អ្នកជំនាញអឺរ៉ុប៖ថ្នាំវ៉ាក់សាំងប្រឆាំងកូវីដ-១៩ អាចនឹងរកឃើញនៅ ១ឆ្នាំទៀត
នៅថ្ងៃព្រហស្បតិ៍ ទី១៤ ឧសភា ក្រុមអ្នកជំនាញនៃទីភ្នាក់ងារថ្នាំពេទ្យអឺរ៉ុបបានយល់ឃើញថា ថ្នាំវ៉ាក់សាំងប្រឆាំងនឹងកូវីដ-១៩ អាចនឹងលេចរូបរាងឡើងនៅ ១ឆ្នាំទៀត។ តែក្រុមអ្នកជំនាញអឺរ៉ុបដដែលបានទទួលស្គាល់ថា សេណារីយ៉ូប្រកបដោយសុទិដ្ឋិនិយមមួយនេះនឹងមិនកំចាត់មេរោគមួយនេះទាំងស្រុងទេ។ ការអះអាងរបស់ទីភ្នាក់ងារថ្នាំពេទ្យអឺរ៉ុបបានធ្លាក់មក ខណៈដែលមានរឿងអាស្រូវកំពុងផ្ទុះឡើងរវាងរដ្ឋាភិបាលបារាំង និងក្រុមហ៊ុនផលិតថ្នាំបារាំងសាណូហ្វី។ រឿងអាស្រូវនេះ គឺពាក់ព័ន្ធនឹងការថ្លែងរបស់អគ្គនាយកក្រុមហ៊ុនសាណូហ្វីលោក Paul Hudson ក្នុងថ្ងៃពុធ ទី១៣ ឧសភាដែលថា បើសាណូហ្វីរកឃើញថ្នាំវ៉ាក់សាំងមុនគេ លោកនឹងធ្វើការចែកចាយឲ្យអាមេរិកមុនគេ ព្រោះរដ្ឋបាលអាមេរិកបានចំណាយលុយច្រើនដើម្បីគាំទ្រការងារស្រាវជ្រាវរបស់ក្រុមហ៊ុនសាណូហ្វី។
ចុះផ្សាយនៅថ្ងៃ៖
ស្តាប់ - ០២:៤៤
ខណៈដែលថ្នាំវ៉ាក់សាំង និងថ្នាំព្យាបាលជំងឺកូវីដ-១៩ នៅមិនទាន់បានរកឃើញផង សង្រ្គាមពាក្យសម្តីជុំវិញការស្រាវជ្រាវរកថ្នាំវ៉ាក់សាំង និងថ្នាំព្យាបាលជំងឺផ្លូវដង្ហើមមួយនេះហាក់កំពុងផ្ទុះឡើងយ៉ាងខ្ចរខ្ចាយ។ គួរជម្រាបថាសព្វថ្ងៃនេះ បញ្ជីឈ្មោះក្រុមហ៊ុន និងវិទ្យាស្ថានដែលកំពុងសកម្មស្រាវជ្រាវរកថ្នាំវ៉ាក់សាំង និងថ្នាំព្យាបាលកូវីដ-១៩ មានយ៉ាងវែងអន្លាយ ក្នុងនោះក៏មានក្រុមហ៊ុនយក្សផលិតថ្នាំបារាំងសាណូហ្វីមួយដែរ។ នៅក្នុងគម្រោងស្រាវជ្រាវថ្នាំវ៉ាក់សាំងសរុបជាង ១០០គម្រោងនៅទូទាំងពិភពលោក គឺទើបតែមានប្រមាណ ១០គម្រោងប៉ុណ្ណោះដែលបានធ្វើការសាកល្បង។ សម្រាប់ក្រុមអ្នកជំនាញនៃទីភ្នាក់ងារថ្នាំពេទ្យអឺរ៉ុប ថ្នាំវ៉ាក់សាំងប្រឆាំងកូវីដ-១៩ អាចនឹងលេចរូបរាងឡើងនៅ ១ឆ្នាំទៀត។
តែក្រុមអ្នកជំនាញអឺរ៉ុបដដែល ក៏ដូចជាអង្គការសុខភាពពិភពលោកបានទទួលស្គាល់ដូចគ្នាថា ទោះបីជាមានថ្នាំវ៉ាក់សាំងក៏ដោយក៏មេរោគកូរ៉ូណាថ្មីមួយនេះមិនអាចបាត់បង់ទាំងស្រុងដែរ។ ចុះបើក្រុមហ៊ុនបារាំងសាណូហ្វីជាអ្នករកឃើញថ្នាំវ៉ាក់សាំងប្រឆាំងកូវីដ-១៩ មុនគេ តើប្រទេសណាដែលនឹងទទួលបានថ្នាំវ៉ាក់សាំងនេះមុនគេ ?។ គឺអាមេរិក ព្រោះអាមេរិកជាអ្នកដែលបានចំណាយលុយយ៉ាងច្រើនជួយគាំទ្រលើការស្រាវជ្រាវរបស់ក្រុមហ៊ុនសាណូហ្វី នេះជាការថ្លែងរបស់អគ្គនាយកក្រុមហ៊ុនសាណូហ្វីលោក Paul Hudson នាថ្ងៃពុធ ទី១៣ ឧសភា។ តែលោក Paul បានបញ្ជាក់ថា អាមេរិកនឹងទទួលបានមុនគេតែប៉ុន្មានថ្ងៃ ឬប៉ុន្មានសប្តាហ៍ប៉ុណ្ណោះ។
ប្រធានក្រុមហ៊ុនសាណូហ្វីក្នុងប្រទេសបារាំងលោក Olivier Bogillot មិនបានបដិសេធលើការលើកឡើងរបស់លោក Paul ទេ ព្រមទាំងបានអំពាវនាវឲ្យអឺរ៉ុបចូលរួមដូចអាមេរិកដើម្បីជួយគាំទ្រលើការងារស្រាវជ្រាវរបស់ក្រុមហ៊ុនសាណូហ្វី។ ទោះជាយ៉ាងនេះ សម្តីរបស់លោក Paul ដូចនេះបានធ្វើរដ្ឋអំណាចបារាំងក្តៅស្លឹកត្រចៀកយ៉ាងខ្លាំង។ នាយករដ្ឋមន្រ្តីបារាំងលោកហ្វីលីបដែលមានកិច្ចសន្ទនាជាមួយប្រធានក្រុមប្រឹក្សារដ្ឋបាលក្រុមហ៊ុនសាណូហ្វីបានបញ្ជាក់ថា ការទទួលបានថ្នាំវ៉ាក់សាំងស្មើភាពសម្រាប់ទាំងអស់គ្នាជារឿងដែលមិនអាចចរចាបានជាដាច់ខាត។ ចំណែកប្រធានាធិបតីបារាំងលោកម៉ាក្រុងបានយល់ឃើញពីភាពចាំបាច់ដែលថ្នាំវ៉ាក់សាំងប្រឆាំងកូវីដ-១៩ ជាផលិតផលរបស់ពិភពលោក។
តាមវិមានប្រធានាធិបតីបារាំង លោកម៉ាក្រុងនឹងទទួលជួបថ្នាក់ដឹកនាំក្រុមហ៊ុនសាណូហ្វីនៅសប្តាហ៍ក្រោយដើម្បីជជែកលើបញ្ហានេះ។ ប្រតិកម្មពីសហភាពអឺរ៉ុប អ្នកនាំពាក្យគណៈកម្មការអឺរ៉ុបបានអះអាងថា ថ្នាំវ៉ាក់សាំងប្រឆាំងកូវីដ-១៩ ត្រូវតែជាផលិផលបម្រើប្រយោជន៍សាធារណៈ ហើយសិទ្ធិនៃការទទួលបានថ្នាំវ៉ាក់សាំងនេះត្រូវតែស្មើភាព និងជាសកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ