កូវីដ១៩៖ នាយករដ្ឋមន្ត្រីបារាំង បង្ហាញផែនការគោលនៅចំពោះមុខសភា ដើម្បីបើកប្រទេសឡើងវិញ
អស់ប្រមាណ៦សប្តាហ៍មកហើយ ដែលបារាំងត្រូវបិទទាំងស្រុង មិនថាសាលារៀន ហាងទំនិញក្រុមហ៊ុនសហគ្រាសនានា។ នៅរសផលថ្ងៃអង្គារទី២៨មេសា លោកអេឌ័រ ហ្វីលីព នាយករដ្ឋមន្ត្រីបារាំង បានធ្វើបទបង្ហាញ នៅចំពោះមុខសមាជិកសភាជាតិបារាំង ដើម្បីប្រកាសអំពីផែនការគោលធំៗរបស់រដ្ឋាភិបាល ក្នុងការបើកប្រទេសឡើងវិញ ចាប់ពីថ្ងៃទី១១ឧសភាទៅ។ តាមសេចក្តីប្រកាសរបស់លោកនាយករដ្ឋមន្ត្រីបារាំង ការបើកប្រទេសឲ្យដំណើរការឡើងវិញនេះ នឹងធ្វើទៅជាដំណាក់ៗ និងដោយយោងទៅតាមដំបន់ភូមិសាស្ត្រនីមួយៗ ដែលមានកម្រិតឆ្លងរាលដាលកូវីដ១៩ ខុសៗគ្នា។
ចុះផ្សាយនៅថ្ងៃ៖
ស្តាប់ - ០៣:៤៩
នៅក្នុងសន្ទរកថា រយៈពេលមួយម៉ោង ចំពោះមុខអង្គសភាជាតិបារាំង លោកនាយករដ្ឋមន្ត្រី អេឌ័រ ហ្វីលីព បានថ្លែងរៀបរាប់ និងពន្យល់លំអិត ពីមួយចំណុចទៅមួយចំណុច ស្តីអំពីផែនការគោល ដែលរដ្ឋាភិបាលបារាំងនឹងអនុវត្ត ដើម្បីបើកប្រទេសឡើងវិញ នៅថ្ងៃទី១១ឧសភា។
ចាប់ពីថ្ងៃទី១១ឧសភាទៅ ហាងទំនិញ ក្រុមហ៊ុន សហគ្រាសទាំងអស់នឹងអាចបើកដំណើរការឡើងវិញ លើកលែងតែ ហាងកាហ្វេ ភោជនីយដ្ឋាន បារ រង្គសាល។ នៅចុងខែឧសភា រដ្ឋាភិបាលនឹងសម្រេចជាថ្មីម្តងទៀត ក្នុងការអនុញ្ញាតឲ្យបើកហាងកាហ្វេ និងភោជនីយដ្ឋានឡើងវិញ។
ទាក់ទង់នឹងការធ្វើការពីផ្ទះវិញ លោកនាយករដ្ឋមន្ត្រីបញ្ជាក់ថា បើសិនជាអាចបន្តធ្វើបាន គឺក្រុមហ៊ុនសហគ្រាស ត្រូវតែជំរុញ អនុញ្ញាតឲ្យបុគ្គលិកបន្តធ្វើការពីផ្ទះតទៅទៀត។ រីឯវិធានការច្បាប់ពិសេស ទាក់ទងនឹងការទទួលប្រាប់ឧបត្ថម្ភ ចំពោះអ្នកបាត់បងការងារ គឺនឹងបន្តអនុវត្តដល់ថ្ងៃទី១ខែមិថុនា។
សេវាដឹកជញ្ជូនសាធារណៈ នឹងត្រូវកាត់បន្ថយប្រមាណ៣០% ហើយត្រូវរៀបចំ ឲ្យមានគំលាតគ្នា រវាងអ្នកដំណើរ។ អ្នកដំណើរត្រូវតែពាក់ម៉ាស មិនថាតាមសេវាដឹកជញ្ជូនសាធារណៈ ឬតាមរថយន្តតាក់ស៊ី រថយន្តដឹកជញ្ជូនឯកជននោះទេ។ ការធ្វើដំណើរឆ្លង ពីតំបន់មួយទៅតំបន់មួយ អាចធ្វើបានតែក្នុងរយៈចំងាយតិចជាង១០០គីឡូម៉ែត្រពីកន្លែងរស់នៅ លើកលែងតែមានមូលហេតុបន្ទាន់ណាមួយ។
ឆ្នេរសមុទ្រ នឹងនៅតែបន្តបិទ ហាមមិនឲ្យមនុស្សដើរ រហូតដល់ថ្ងៃទី១មិថុនា។ ចំណែកសួនច្បារសាធារណៈនៅតាមទីក្រុងវិញ នឹងអាចចាប់ផ្តើមបើកបាន ចាប់ពីថ្ងៃទី១១ឧសភា តែចំពោះទីក្រុង ដែលស្ថិតនៅក្នុងដែនដីដេប៉ាតឺម៉ង់ ដែលមិនសូវមានការឆ្លងរាលដាលខ្លាំងតែប៉ុណ្ណោះ។ ការជួបជុំមនុស្សលើសពី១០នាក់ទៅ ត្រូវហាមឃាត់។ កម្មវិធីជួបជុំបែបសាសនា ក៏ត្រូវហាមឃាត់ រហូតដល់ថ្ងៃទី២មិថុនា។ ចំពោះផ្សារ លក់ម្ហូបចំណី នៅហាលវាល អាចចាប់ផ្តើមបើកវិញបាន ចាប់ពីថ្ងទី១១ឧសភា លើកលែងតែមានការជំទាស់ ពីអាជ្ញាធរមូលដ្ឋាន។
សាលារៀននឹងបើកដំណើរការវិញដោយសន្សឹមៗ ដោយចាប់ផ្តើមដំបូងពីថ្នាក់មតេយ្យ និងបឋមសិក្សា នៅថ្ងៃទី១១ឧសភា។ តែយ៉ាងណា លោកនាយករដ្ឋមន្ត្រីបញ្ជាក់ថា វាឈរលើការស្ម័គ្រចិត្ត របស់ឪពុកម្តាយ ថាចង់បញ្ជូនកូនឲ្យទៅសាលាឬអត់។ ចំណែកថ្នាក់អនុវិទ្យាល័យ នឹងបើកឡើងវិញនៅថ្ងៃទី១៨ឧសភា។ ហើយនៅចុងខែឧសភា រដ្ឋាភិបាលនឹងកំណត់កាលបរិច្ឆេទបើក សម្រាប់វិទ្យាល័យ។
លោកនាយករដ្ឋមន្ត្រីបារាំង បានធានាអះអាងថា ចាប់ពីថ្ងៃទី១១ឧសភាទៅ អាជ្ញាធរនឹងមានម៉ាស់គ្រប់គ្រាន់ ដើម្បីចែកចាយ ឲ្យមានការដាក់លក់នៅតាមទីផ្សារទូទាំងប្រទេស។ លោកក៏បានអះអាងដែរថា អាជ្ញាធរសុខាភិបាល មានកម្មវត្ថុធ្វើតេស្តស្វែងរកមេរោគ ឲ្យបានយ៉ាងហោច ៧សែនតេស្ត ក្នុងមួយសប្តាហ៍ ចាប់ពីថ្ងៃទី១១ឧសភាទៅ។ បន្តាប់មកទៀតអាជ្ញាធរនឹងស្វែងរកមនុស្ស ដែលបានប្រាស្រ័យ ប៉ះពាល់ជាមួយអ្នកដែលមានលទ្ធផលវិជ្ជមាន ដើម្បីយកមកធ្វើតេស្ត និងឈានទៅដាក់ឲ្យនៅដាច់ដោយឡែក។
លោកនាយករដ្ឋមន្ត្រីបារាំង បានឆ្លៀតសង្កត់ធ្ងន់ថា ដើម្បីឲ្យផែនការបើកប្រទេសឡើងវិញនេះ អាចប្រព្រឹត្តិទៅដោយជោគជ័យ នឹងដោយមិនធ្វើឲ្យទំហំឆ្លងរាលដាលកូវីដ១៩ រីកធំទេនោះ គឺវាមិនមែនអាស្រ័យតែទៅលើរដ្ឋាភិបាល តែម្នាក់នោះទេ។ គឺវាត្រូវការ ការចូលរួមគោរពឲ្យបានម៉ដ្ឋចត់ ការប្រុងប្រយ័ត្ន និងការសហការ ពីសំណាក់ប្រជាជនទាំងអស់ ដោយខានមិនបាន។ ផ្ទុយទៅវិញ បើពីនេះទៅ ការឆ្លងរាលដាលនូវកូវីដ១៩ មិនចុះថយទេនោះ នោះរដ្ឋាភិបាលត្រូវតែបង្ខំចិត្ត ចាត់វិធានការរិតបន្តឹងបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ