អង្គការសុខភាពពិភពលោកចេញកែតម្រូវ ពាក្យអះអាងដែលថា ការឆ្លងកូវីដពីអ្នកគ្មានរោគសញ្ញា ជា “ករណីកម្រ”
អ្នកទទួលខុសត្រូវជាន់ខ្ពស់អង្គការសុខភាពពិភពលោកម្នាក់បានចេញមុខកែតម្រូវនៅថ្ងៃអង្គារទី ០៩ មិថុនានេះ ចំពោះពាក្យអះអាងរបស់ខ្លួនដែលថាការឆ្លងកូវីដពីអ្នកគ្មានរោគសញ្ញាជា “ករណីកម្រ”។ អ្នកស្រី ម៉ារីយ៉ា វ៉ាន់កែខូវេ Maria Van Kerkhove ដែលជាអ្នកទទួលខុសត្រូវបច្ចេកទេសទទួលបន្ទុកចាត់ចែងរោគរាតត្បាត បានពន្យល់ថា អ្នកស្រីបានប្រើពាក្យ “ករណីកម្រ” គឺចង់សំដៅថា ការសិក្សាអំពីការចម្លងកូវីដពីអ្នកគ្មានរោគសញ្ញា មានតិចតួច។
ចុះផ្សាយនៅថ្ងៃ៖
ស្តាប់ - ០២:១២
កាលពីថ្ងៃចន្ទ នៅក្នុងសន្និសីទកាសែតតាមវីដេអូខុនហ្វេរិន អ្នកស្រី ម៉ារីយ៉ា វ៉ាន់កែខូវេMaria Van Kerkhove អ្នកទទួលខុសត្រូវបច្ចេកទេសទទួលបន្ទុកគ្រប់គ្រងរោគរាតត្បាតរបស់អង្គការសុខភាពពិភពលោក បានប្រកាសថា “យោលតាមការសិក្សានៅក្នុងប្រទេសជាច្រើន ការឆ្លងជំងឺកូវីដពីអ្នកគ្មានរោគសញ្ញាទំនងជាករណីកម្រណាស់។ អង្គការសុខភាពពិភពលោកកំពុងព្យាយាមប្រមូលព័ត៌មានបន្ថែមច្រើនទៀត ដើម្បីអាចបំភ្លឺអំពីការចម្លងនេះ។ ប៉ុន្តែវាហាក់ដូចជាកម្រដែលអ្នកគ្មានរោគសញ្ញាចម្លងជំងឺ។ នេះជាការបញ្ជាក់បន្ថែមរបស់អ្នកស្រីជំនាញផ្នែកអេពីដេមីសាស្ត្រ។”
សេចក្តីប្រកាសរបស់អ្នកស្រី ត្រូវបានបង្ហោះផ្សព្វផ្សាយពេញប្រព័ន្ធសង្គម និងបានបំផុសឱ្យមានប្រតិកម្មយ៉ាងខ្លាំងពីសំណាក់សហគមអ្នកវិទ្យាសាស្ត្រ។ “ផ្ទុយពីអ្វីដែលអង្គការសុខភាពពិភពលោកបានប្រកាស គ្មានអ្វីដែលអាចអះអាងតាមបែបវិទ្យាសាស្ត្រថាអ្នកគ្មានរោគសញ្ញាកូវីដ អាចចម្លងមេរោគកូរ៉ូណាតិចតួចបានទេ។” នេះជាប្រតិកម្មរបស់សាស្ត្រាចារ្យវេជ្ជបណ្ឌិតបារាំងលោក Gilbert Deray នៅមន្ទីរពេទ្យ Pitié-Salpêtrière ក្រុងប៉ារីស។ ក្រុមវេជ្ជបណ្ឌិតអង់គ្លេស ថាពិតជាគួរឱ្យភ្ញាក់ផ្អើលមែន និងបានចេញសេចក្តីថ្លែងការណ៍មួយថា “ផ្នែកលើវិទ្យាសាស្ត្រគេនៅមិនទាន់ប្រាកដទេ ប៉ុន្តែការឆ្លងកូវីដពីអ្នកគ្មានរោគសញ្ញាអាចមានកំរិតប្រមាណពី៣០ទៅ៥០%។ ការសិក្សារបស់អ្នកវិទ្យាសាស្ត្រដ៏ប្រសើរជាងគេមួយបានសន្និដ្ឋានថាមានករណីកើតកូវីដដល់ពាក់កណ្តាល ឆ្លងមកពីអ្នកមានផ្ទុកមេរោគកូរ៉ូណាថ្មី គ្មានរោគសញ្ញា និងរៀបចេញរោគសញ្ញា”។
ប្រឈមនឹងប្រតិកម្មយ៉ាងផុលផុសនេះ អ្នកស្រី ម៉ារីយ៉ា វ៉ាន់កែខូវេ បានចេញមុខពន្យល់និងកែតម្រូវ សេចក្តីប្រកាសរបស់ខ្លួន ដោយបញ្ជាក់ថា ការសិក្សាអំពីការចម្លងរបស់អ្នកគ្មានរោគសញ្ញា ជាសិក្សាដ៏លំបាក ប៉ុន្តែបើភស្តុតាងប្រមូលបាននិងផ្តល់ដោយរដ្ឋជាសមាជិករបស់អង្គការ ការចម្លងរបស់អ្នកគ្មានរោគសញ្ញា និងអ្នកផ្ទុកមេរោគ ទំនងជាមិនខ្លាំងដូចអ្នកមានរោគសញ្ញាទេ។
តាមរយៈគណនីរបស់អង្គការសុខភាពពិភពលោក អ្នកស្រី វ៉ាន់កែខូវេ បានបញ្ជាក់បន្ថែមទៀតថា សូមកុំយល់ច្រលំ ពាក្យ“ករណីកម្រ” ដែលអ្នកស្រីបានប្រើគឺចង់សំដៅលើ ភាពកម្រនៃការសិក្សាអំពីការចម្លងរបស់អ្នកគ្មានរោគសញ្ញា។ ជាការសិក្សាដែលមានតែពីរបីក្រុមតូច។ ជាចម្លើយតបទៅនឹងសំណួររបស់អ្នកកាសែត និងមិនមែនជាការបញ្ជាក់ជំហរផ្លូវការរបស់អង្គការសុខភាពពិភពលោកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ