែងណាជារបស់ផ្ទាល់ខ្លួន គ្រួសារបាត់បង់ចំណូលទៀត ... មានមូលហេតុច្រើនដែលជាកត្តានាំឱ្យក្មេងអាចមានស្ត្រេសក្នុងពេលជាប់បង្ឃាំង ឬនៅតែផ្ទះ។ ហើយបើតាមការសិក្សាជាច្រើនបានបង្ហាញថា ស្ត្រេសនេះ ជាផលវិបាកដែលអាចនៅជាប់ក្នុងខ្លួនកុមារនិងក្មេងជំទង់យូរអង្វែងទៅ។ នេះបើតាមការបញ្ជាក់របស់ភ្នាក់ងារសុខភាពសាធារណៈជាតិបារាំង។
នៅពេលមិនទៅសាលាយូរ ក្មេងអាចប្រឈមនឹងគ្រោះសុខភាពខ្លាំង។ ជាឧទាហរណ៍ក្នុងអំឡុងពេលវិស្សមកាលធំ ពីរខែ ភ្នាក់ងារសុខភាពសាធារណៈបារាំងសង្កេតឃើញថា ក្មេងមិនសូវបញ្ចេញសកម្មភាពផ្នែកកម្លាំងកាយសម្បទាទេ តែងប់ជក់នឹងអេក្រង់ច្រើន ចូលគេងមិនទៀងទាត់ ព្រមទាំងញ៉ាំនំឥតដាច់។ បើជាគ្រួសារក្រីក្រ ខ្វះការយល់ដឹងស្តីអំពីរបបនិងគុណភាពចំណីអាហារទៀត ពួកគេត្រូវប្រឈមនឹងបញ្ហាអសន្តិសុខចំណីអាហារមួយទៀត។ ជាលទ្ធផល ក្មេងឡើងទម្ងន់។ ការបិទសាលាដោយហេតុវិបត្តិកូវីដ ជិតបីខែនេះ នឹងផ្តល់លទ្ធផលដូចគ្នា ហើយអាចកាន់តែអាក្រក់ជាងពេលឈប់វិសមកាលធម្មតាទៅទៀត ព្រោះក្មេងមិនអាចចេញរត់លេងក្រៅ ក្នុងសួនសាធារណៈបានផង ឬគ្មានកន្លែងរត់លេផងដោយផ្ទះតូចចង្អៀតគ្មានដីវាល។
បើតាមរដ្ឋបណ្ឌិតសភាវេជ្ជសាស្ត្របារាំង ហានិភ័យនៃការមានគ្រោះថ្នាក់នៅផ្ទះ កើនខ្ពស់ពេលកុមារត្រូវនៅតែផ្ទះ។ បើឪពុកម្តាយ និងអាណាព្យាបាល ធ្វេសប្រហែល តែបន្តិចកូនជួបគ្រោះភ្នែក។ ក្នុងពេលត្រូវធ្វើការធ្វើចម្ងាយផង ត្រូវមើលចូលជាប់ជាប្រចាំពេញមួយ មួយយប់ផង ម្តាយឪពុកងាយនឹងរបូតភាពប្រយ័ត្នប្រយែងមើលកូនណាស់។ គ្រោះថ្នាក់ដែលគេជួបញឹកញយជាងគេ គឺការដួល រលាក ឆក់ ឈ្លក់ទឹក លេបវត្ថុមិនគួរ ឬលេបអាល់កុលលាងដៃ ដែលជាផលិតផលកំពុងពេញនិយមក្នុងសម័យកូរ៉ូណា ជាដើម។ល។
និន្នាការគេចសាលា
ផ្ទុយពីគំនិតដែលធ្លាប់គិត ផ្ទះមិនជាកន្លែងមានសុវត្ថិភាពបំផុតឡើយ។ សម្រាប់កុមារខ្លះ ផ្ទះគឺជាទីកន្លែងដែលពួកគេត្រូវប្រឈមនឹងអំពើហិង្សាក្នុងគ្រួសារ។ ក្នុងពេលជាប់បង្ឃាំងកូវីដ អំពើហិង្សាក្នុងគ្រួសារបានកើនឡើងយ៉ាងខ្លាំងនៅ ជាក់ស្តែងនៅប្រទេសបារាំងកំណើនអំពើហិង្សាមានដល់៨៩% ក្នុងរយៈពេលដូចគ្នាបើប្រៀបទៅឆ្នាំ២០១៩។ ជីវិតគូរងភាពប្រេះឆា និងហិង្សា កុមារក៏ត្រូវរងទុក្ខទៅតាមនោះ ដោយមិនគិតរាប់អំពីអំពើដែលអាចកើតលើរូបក្មេងនោះផ្ទាល់តែម្តងផង។
គ្រួសារកាន់តែផុយស្រួយ មានវិបត្តិផ្ទៃក្នុង និងវិបត្តិសេដ្ឋកិច្ច លក្ខខណ្ឌរស់នៅក្នុងផ្ទះមិនអំណោយផល កុមារកាន់តែរងងាយរងគ្រោះ និងជួបការលំបាកក្នុងសិក្សា រៀនលែងទាន់គេ ហើយអាចលេសនាំពួកគេខ្លាចសាលា លែងចង់ចូលរៀនវិញ។
ចំពោះគ្រួសារទូទៅវិញ ក៏មិនប្រសើរប៉ុន្មានដែរ។ ហានិភ័យកូវីដ១៩បានរុញច្រានពិភពលោកចាត់ទុកបញ្ហាផ្សេងៗទៀតជារឿងបន្ទាប់បន្សំទាំងអស់ សូម្បីតែការសិក្សាអប់រំ។ តាំងពីដើមមក គ្រប់ភ្នាក់ងារតែងណែនាំនិងផ្តល់អនុសាសន៍ឱ្យឪពុកម្តាយគ្រប់រូបប្រុងប្រយ័ត្ននិងចេះគ្រប់គ្រងទទួលខុសត្រូវកូនខ្លួនឯងការប្រើប្រាស់អេក្រង់ ទូរស័ព្ទដៃ ... តែពេលនេះ បម្រើបម្រាស់ស្មាតហ្វូន អ៊ីនធ័រនែត បានហូរជាគំហុក ព្រោះវិបត្តិកូវីដ ការបិទសាលាបានជំរុញពិភពលោកជ្រើសរើសការបង្រៀន តាមអនឡាញ។ គ្មានការណែនាំរំលឹកឪពុកម្តាយឱ្យប្រុងប្រយ័ត្ននឹងការប្រើប្រាស់ហើយ គេថែមទាំងលែងចង់និយាយសោះអំពីហានិភ័យនៃអេក្រង់ចំពោះសុខភាពកុមារ។
ស្មាតហ្វូនក្លាយជាអ្នកមើលក្មេង!
រវល់ធ្វើការផង ត្រូវធ្វើម្ហូបទទួលទានបីពេលផង បោសសម្អាតផ្ទះ ហើយត្រូវធ្វើមើលកូនទៀត ពិតជារត់មិនរួចឡើយ។ បើមិនដាក់កូនឱ្យមើលស្មាតហ្វូនទេនោះ កូនច្បាស់ជាមិនអាចនៅស្ងៀមបានយូរឡើយ។ ការសិក្សាជាក់ស្តែងបានបញ្ជាក់ថា ក្នុងរយៈពេលនៅតែផ្ទះនេះ ក្មេងនៅមុខអេក្រង់ច្រើនជាងទម្លាប់ពីមុនឆ្ងាយណាស់ និងជាទូទៅតែម្តងមិនថានៅក្នុងគ្រួសារណាទេ។
សូមកុំយកទូរស័ព្ទស្មាតហ្វូន មកធ្វើជាអ្នកយាមកូនឱ្យសោះ។ កុមារក្រោមអាយុបីឆ្នាំ ជាអាយុពេញលូតលាស់ខ្លាំងណាស់ ពីមួយខែទៅមួយខែ។ បើកុមារនៅមុខអេក្រង់ច្រើនម៉ោងក្នុងមួយថ្ងៃ នោះកុមារនឹងអាចមានវិបត្តិអាក្បករិយា និងចង្វាក់ដំណេក។ កុមារខ្លះទៀតអាចជួបវិបត្តិធ្ងន់ធ្ងរខ្លាំង ដូចក្រចេះនិយាយស្តី ក្រចេះក្រដឹងនូវអ្វីដែលដល់អាយុត្រូវចេះ និងគ្មានប្រតិកម្មផ្នែកទំនាក់ទំនងជាមួយមនុស្សដទៃទេ ពោលគឺប្រៀបដូចជាក្មេងដែលមានរោគអូទិស្មយ៉ាងដូច្នោះ។
ហានិភ័យទីពីររបស់ស្មានហ្វូន ចំពោះក្មេងធំ។ រូបភាពខ្លះគ្មានឥទ្ធិពលចំពោះមនុស្សចាស់ទេ តែអាចប៉ះទង្គិចយ៉ាងខ្លាំងធ្វើឱ្យកុមារនិងក្មេងអាចធ្លាក់ក្នុងកង្វល់និងការភ័យខ្លាច។ ព័ត៌មានស្តីពីកូរ៉ូណាវីរុស ខ្លះ មិនគួរបណ្តោយឱ្យក្មេងចូលរួមស្តាប់និងមើលជាមួយទេ។ នេះម្យ៉ាង។ ម្យ៉ាងទៀត បើក្មេងនៅមុខស្មានហ្វូន និងអ៊ីនធ័រនែតច្រើន ហានិភ័យជួបមើលរូបភាពហិង្សាអាភាសក៏ច្រើន។ បើមានបញ្ហាផ្លូវចិត្តស្រាប់ នោះក្មេងនឹងងាយធ្លាក់ក្នុងវិបត្តិរោគចិត្ត ឬក៏ធ្វើឱ្យជំងឺមានស្រាប់កាន់តែធ្ងន់ធ្ងរ។
ជាចុងក្រោយគឺស្មានហ្វូនបំពុលដំណេក។ មិនទៅសាលា លែងមានពេលម៉ោងកាលវិភាគត្រឹមត្រូវ ប្តូរទម្លាបចង្វាក់ការងារ ចូលគេងយប់ជ្រៅ ឬដាច់យប់ព្រោះរវល់ជាប់នឹងអ៊ីនធ័រនែត គេងមិនគ្រប់គ្រាន់ ឆ្នាំលែងឆ្ងាញ់ ដល់វ័យជំទង់ផង អារម្មណ៍ធុញថប់និងមួរមៅ ក្លាយទៅជាការធ្លាក់ទឹកចិត្ត កាច និងលែងសូវមានទំនាក់ទំនងនឹងគ្រួសារបងប្អូន។
បើតាមអ្នកជំនាញ ការបិទខ្ទប់ និងបិទសាលាយូរកាលណា ផលវិបាកមានកាន់តែធ្ងន់ធ្ងរខ្លាំងទៅតាមនោះ។ ក្មេងជំទង់ដែលកំពុងស្ថិតក្នុងវ័យពិបាកនិយាយស្រាប់ផង កាន់តែងាយមានគម្លាតសង្គម និងអាចនាំទៅដល់ស្ថានភាពដ៏ព្រួយបារម្ភ ប្រសិនបើពួកគេមិនអាចតោងការសិក្សាជាប់។
ក្មេង មិនគួរណាក្លាយជាជនរងគ្រោះមិនផ្ទាល់ពីជំងឺកូវីដ១៩ ដូចជីដូនជីតា ដែលជាជនរងគ្រោះផ្ទាល់នៃរោគរាតត្បាតកូរ៉ូណាថ្មីនេះឡើយ។ គេមិនគួរធ្វេសប្រហែលចំពោះផលវិបាកនៃការបិទខ្ទប់ទៅលើសុខភាពផ្លូវចិត្ត និងរាងកាយ របស់ក្មេងតូច ក្មេងធំ ក្មេងវ័យជំទង់ឡើយ។ ត្រូវតែគិតគូរបើកសាលា នាំជីវិតក្មេងទៅរកភាពធម្មតាឡើងឱ្យបានឆាប់រហ័យ ព្រោះទិន្នន័យសិក្សាចុងក្រោយបានបញ្ជាក់ហើយថា ហានិភ័យសង្គម ធ្ងន់ធ្ងរជាងហានិភ័យវីរុស ឆ្ងាយណាស់ចំពោះក្មេង។
ត្រូវធ្វើយ៉ាងណាជួយក្មេងគ្រប់វ័យ ឱ្យវិលមកប្រកាន់ទម្លាប់ល្អ ចេះគ្រប់គ្រងពេលវេលា ដឹងម៉ោងរៀន ម៉ោងគេង ម៉ោងងើប ... ទាន់នៅអាចប្តូរផ្លាស់ស្ថានការណ៍បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ