អត្រាអ្នកស្លាប់ដោយគ្រោះថ្នាក់ចរាចរណ៍នៅបារាំងថយចុះ ពេលរដ្ឋាភិបាលបិទប្រទេសទប់ស្កាត់កូវីដ១៩
ចំនួនអ្នកស្លាប់ដោយសារគ្រោះថ្នាក់ចរាចរណ៍នៅក្នុងប្រទេសបារាំងបានថយចុះជិត ៤០% ក្នុងខែមីនា ឆ្នាំ ២០២០នេះ បើប្រៀបធៀបទៅនឹងខែដូចគ្នាក្នុងឆ្នាំ ២០១៩។ អតា្រថយចុះនេះ គឺជាលទ្ធផលកើតចេញមកពីវិធានការបិទខ្ទប់ប្រទេស បង្ខាំងពលរដ្ឋបារាំងឲ្យសំងំនៅតែក្នុងផ្ទះដើម្បីទប់ស្កាត់ការឆ្លងរាតត្បាតនៃជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:២៨
ពលរដ្ឋបារាំងចំនួនប្រមាណ ៦៧ លាននាក់ ត្រូវបានតម្រូវឱ្យស្នាក់នៅតែក្នុងផ្ទះ ចាប់តាំងតែពីថ្ងៃទី ១៧ ខែមីនាមក។ ពួកគេ ត្រូវបានអនុញ្ញាតឲ្យចេញក្រៅបានតែក្នុងករណីចាំបាច់ដូចជាទៅមន្ទីរពេទ្យ ឬទៅទិញម្ហូបអាហារសម្រាប់បរិភោគតែប៉ុណ្ណោះ។
ជាមួយគ្នានេះ រដ្ឋាភិបាលបារាំងក៏បានរឹតបន្តឹងផងដែរ ការធ្វើដំណើរនានានៅក្នុងប្រទេស ដើម្បីធ្វើយ៉ាងណាគ្រប់គ្រងឲ្យខានតែបានវីរុសកូវីដ១៩ ដែលបានចម្លងទៅដល់មនុស្សយ៉ាងហោចណាស់ ១២ ម៉ឺន ៤ ពាន់នាក់ និងសម្លាប់មនុស្សជាង ១ម៉ឺន ៣ពាន់នាក់នៅបារាំង។
អត្រាអ្នកស្លាប់ដោយសារគ្រោះថ្នាក់ចរាចរណ៍បានថយចុះចំនួន ៣៩,៦ % នៅទូទាំងប្រទេសបារាំងក្នុងខែមីនា បើប្រៀបធៀបទៅនឹងឆ្នាំ ២០១៩។ ក្រសួងមហាផ្ទៃបារាំង បានឲ្យដឹងថា អ្នកស្លាប់ដោយសារគ្រោះថ្នាក់ចរាចរណ៍នៅក្នុងខែមីនា ឆ្នាំ ២០២០ មានចំនួន ១៥៤ នាក់ ពោលគឺធ្លាក់ចុះពីចំនួន ២៥៥ នាក់នៅក្នុងខែមីនាដូចគ្នាក្នុងឆ្នាំ ២០១៩។
មួយវិញទៀត ចំនួនគ្រោះថ្នាក់ក៏បានថយចុះចំនួន ៤៣ % ផងដែរ ពោលគឺធ្លាក់ចុះពីចំនួន ៤,២៩៨ ក្នុងខែមីនាឆ្នាំ ២០១៩ ដល់ត្រឹមតែ ២,៤៤៣ ក្នុងខែតែមួយនៃឆ្នាំ២០២០ នេះ។
“ការថយចុះនៃចំនួនអ្នកស្លាប់ដោយសារគ្រោះថ្នាក់ចរាចរណ៍ បានកើតឡើងនៅក្នុងបរិបទដែលបារាំងអនុវត្តនូវវិធានការបង្ខាំងពលរដ្ឋឲ្យនៅតែក្នុងផ្ទះចាប់តាំងពីថ្ងៃទី ១៧ ខែមីនាមក។ វិធានការនេះ ពិតណាស់បានកាត់បន្ថយយ៉ាងច្រើននូវចំនួនគ្រោះថ្នាក់ចរាចរណ៍នៅលើដងផ្លូវ”។ នេះ គឺជាការបញ្ជាក់បន្ថែមពីខាងក្រសួងមហាផ្ទៃបារាំង។
ក្រោយរដ្ឋាភិបាលប្រកាសបិទប្រទេស និងបង្ខាំងឲ្យប្រជាពលរដ្ឋនៅក្នុងផ្ទះ ចំនួនអ្នកជិះកង់ និងអ្នកថ្មើរជើងមានតិចជាងមុន នៅលើដងផ្លូវរបស់ប្រទេសបារាំង ហើយនេះគឺជាកត្តាចំបងក្នុងការកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍។
គួររំឭកជូនថា វិធានការរាំងខ្ទប់ប្រជាពលរដ្ឋឲ្យនៅក្នុងផ្ទះរបស់បារាំង ត្រូវមានសុពលភាពយ៉ាងហោចណាស់រហូតដល់ថ្ងៃទី ១៥ ខែមេសា។ ដោយសារតែការឆ្លងរាលដាលនៃវីរុសកូវីដ១៩ នៅមានច្រើននៅឡើយនៅក្នុងប្រទេស រដ្ឋាភិបាលបារាំងដឹកនាំដោយលោកប្រធានាធិបតីអេម៉ានុយអែល ម៉ាក្រុង គ្រោងនឹងប្រកាសអំពីការពន្យារពេលនៃចំណាត់ការបិទប្រទេសនៅសប្តាហ៍ក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ