កូវីដ១៩៖ អង្គការសុខភាពពិភពលោក ប្រកាសបន្តការសាកល្បង ថ្នាំក្លូរ៉ូគីន និង អ៊ីដ្រូស៊ីក្លូរ៉ូគីន
ភាពស្រពិចស្រពិល ចម្រូងចម្រាស ទាក់ទិននឹង ថ្នាំក្លូរ៉ូគីន និង ថ្នាំអ៊ីដ្រូស៊ីក្លូរ៉ូគីន នៅមិនទាន់ចប់ទេ។ ក្រោយពីបានសម្រេចផ្អាកជាបណ្តោះអាសន្ន នូវការសាកថ្នាំទាំង២មុខនេះ ៩ថ្ងៃក្រោយមក អង្គការសុខភាពពិភពលោក បានប្រកាសកាលពីថ្ងៃទី៣ មិថុនា ថាខ្លួននឹងបន្តការសាកល្បង ថ្នាំក្លូរ៉ូគីន និង ថ្នាំអ៊ីដ្រូស៊ីក្លូរ៉ូគីន នៅក្នុងក្របខណ្ឌនៃការសាកល្បង រកថ្នាំព្យាបាលជំងឺកូវីដ១៩ តទៅទៀត ព្រោះថាយោងតាមការវិភាគទិន្នន័យ គឺវាមិនមានគ្រោះថ្នាក់គួរឲ្យកត់សំគាល់ទេ។
ចុះផ្សាយនៅថ្ងៃ៖
ស្តាប់ - ០២:៤២
កម្មវិធីសាកល្បងស្វែងរកថ្នាំព្យាបាលជំងឺកូវីដ១៩ ឈ្មោះ Solidarity ត្រូវបានអង្គការសុខភាពពិភពលោក ចាប់ផ្តើមកាលពីចុងខែមេសា ដែលក្នុងចំណោមថ្នាំសាកល្បង គឺគេបានបញ្ចូល ថ្នាំក្លូរ៉ូគីន និង ថ្នាំអ៊ីដ្រូស៊ីក្លូរ៉ូគីន។ តែប្រមាណមួយខែក្រោយមក អង្គការសុខភាពពិភពលោក បានសម្រេចផ្អាកជាបណ្តោះអាសន្ន នូវការសាកល្បងថ្នាំក្លូរ៉ូគីន និង ថ្នាំអ៊ីដ្រូស៊ីក្លូរ៉ូគីន បន្ទាប់ពីទស្សនាវត្តី The Lancet បានចុះផ្សាយ នៅថ្ងៃទី២២ឧសភា ថាថ្នាំទាំង២មុខនេះ អាចបង្កើនកម្រិតគ្រោះថ្នាក់ដល់ជីវិត របស់អ្នកជំងឺកូវីដ១៩ ដោយសារតែវាទៅរំខាន ដល់ចង្វាក់បេះដូង។
អង្គការសុខភាពពិភពលោក បានបញ្ជាក់ថា ការផ្អាកបណ្តោះអាសន្ននេះ គឺដើម្បីទុកពេល៣សប្តាហ៍ ឲ្យអ្នកជំនាញពិនិត្យលើទិន្ន័យដែលប្រមូលបាន ដើម្បីវិនិច្ឆ័យពីភាពគ្រោះថ្នាក់ នៃការប្រើថ្នាំទាំង២មុខនេះ ទៅលើអ្នកជំងឺកូវីដ១៩។ តែផ្អាកបានតែ៩ថ្ងៃ អង្គការសុខភាពពិភពលោក បានសម្រេច កាលពីថ្ងៃទី៣មិថុនា ថានឹងបន្តការប្រើសាកល្បងថ្នាំក្លូរ៉ូគីន និង ថ្នាំអ៊ីដ្រូស៊ីក្លូរ៉ូគីន ដូចធម្មតាវិញ។
នៅក្នុងសន្និសីទកាសែត ពីទីស្នាក់ការទីក្រុងហ្សឺណែវ លោក Soumya Swaminathan ប្រធានក្រុមជំនាញវិទ្យាសាស្ត្រ ប្រចាំអង្គការសុខភាពពិភពលោក បានលើកឡើងថា ឆ្លងកាត់ការពិនិត្យវិភាគលំអិត លើទិន្នន័យដែលប្រមូលបាន គឺគេពុំសង្កេតឃើញថា កម្រិតនៃគ្រោះថ្នាក់ដល់ជីវិត មានភាពខុសគ្នា រវាងអ្នកជម្ងឺកូវីដ១៩ ដែលទទួលបានថ្នាំក្លូរ៉ូគីន ឬអ៊ីដ្រូស៊ីក្លូរ៉ូគីន និងអ្នកជំងឺដែលមិនទទួលឆ្នាំទាំង២មុខនេះឡើយ។ ដូច្នេះយើងតាមការសន្និដ្ឋាននេះ លោកអគ្គនាយកអង្គការសុខភាពពិភពលោក បានថ្លែងថា គ្មានហេតុផលអ្វី ដែលត្រូវធ្វើការកែប្រែ ឬផ្លាស់ប្តូរ ប្រូតូកូលសាកល្បងទេ។
គួរកត់សំគាល់ថា ការសម្រេចបន្តប្រើសាកល្បងថ្នាំក្លូរ៉ូគីន និង ថ្នាំអ៊ីដ្រូស៊ីក្លូរ៉ូគីន របស់អង្គការសុខភាពពិភពលោកនេះ គឺវាជួនចំពេលគ្នាផងដែរ ដែលទស្សនាវត្តី The Lancet បានប្រកាសថាខ្លួន បានរកឃើញនូវភាពមិនប្រក្រតី ដែលអាចចោទជាបញ្ហា ទៅលើរបាយការណ៍សិក្សា ដែលខ្លួនបានចុះផ្សាយ ទាក់ទិននឹងប្រសិទ្ធិភាពថ្នាំក្លូរ៉ូគីន។ ការសិក្សាដែលមានទិន្នន័យធំមហិមានេះ គឺទស្សនាវត្តី បានស្រង់ទិន្នន័យចេញពីក្រុមហ៊ុន Surgisphere។ ដោយមានការសង្ស័យ ពីប្រត្យក្សភាពនៃទិន្នន័យទាំងនោះ គណកម្មការនិពន្ធនៃទស្សនាវត្តី The Lancet បានសម្រេចធ្វើសាវនកម្មឯករាជ្យ ដើម្បីកំណត់ថា ទិន្នន័យទាំងនោះពិតជាអាចយកជាការពាន។
បើសិនជាមានបញ្ហា ហើយតម្រូវឲ្យទស្សនាវត្តី The Lancet ដកចេញវិញនូវអត្ថបទចុះផ្សាយរបស់ខ្លួន នោះគឺជារឿងមួយអាម៉ាសបំផុត សម្រាប់ទស្សនាវត្តីនេះ ដែលទស្សនាវត្តីដ៏ល្បីក្នុងចំណោមទស្សនាវត្តីយោងធំៗទាំង៤ នៃវិស័យស្រាវជ្រាវវិជ្ជសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ