ការបំពុលបរិស្ថានដោយមីក្រូប្លាស្ទិក បានជ្រៀតចូលដល់ប្រព័ន្ធអេកូសាស្ត្រនៅអង់តាកទិក
មីក្រូប្លាស្ទិកបានជ្រៀតចូលទៅបំពុលបរិស្ថាន ដល់គ្រប់កន្លៀតនៃភពផែនដី និងក្នុងគ្រប់មហាសមុទ្ទទាំងអស់។ សូម្បីតែនៅអង់តាកទិក តំបន់ដែលនៅឆ្ងាយដាច់ស្រយាលបំផុតនៃផែនដី ក៏មីក្រូប្លាស្ទិកបានធ្វើដំណើរទៅដល់ និងបំពុលដល់ប្រព័ន្ធអេកូសាស្ត្រលើដែនដីនោះដែរ។ នេះបើតាមការសិក្សាចេញផ្សាយនៅថ្ងៃពុធទី ២៤មិថុនា ២០២០។
ចុះផ្សាយនៅថ្ងៃ៖
ស្តាប់ - ០២:១៩
អ្នកវិទ្យាសាស្ត្រធ្លាប់និយាយច្រើនអំពីមីក្រូប្លាស្ទិកបំពុលបរិស្ថាន បំពុលមហាសមុទ្ទ និងរកឃើញជាតិមីក្រូប្លាស្ទិកក្នុងសត្វនិងសរីរាង្គមានជីវិតទាំងឡាយនៅក្នុងសមុទ្ទ មិនថានៅគៀនកោះណាឬក្នុងតំបន់អន្លង់ទឹកសមុទ្ទជ្រៅជាងគេបំផុតនៅលើលោកទេ។ នៅថ្ងៃពុធទី ២០មិថុនា ២០២០នេះ អ្នកវិទ្យាសាស្ត្រចេញផ្សាយអត្ថបទមួយបញ្ជាក់ថា ពេលនេះ លម្អងមីក្រូប្លាស្ទិក ប៉ូលីស្ទីរ៉ែន ត្រូវបានរកឃើញមាននៅក្នុងពោះសត្វដ៏តូចល្អិតបំផុតចេះលោតដូចចៃដែលរស់នៅលើដី និងក្នុងតំបន់អង់តាកទិក ដ៏ឆ្ងាយដាច់ស្រយាលបំផុតនៃភពផែនដី។ ពពួកសត្វដ៏តូចល្អិតតែអាចធុននឹងអាកាសធាតុត្រជាក់ខ្លាំងនៅអង់តាកទិកបានេះមានរស់នៅច្រើននៅលើផ្ទៃដី ដែលគ្មានទឹកកកគ្របដណ្តប់។ តំបន់ដីគ្មានទឹកកកមានផ្ទៃដីប្រមាណតែ១%នៃ តំបន់អង់តាកទិកប៉ុណ្ណោះ។
សម្រាប់អ្នកវិទ្យាសាស្ត្រ កន្លងមកពិភពលោកប្រហែសមិនគិតពីការបំពុលរបស់មីក្រូប្លាស្ទិកលើផ្ទៃដីទេ។ លទ្ធផលនៃការរកឃើញថាមានលម្អងមីក្រូប្លាស្ទិកក្នុងពោះសត្វនៅអង់តាកទិក នៅពេលនេះ សឱ្យឃើញថាការបំពុលរបស់មីក្រូប្លាស្ទិក ដែលជាស្នាដៃរបស់មនុស្សលោក បានជ្រាបចូលជ្រៅដល់ប្រព័ន្ធចំណីអាហារមួយ គឺដី។ បើមីក្រូប្លាស្ទិកជ្រៀតចូលបំពុលដល់ប្រព័ន្ធចំណីអាហារ ក្នុងតំបន់ដែលដាច់ស្រយ៉ាលបំផុតនៃភពផែនដីដូច្នេះ មានន័យថាអង់តាកទិកដែលកំពុងរងផលប៉ះពាល់ពីការប្រែប្រួលអាកាសធាតុនិងសកម្មភាពមនុស្សស្រាប់ទៅហើយ ត្រូវប្រឈមនឹងកត្តាហានិភ័យមួយទៀតសម្រាប់ប្រព័ន្ធអេកូសាស្ត្រ។ មីក្រូប្លាស្ទិកប្រភេទ ប៉ូលីស្ទីរ៉ែន ជាតំណាងគ្រោះថ្នាក់ពិសេសព្រោះវាមានរចនាសម្ព័ន្ធងាយកើតស្លែនិងពពុះដែលទាក់ទាញសរីរាង្គជាច្រើនផ្សេងទៀត។ នេះបើតាមការគូសបញ្ជាក់បន្ថែមរបស់អ្នកស្រាវជ្រាវ។
គេនៅមិនទាន់ដឹងអំពីផលប៉ះពាល់ចំពោះសុខភាពនៅពេល ចំពោះសត្វតូច/ធំ រស់ក្នុងទឹក និង លើដី លេបចំណីអាហារមានមីក្រូប្លាស្ទិកចូលទៅក្នុងពោះទេ។ ក្រុមអ្នកស្រាវជ្រាវនៅលើពិភពលោកកំពុងសិក្សាអំពីឥទ្ធិពលនៃជាតិគីមីរបស់ប្លាស្ទិក។ ក្រុមអ្នកស្រាវជ្រាវដែលទើបចេញផ្សាយរបកគំឃើញថ្មីនេះ ក៏កំពុងបន្តសិក្សាដែរអំពីផលវិបាកនៃរបស់ក្រុមសត្វល្អិត នៅពេលលេបចំណីមានជាតិមីក្រូប្លាស្ទិក និងផលវិបាកចំពោះសត្វធំដែលស៊ីសត្វល្អិតនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ